AKP ភ្នំពេញ ថ្ងៃទី២៩ ខែឧសភា ឆ្នាំ២០២៥--

ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយឯកឧត្តមជាថ្នាក់ដឹកនាំ មន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមខេត្តកំពង់ធំ បានអញ្ជើញចុះពិនិត្យជាក់ស្តែងវឌ្ឍនភាពគម្រោងកែលម្អច្រាំងស្ទឹងសែនប្រវែង២៥៤៥ម៉ែត្រ និងគម្រោងធ្វើទំនើបកម្មវិស្វកម្មប្រព័ន្ធធារាសាស្ត្រស្ទឹងជីនិតកញ្ចប់ទីមួយ ស្ថិតក្នុងភូមិសាស្ត្រស្រុកសន្ទុក ខេត្តកំពង់ធំ កាលពីរសៀលថ្ងៃពុធ ទី២៨ ខែឧសភា ឆ្នាំ២០២៥។

សូមជម្រាបថា គម្រោងកែលម្អ និងពង្រឹងច្រាំងស្ទឹងសែនមានប្រវែងសរុប២៥៤៥ម៉ែត្រ នៅចំនួនបួនទីតាំង ដោយប្រើប្រាស់ស៊ីផាយ បេតុងអារម៉េ ក្នុងនោះ ទីតាំងមុខសាលាខេត្ត ទីតាំងមុខផ្សារចាស់ ទីតាំងភូមិពោធិ៍បាក់ក និងទីតាំងភូមិក្របៅ។ ដោយឡែក គម្រោងធ្វើទំនើបកម្មវិស្វកម្មប្រព័ន្ធធារាសាស្ត្រស្ទឹងជីនិតកញ្ចប់ទី១ មានការងារសំខាន់ៗដូចជា៖ ទី១) សំណង់បង្ហៀរប្រវែង៧៥០ម៉ែត្រ និងទី២) ស្ពានឆ្លងកាត់ប្រវែង ៧៥០ម៉ែត្រ ទទឹង ១,៨ម៉ែត្រ។

ក្នុងឱកាសចុះពិនិត្យការងារ ឯកឧត្តមរដ្ឋមន្ត្រីបានថ្លែងនូវការកោតសរសើរ និងវាយតម្លៃខ្ពស់ចំពោះវឌ្ឍនភាពការងារសម្រេចបាន និងបានស្នើឱ្យក្រុមហ៊ុនសាងសង់បន្តយកចិត្តទុកដាក់លើគុណភាព សុវត្ថិភាព ឱ្យបានហ្មត់ចត់ ស្របទៅតាមបទដ្ឋានបច្ចេកទេស ព្រមទាំងជំរុញការអនុវត្តការងារឱ្យសម្រេចបានតាមផែនការគ្រោងទុក ប្រកបដោយប្រសិទ្ធភាពខ្ពស់។

ទំនប់អាងទឹកស្ទឹងជីនិតស្ថិតនៅលើដងស្ទឹងជីនិតផែ្នកកណ្តាល គ្របដណ្តប់លើស្រុកចំនួនបីនៃខេត្តកំពង់ធំ មានស្រុកសន្ទុក ស្រុកបារាយណ៍ និងស្រុកតាំងគោក មានសក្តានុពលអាចរក្សាទឹកស្តុកទុកប្រមាណ ៣៩លានម៉ែត្រគូប ជាប្រភេទទឹករស់ បម្រើដល់ការស្រោចស្រពផ្ទៃដីបង្កបង្កើនផលស្រូវរដូវវស្សាបានប្រមាណ១៨០០០ ហិកតា និងស្រូវរដូវប្រាំងប្រមាណ៧៣០០ហិកតា៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក)