AKP បន្ទាយមានជ័យ ថ្ងៃទី២០ ខែឧសភា ឆ្នាំ២០២៥-- រដ្ឋបាលខេត្តបន្ទាយមានជ័យបានប្រារព្ធទិវាជាតិនៃការចងចាំ ២០ ឧសភា យ៉ាងឱឡារិក នៅវត្តសុភមង្គល (វត្តក្បាលខ្មោច) ក្នុងសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ នាព្រឹកថ្ងៃទី២០ ខែឧសភា ឆ្នាំ២០២៥នេះ ក្រោមអធិបតីភាពរបស់ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និងឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ ដោយមានការចូលរួមពីសំណាក់ឯកឧត្តម-លោកជំទាវ ជាថ្នាក់ដឹកនាំមន្ទីរ អង្គភាពស្ថាប័នពាក់ព័ន្ធជុំវិញខេត្ត មេបញ្ជាការកងកម្លាំងប្រដាប់អាវុធគ្រប់ជាន់ថ្នាក់ ប្រជាពលរដ្ឋ តាជី-យាយជី និងសិស្សានុសិស្សយ៉ាងច្រើនកុះករ។

ក្នុងឱកាសនោះ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានថ្លែងសុន្ទរកថាដ៏មានអត្ថន័យ ដោយបានរំលឹកយ៉ាងជ្រាលជ្រៅអំពីរបបកម្ពុជាប្រជាធិបតេយ្យ ឬរបបប្រល័យពូជសាសន៍ ប៉ុល ពត (១៧ មេសា ១៩៧៥ - ៦ មករា ១៩៧៩) ដែលជារបបដ៏ឃោរឃៅ និងខ្មៅងងឹតបំផុតនៅក្នុងប្រវត្តិសាស្ត្រកម្ពុជា ដោយឯកឧត្តមបានគូសបញ្ជាក់ថា ថ្ងៃទី២០ ឧសភា គឺជាថ្ងៃដែលប្រជាជនកម្ពុជាគ្រប់រូបចងចាំមិនអាចបំភ្លេចបាននូវសោកនាដកម្មដ៏ធំធេង ដែលបានឆក់យកជីវិតប្រជាពលរដ្ឋខ្មែរជាង៣លាននាក់។

ឯកឧត្តមអភិបាលខេត្តបានរៀបរាប់យ៉ាងក្បោះក្បាយអំពីទុក្ខវេទនាដែលប្រជាពលរដ្ឋកម្ពុជាបានរងគ្រោះក្នុងរបបដ៏អាក្រក់នេះ រួមមានការកាប់សម្លាប់ ការជម្លៀសចេញពីលំនៅឋានដោយបង្ខំ ការបង្ខំឱ្យធ្វើការហួសកម្លាំង ការអត់ឃ្លាន ការខ្វះខាតថ្នាំសង្កូវ និងការរឹតត្បិតសិទ្ធិសេរីភាពគ្រប់បែបយ៉ាង រហូតដល់សិទ្ធិរស់រានមានជីវិតដែលជាសិទ្ធិមូលដ្ឋានរបស់មនុស្សក៏គ្មានដែរ។ “ប្រជាពលរដ្ឋកម្ពុជាភាគច្រើនលើសលប់បានដឹង និងបានយល់ច្បាស់ អំពីរឿងរ៉ាវសោកនាដកម្មដ៏ជូរចត់ ដែលប្រជាពលរដ្ឋខ្មែរបានឆ្លងកាត់ជិត៣ទសវត្សរ៍ ក្នុងភ្នក់ភ្លើងសង្គ្រាម និងទឹកភ្នែក ការកាប់សម្លាប់ ការបំផ្លិចបំផ្លាញ ការជម្លៀសចេញពីទីលំនៅរបស់ខ្លួនដោយបង្ខំ និងការបង្ខំឱ្យធ្វើការដូចសត្វធាតុជាដើម”។

ជាមួយគ្នានោះ ឯកឧត្តមអភិបាលខេត្តបានអំពាវនាវដល់ប្រជាពលរដ្ឋទាំងអស់ឱ្យចូលរួមថែរក្សាការពារសន្តិភាពឱ្យបានគង់វង្ស ដើម្បីកុំឱ្យរបបដ៏សាហាវឃោរឃៅនេះវិលត្រឡប់មកវិញ។ សន្តិភាពបានផ្តល់ឱកាសគ្រប់យ៉ាងក្នុងការកសាងសង្គម គ្រួសារ សហគមន៍ និងប្រទេសជាតិឱ្យកាន់តែរីកចម្រើនទៅមុខ។

លោកតា ឈឹម ផល្លី អាយុ ៧២ ឆ្នាំ ជាអតីតជនរងគ្រោះក្នុងរបបខ្មៅងងឹត បានរៀបរាប់ទាំងទឹកភ្នែកថា លោកពិតជាមិនអាចបំភ្លេចបាននូវទារុណកម្មដែលលោក និងក្រុមគ្រួសារបានឆ្លងកាត់។ លោកបានថ្លែងអំណរគុណចំពោះរាជរដ្ឋាភិបាលដែលបានរៀបចំទិវានេះឡើង ដើម្បីរំលឹកដល់ជនរងគ្រោះ និងជាសារមួយដាស់តឿនដល់កូនចៅជំនាន់ក្រោយឱ្យចងចាំនូវប្រវត្តិសាស្ត្រដ៏ឈឺចាប់នេះ និងរួមគ្នាថែរក្សាសន្តិភាព។

ចំណែកឯកញ្ញា សុខ ចាន់ថន ជាសិស្សវិទ្យាល័យ បានបង្ហាញអារម្មណ៍រន្ធត់ចិត្តបន្ទាប់ពីបានស្តាប់នូវសុន្ទរកថា និងការរៀបរាប់ពីអតីតជនរងគ្រោះ។ កញ្ញាបានប្តេជ្ញាចិត្តថានឹងខិតខំសិក្សារៀនសូត្រ និងចូលរួមចំណែកក្នុងការកសាងប្រទេសជាតិឱ្យកាន់តែរីកចម្រើន ដើម្បីកុំឱ្យប្រវត្តិសាស្ត្រដ៏សោកសៅនេះកើតឡើងម្តងទៀត៕

ដោយ ឈុន សារ៉ាត