AKP កំពង់ធំ ថ្ងៃទី២០ ខែឧសភា ឆ្នាំ២០២៥-- លោក អ៊ុន បុត្ត អភិបាលរងនៃគណៈអភិបាលខេត្តកំពង់ធំ និងលោក ជា ពុំ ប្រធានលេខាធិការដ្ឋានរៀបចំការបោះឆ្នោតខេត្តកំពង់ធំ "ល.ខ.ប" កំពង់ធំ កាលពីរសៀលថ្ងៃទី១៩ ខែឧសភា ឆ្នាំ២០២៥ បានអញ្ជើញដឹកនាំកិច្ចប្រជុំផ្សព្វផ្សាយជាមួយភាគីពាក់ព័ន្ធស្តីពីកិច្ចសហការ និងការងារសន្តិសុខសណ្តាប់ធ្នាប់សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៥ នៅសាលប្រជុំគណៈកម្មការរៀបចំការបោះឆ្នោត ដោយមានការចូលរួមពីតំណាងកងកម្លាំងទាំងបី មន្ទីរសុខាភិបាល មន្ទីរព័ត៌មាន និងមន្ទីរអប់រំយុវជននិងកីឡា អភិបាលក្រុង ស្រុក ក្រុមប្រឹក្សាឃុំ សង្កាត់ (កបឃ.ស) ទាំង៨នៃក្រុងស្ទឹងសែន គណបក្សនយោបាយ សមាគម អង្គការមិនមែនរដ្ឋាភិបាល និងមន្ត្រីល.ខ.ប សរុបប្រមាណ៦៣នាក់។

លោក អ៊ុន បុត្ត បានមានប្រសាសន៍ថា បើតាមការសង្កេតមើលបច្ចុប្បន្នឃើញថា ការងារចុះបញ្ជីថ្មីតាមបណ្តាឃុំ-សង្កាត់មួយចំនួនមានភាពល្អប្រសើរច្រើន និងគ្រប់ចំនួនទៅតាមផែនការដែរបានគ្រោងទុក ប៉ុន្តែទន្ទឹមនឹងនោះនៅតាមបណ្តាឃុំ-សង្កាត់មួយចំនួនទៀតនៅមានភាពខ្វះចន្លោះនៅឡើយ។

លោកអភិបាលរងខេត្តបានសំណូមពរដល់ក្រុងស្រុកទាំងអស់ត្រូវពិនិត្យលើតួលេខនៅក្នុងរបាយការណ៍នៃឃុំ -សង្កាត់របស់ខ្លួនទៅលើចំណុចការងារជីវមាត្រ និងជំរុញការចែកបណ្ណព័ត៌មាន ព្រមទាំងការចុះបញ្ជីឈ្មោះថ្មីនៅតាមក្រុងស្រុក ឃុំ-សង្កាត់រៀងៗខ្លួនបន្ថែមទៀត ព្រោះយើងនៅសល់រយៈពេល៧ថ្ងៃទៀតដែរលើការងារនេះ។

កិច្ចប្រជុំនេះធ្វើឡើងក្នុងគោលបំណង៖ ១.គ្រប់គ្រងការងារសន្តិសុខសុវត្ថិភាព និងសណ្តាប់ធ្នាប់។ ២. ការពង្រឹងតួនាទីភារកិច្ចចូលរួមការងាររបស់ភាគីពាក់ព័ន្ធ និង៣.កិច្ចពិភាក្សាយោបល់របស់អង្គប្រជុំ។ សូមបញ្ជាក់ថាការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមឃុំ-សង្កាត់ប្រព្រឹត្តទៅចាប់ពីថ្ងៃទី០១ ដល់ថ្ងៃទី២៦ ខែឧសភា ឆ្នាំ២០២៥៕

ដោយ ស៊ុម វណ្ណា