AKP ភ្នំពេញ ថ្ងៃទី២១ ខែឧសភា ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបពិភាក្សាការងារជាមួយលោក Dominic sharpe ទីប្រឹក្សាក្រុមប្រឹក្សាភិបាល និងផ្តល់យុទ្ធសាស្ត្រនៃសាលាអេយូភីភី ឡៃហ្គី លីឌីហ្ស៊ីប អាកាឌីមី នៅទីស្តីការក្រសួង នារសៀលថ្ងៃទី២១ ខែឧសភា ឆ្នាំ២០២៥ ដោយកិច្ចពិភាក្សាបានផ្ដោតទៅលើ ១) ការជ្រើសរើសសិស្សស្រីចំនួន៤នាក់ពីបណ្តាខេត្ត ដើម្បីទទួលបានអាហារូបករណ៍ពេញ (រួមទាំងការស្នាក់នៅពេញ) សិក្សានៅសាលាអេយូភីភី ឡៃហ្គី លីឌីហ្ស៊ីប អាកាឌីមី  ២) ការចូលរួមក្នុងការបណ្តុះបណ្តាលគ្រូបង្រៀនតាមរយៈការទទួលយកគរុសិស្ស គរុនិស្សិតចុះកម្មសិក្សាគរុកោសល្យនៅសាលាអេយូភីភី ឡៃហ្គី លីឌីហ្ស៊ីប អាកាឌីមីផ្ទាល់ និង៣) ការផ្សព្វផ្សាយកិច្ចសហប្រតិបត្តិការជាមួយសាលាអេយូភីភី ឡៃហ្គី លីឌីហ្ស៊ីប អាកាឌីមី លើគេហទំព័រផ្លូវការក្រសួងអប់រំ យុវជន និងកីឡា។

ក្នុងឱកាសនោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះគំនិតផ្តួចផ្តើមនានារបស់សាលា ដែលមានគោលដៅលើកកម្ពស់វិស័យអប់រំនៅកម្ពុជា ជាពិសេសការបណ្តុះបណ្តាលគ្រូបង្រៀនប្រកបដោយគុណភាព និងបានគូសបញ្ជាក់ពីការគាំទ្រចំពោះគម្រោងបន្ថែមកម្មវិធីសិក្សាក្រៅម៉ោង ដែលផ្តោតលើវិន័យ ក្រមសីលធម៌ អាកប្បកិរិយា ការងារស្ម័គ្រចិត្ត និងការចូលរួមរបស់សហគមន៍ ព្រមទាំងគំនិតផ្តួចផ្តើមរបស់សាលាក្នុងការផ្តល់អាហារូបករណ៍សម្រាប់សិស្សស្រីចំនួន៤នាក់ ដែលនឹងរួមចំណែកលើកកម្ពស់សមភាពយេនឌ័រក្នុងការអប់រំ ជាពិសេសបានលើកទឹកចិត្តឱ្យដាក់បញ្ចូលកម្មវិធីសិក្សាពាក់ព័ន្ធនឹងបញ្ញាសិប្បនិម្មិត(AI) ក្នុងការរៀន និងបង្រៀនឆ្លើយតបនឹងយុគសម័យឌីជីថល ដែលទាំងនេះក៏ជាអាទិភាពរបស់ក្រសួងអប់រំ យុវជន និងកីឡា តបតាមអនុសាសន៍វិធានការគន្លឹះដើម្បីពង្រឹងគុណភាពអប់រំរបស់សម្តេចមហាបវរធិបតី នាយករដ្ឋមន្ត្រី សំដៅបណ្តុះបណ្តាលធនធានមនុស្សប្រកបដោយសក្ដានុពល សីលធម៌ និងការទទួលខុសត្រូវខ្ពស់។

ឯកឧត្តមបណ្ឌិតសភាចារ្យ ហង់ជួន ណារ៉ុន បានបញ្ជាក់ជូនលោក Dominic sharpe ថា ក្រសួងអប់រំ យុវជន និងកីឡា នឹងបន្តកិច្ចសហប្រតិបត្តិការជាមួយសាលាអេយូភីភី ឡៃហ្គី លីឌីហ្ស៊ីប អាកាឌីមី ឱ្យកាន់តែជិតស្និទ្ធ ដើម្បីស្វែងរកយន្តការ និងវិធីសាស្រ្តនានាក្នុងការអនុវត្តគម្រោងរួមចំណែកដល់ការអភិវឌ្ឍវិស័យអប់រំនៅកម្ពុជាឱ្យកាន់តែរីកចម្រើនថែមមួយកម្រិតទៀត៕

ដោយ៖ ចាន់ សុភឿន (ប្រភព៖ ក្រសួងអប់រំ)