AKP ឧត្តរមានជ័យ ថ្ងៃទី២១ ខែឧសភា ឆ្នាំ២០២៥--លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា អមដំណើរដោយលោក ឃិន ញ៉ាណ អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជា ខេត្តឧត្តរមានជ័យ និងសហការី នៅរសៀលថ្ងៃទី២០ ខែឧសភា ឆ្នាំ២០២៥ បានចុះសួរសុខទុក្ខ និងផ្តល់អំណោយមនុស្សធម៌ជូនដល់គ្រួសារងាយរងគ្រោះបំផុត ដែលមានចាស់ជរាគ្មានទីពឹង ស្ត្រីមេម៉ាយក្រីក្រ និងអ្នកមានជំងឺរ៉ាំរ៉ៃ ចំនួន២០គ្រួសារ នៅតាមខ្នងផ្ទះ ដែលរស់នៅសង្កាត់សំរោង និងសង្កាត់បន្សាយរាក់ ក្រុងសំរោង ខេត្តឧត្តរមានជ័យ។

លោកជំទាវ ពុំ ចន្ទីនី បានមានប្រសាសន៍ថា ដោយអនុវត្តតាមអនុសាសន៍ដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលណែនាំដល់មន្ត្រីក្រោមឱវាទធ្វើយ៉ាងណានាំយកអំណោយទៅចែកជូនដោយផ្ទាល់ដៃ និងដល់ខ្នងផ្ទះតែម្តង ការយកអំណោយមកដល់ខ្នងផ្ទះនេះគឺជាការលើកទឹកចិត្ត និងបញ្ជាក់ថាពួកគាត់មិននៅឯកោ និងមិនទទួលបានការយកចិត្តទុកដាក់ដែលបណ្តាលឱ្យដាច់ស្បៀងនោះទេ។

ទន្ទឹមនឹងនេះ លោកជំទាវក៏បានពាំនាំប្រសាសន៍ផ្តាំផ្ញើសាកសួរសុខទុក្ខ និងក្តីនឹករលឹកពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។ ហើយការអនុវត្តចុះមកដល់ខ្នងផ្ទះនាពេលនេះ ដើម្បីបានដឹងពីស្ថានភាពជីវភាពពីការរស់នៅកាន់តែច្បាស់បន្ថែមទៀត ព្រមទាំងបានបញ្ជ្រាបការអប់រំផ្សព្វផ្សាយអំពីសុខភាព និងអនាម័យដោយផ្ទាល់ ព្រោះថាការអប់រំសុខភាព និងអនាម័យដោយផ្ទាល់នេះគឺកាន់តែមានប្រសិទ្ធភាពផ្នែកសុខភាព អនាម័យបរិស្ថាន នៃការរស់នៅល្អតែម្តង។

សូមបញ្ជាក់ថា ក្នុងឱកាសចុះសួរសុខទុក្ខ និងផ្ដល់អំណោយដល់ប្រជាពលរដ្ឋងាយរងគ្រោះនៅតាមខ្នងផ្ទះចំនួន២០គ្រួសារ ក្នុងមួយៗគ្រួសារទទួលបានអង្ករ២៥គីឡូក្រាម មី១កេស ត្រីខ១០កំប៉ុង ទឹកស៊ីអ៊ីវ១យួរ ឃីត១កញ្ចប់ (មុង ភួយ សារុង ក្រមា) អាហារសុខភាព២កញ្ចប់ និងថវិកាមួយចំនួន៕

ដោយ ទិត ស្រ៊