AKP ភ្នំពេញ ថ្ងៃទី២០ ខែឧសភា ឆ្នាំ២០២៥-- ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ (ក.ប.ទ.) កាលពីថ្ងៃទី១៩ ខែឧសភា ឆ្នាំ២០២៥ បានអញ្ជើញចុះអនុស្សរណៈនៃការយោគយល់ស្តីពីការផ្តល់អាហារូបករណ៍សិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតលើជំនាញបច្ចេកវិទ្យាឌីជីថល (Memorandum of Understanding on the Provision of Scholarships for Master’s and Doctoral Studies) ជាមួយសាកវិទ្យាល័យជាតិ CHUNGBUK សាធារណរដ្ឋកូរ៉េ តំណាងដោយលោក Go Chang-Seop ប្រធានសាកលវិទ្យាល័យជាតិ Chungbuk នៃសាធារណរដ្ឋកូរ៉េ។

ការចុះអនុស្សរណៈនៃការយោគយល់នេះធ្វើឡើងដើម្បីពង្រឹងកិច្ចសហប្រតិបត្តិការ និងការផ្លាស់ប្តូរការសិក្សាក្នុងវិស័យអប់រំ ព្រមទាំងការស្រាវជ្រាវរវាង ក.ប.ទ. និងសាកវិទ្យាល័យជាតិ CHUNGBUK សាធារណរដ្ឋកូរ៉េ ជាពិសេសផ្តោតលើបច្ចេកវិទ្យាឌីជីថល ការបង្កើតថ្នាលបញ្ញាសិប្បនិម្មិត (AI) ដើម្បីលើកកម្ពស់កម្មវិធីអភិវឌ្ឍន៍ធនធានមនុស្ស AI កម្ពុជា និងកម្មវិធីអភិវឌ្ឍន៍ទេពកោសល្យទិន្នន័យធំ។ គោលបំណងនៃអនុស្សរណៈនេះផ្ដោតសំខាន់លើការអនុវត្តសកម្មភាពចំនួន៦៖ ទី១. ការអនុវត្តកម្មវិធីបរិញ្ញាបត្រជាន់ខ្ពស់ និងថ្នាក់បណ្ឌិតលើជំនាញ AI ទី២. សកម្មភាពស្រាវជ្រាវរួមគ្នាក្នុងវិស័យ AI ទី៣. កម្មវិធីផ្លាស់ប្តូរមហាវិទ្យាល័យ បុគ្គលិកស្រាវជ្រាវ និងនិស្សិត ទី៤. កម្មវិធីផ្លាស់ប្តូរសម្ភារវិទ្យាសាស្ត្រ ការបោះពុម្ពផ្សព្វផ្សាយ និងព័ត៌មាន ទី៥. សហការរៀបចំសន្និសីទវគ្គបណ្ដុះបណ្ដាល និងសិក្ខាសាលា និងទី៦. ផ្នែកផ្សេងទៀតដែលមានផលប្រយោជន៍ទៅវិញទៅមករវាងប្រទេសទាំងពីរ។

ជាមួយគ្នានេះ ឯកឧត្តមរដ្ឋលេខាធិការក៏បានធ្វើដំណើរទស្សនកិច្ចទៅកាន់វិទ្យាស្ថាន Korea Advanced Institute of Science and Technology (KAIST) របស់ក្រសួង Ministry of Science and ICT ដើម្បីពិភាក្សាការងារ និងពិនិត្យលទ្ធភាពបញ្ជូននិស្សិតកម្ពុជាមកសិក្សានៅវិទ្យាស្ថាននេះ ដើម្បីអភិវឌ្ឍធនធនមនុស្សកម្ពុជាក្នុងវិស័យវិទ្យាសាស្ត្រ និងបច្ចេកវិទ្យា។

លើសពីនេះទៀត ឯកឧត្តមរដ្ឋលេខាធិការក៏បានធ្វើទស្សនកិច្ចទៅកាន់ Korea Institute of Science and Technology Information (KISTI) ដែលជាវិទ្យាស្ថានស្រាវជ្រាវផ្នែកវិទ្យាសាស្ត្រ និងបច្ចេកវិទ្យាថ្នាក់ជាតិរបស់សាធារណរដ្ឋកូរ៉េ ទៅការលើស្រាវជ្រាវ និងអភិវឌ្ឍវិស័យវិទ្យាសាស្ត្រ និងបច្ចេកវិទ្យា ដើម្បីសិក្សាពីឧត្តមានុវត្តន៍សម្រាប់ការអនុវត្តនៅកម្ពុជាផងដែរ៕

ដោយ ណយ នឿន (ប្រភព៖ ក្រសួងប្រៃសណីយ៍)