AKP ព្រះសីហនុ ថ្ងៃទី២០ ខែឧសភា ឆ្នាំ២០២៥-- រដ្ឋបាលខេត្តព្រះសីហនុ បានប្រារព្ធ «ទិវាជាតិនៃការចងចាំ» ដែលជាទិវាបុណ្យជាតិផ្លូវការដែលត្រូវបានកំណត់ដោយរាជរដ្ឋាភិបាលកម្ពុជា ក្រោមអធិបតីភាព ឯកឧត្តម វង្ស ផាណាត ប្រធានក្រុមប្រឹក្សាខេត្តព្រះសីហនុ នាព្រឹកថ្ងៃអង្គារ ទី២០ ខែឧសភា ឆ្នាំ២០២៥ ដោយមានការនិមន្តចូលរួមពីព្រះមេគណខេត្ត ព្រះគ្រូចៅអធិការវត្តក្នុងខេត្តព្រះសីហនុ មន្ត្រីរាជការ កងកម្លាំងប្រដាប់អាវុធ អាជ្ញាធរសង្កាត់ លោកគ្រូ អ្នកគ្រូ សិស្ស និស្សិតយុវជនកាយរិទ្ធ យុវជនកាកបាទក្រហម។ តាមរយៈអនុក្រឹត្យលេខ១៩ អនក្រ.បក ចុះថ្ងៃទី១៤ ខែកុម្ភៈ ឆ្នាំ២០១៨ សម្រាប់ជាការរំឭកដល់ជនរងគ្រោះនឹងការឈឺចាប់ពីឧក្រិដ្ឋកម្ម ដែលកើតមានក្នុងរបបកម្ពុជាប្រជាធិបតេយ្យចន្លោះពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី០៦ ខែមករា ឆ្នាំ១៩៧៩។

ឯកឧត្តម វង្ស ផាណាត ប្រធានក្រុមប្រឹក្សាខេត្តព្រះសីហនុ បានអានសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងទិវាជាតិនៃការចងចាំ ២០ឧសភា បង្កើតឡើងដើម្បីលើកតម្កើងការគោរពវិញ្ញាណក្ខន្ធ និងការធ្វើបុណ្យឧទ្ទិសដល់ជនរងគ្រោះដែលបានស្លាប់ក្នុងរបបកម្ពុជាប្រជាធិបតេយ្យ លើកតម្កើងការរំឭកដល់ជនរងគ្រោះ ការស្តារកិត្តិយស និងសេចក្តីថ្លៃថ្នូររបស់ជនរងគ្រោះ ទោះជានៅរស់រានមានជីវិត ឬបានបាត់បង់ជីវិតក៏ដោយ ការប៉ះប៉ូវនៃការឈឺចាប់ខាងផ្លូវចិត្ត ផ្លូវកាយ និងផ្នែកសង្គមរបស់ជនរងគ្រោះ ក្រុមគ្រួសារ និងការចូលរួមចំណែកដល់ការផ្សះផ្សាជាតិ និងជំរុញឱ្យមានសុខដុមនីយកម្មក្នុងសង្គមកម្ពុជា និងជាការលើកកម្ពស់ការផ្សព្វផ្សាយ និងការយល់ដឹងឱ្យបានកាន់តែច្បាស់អំពីអំពើឃោរឃៅឧក្រិដ្ឋកម្មដែលកើតមានក្នុងរបបកម្ពុជាប្រជាធិបតេយ្យ ដោយធ្វើការទប់ស្កាត់កុំឱ្យកើតមានឡើងសាជាថ្មីមកលើប្រជាជនកម្ពុជា៕

ដោយ ងូ សុមុនី