AKP ភ្នំពេញ ថ្ងៃទី២១ ខែឧសភា ឆ្នាំ២០២៥-- ក្រសួងប្រៃសណីយ៍ និងទូរគមនាគមន៍ កាលពីរសៀលថ្ងៃទី២០ ខែខឧសភា ឆ្នាំ២០២៥ បានបង្ហាញនូវការអបអរសាទរដល់សហស្ថានិករបស់ Jalat Logistics-ចល័ត ឡូជីស្ទីក ទាំង៣រូប របស់កម្ពុជា ដែលបានជាប់ឈ្មោះក្នុងបញ្ជីឈ្មោះ “Forbes 30 Under 30s” របស់ទស្សនាវដ្តីអាមេរិក Forbes ប្រចាំឆ្នាំ២០២៥ ។ 

នេះបង្ហាញពីការទទួលស្គាល់ជាសហគ្រិនវ័យខ្មែរដែលមានឥទ្ធិពលបំផុតនៅក្នុងតំបន់ ក្នុងការកសាងដំណោះស្រាយក្នុងវិស័យដឹកជញ្ជូនប្រកបដោយភាពច្នៃប្រឌិតនៅក្នុងប្រទេសកម្ពុជា។ ក្រសួងប្រៃសណីយ៍ និងទូរគមនាគមន៍ មានសេចក្តីសោមនស្សរីករាយ និងមានមោទកភាព ដែលបានក្លាយជាផ្នែកមួយនៃដំណើរឆ្ពោះទៅរកភាពជោគជ័យរបស់ ចល័ត ឡូជីស្ទីក។

សូមបញ្ជាក់ផងដែរថា ចល័ត ឡូជីស្ទីក គឺជាធុរកិច្ចបង្កើតថ្មី ដែលទទួលពានរង្វាន់រដ្ឋមន្ត្រីសម្រាប់ធុរកិច្ចថ្មីឌីជីថលល្អបំផុតប្រចាំឆ្នាំ (Minister Startup of the Year)  ពីកម្មវិធីប្រកួតប្រជែងថ្នាក់ជាតិ Cambodia Digital Awards 2024 ដែលរៀបចំដោយក្រសួងប្រៃសណីយ៍និងទូរគមនាគមន៍៕

ដោយ  ណយ នឿន (ប្រភព៖ ក្រសួងប្រៃសណីយ៍)