AKP កំពង់ចាម ថ្ងៃទី២០ ខែឧសភា ឆ្នាំ២០២៥-- ដើម្បីការពារធនធានមច្ឆជាតិកម្លាំងជំនាញរបស់រដ្ឋបាលជលផលខេត្តកំពង់ចាម នៅថ្ងៃទី២០ ខែឧសភា ឆ្នាំ២០២៥ ដោយមានការចូលរួមដោយផ្ទាល់ពីសំណាក់ឯកឧត្តម ទឹម បូរក្ស រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងអធិការដ្ឋានរដ្ឋបាលជលផលមេគង្គ រដ្ឋបាលឃុំវិហារធំ សហគមន៍នេសាទឃុំវិហារធំ សហគមន៍នេសាទសាមគ្គីឃុំមៀន និងប៉ុស្តិ៍នគរបាលរដ្ឋបាលឃុំវិហារធំ  បានចុះប្រតិបត្តិការត្រួតពិនិត្យ និងបង្រ្កាបបទល្មើសជលផល នៅចំណុចមុខកោះសំពៅ និងចំណុចដីក្រហម ឃុំវិហារធំ  ស្រុកកំពង់សៀម ខេត្តកំពង់ចាម ដោយបង្ក្រាបបានចំនួន០២ ករណី ធ្វើការរុះរើនិងបំផ្លាញចោលនូវឧបករណ៍ខុសច្បាប់នៅនឹងកន្លែង រួមមាន៖ ឧបករណ៍លូស្បៃមុងចំនួន ០៧មាត់ របាំងស្បៃមុងប្រវែង១២០ម៉ែត្រ  ឧបករណ៍រាវចំនួន០៥ មាត់របាំងរាវប្រវែងចំនួន ២៥០ម៉ែត្រ បង្គោលចម្រឹងចំនួន២៣០ដើម។

ក្នុងឱកាសនោះ ឯកឧត្តម ទឹម បូរក្ស បានធ្វើការណែនាំដល់កម្លាំងទាំងអស់ត្រូវបន្តចូលរួមបង្ក្រាបទប់ស្កាត់រាល់បទល្មើសនេសាទក្នុងដែនរបស់ខ្លួន ដើម្បីការពារធនធានមច្ឆជាតិ ដែលជាប្រភពនៃការធានានូវសន្តិសុខស្បៀង សម្រាប់ផ្គត់ផ្គង់ជីវភាពពលរដ្ឋយើង ហើយដល់ប្រជាពលរដ្ធទាំងអស់ត្រូវនាំគ្នាចូលរួមថែរក្សាសម្បត្តិធម្មជាតិ មច្ឆជាតិ សូមកុំប្រព្រឹត្តបទល្មើសនេសាទណាដែលត្រូវហាមឃាត់ និងខុសច្បាប់ សំដៅនូវកំណើនមច្ឆជាតិក្នុងដែនធម្មជាតិ៕

ដោយ ឆាយ ម៉ុត