AKP ព្រះសីហនុ ថ្ងៃទី២០ ខែឧសភា ឆ្នាំ២០២៥-- កិច្ចប្រជុំត្រៀមកិច្ចប្រជុំមន្ត្រីជាន់ខ្ពស់ កិច្ចសហប្រតិបត្តិការអាស៊ាន ស្តីពីកិច្ចការមុខងារសាធារណៈលើកទី២៣ 23rd ASEAN Cooperation on Civil Service Matters (ACCSM) សម្រាប់មន្រ្តីជាន់ខ្ពស់នៃប្រទេសជាសមាជិកអាស៊ាន និងប្រទេសទីម័រខាងកើត បានចូលមកដល់ថ្ងៃទី២ គឺថ្ងៃទី២០ ខែឧសភា ឆ្នាំ២០២៥ នៅសណ្ឋាគារឆ្នេរសុខា ក្រុងព្រះសីហនុ។

លោកជំទាវ ឈី វិជ្ជរ៉ា រដ្ឋលេខាធិការក្រសួងមុខងារសាធារណៈកម្ពុជា ក្នុងនាមជាប្រធាន ACCSM បានពិភាក្សាលើរបៀបវារៈចំនួន៩ រួមមាន៖ ១. អនុម័តតាមរបៀបវារៈ ២.ការរៀបចំធុរកិច្ច ៣.ការរៀបចំផែនទីបង្ហាញផ្លូវនៃការធ្វើជាប្រធាន ACCSM រយៈពេល ២ឆ្នាំ របស់ព្រះរាជាណាចក្រកម្ពុជា ៤.របាយការណ៍នៃកិច្ចការប្រជុំត្រៀមសម្រាប់កិច្ចប្រជុំ ACCSM លើកទី២៣ ៥.ការធ្វើបច្ចុប្បន្នភាពលើសេចក្ដីសម្រេចពាក់ព័ន្ធនានា នៅក្នុងកិច្ចប្រជុំអាស៊ានដទៃទៀត ៦. ការធ្វើបច្ចុប្បន្នភាពអំពីវឌ្ឍនភាពនៃបណ្តាញគ្រឹះស្ថានបណ្ដុះបណ្ដាលមុខងារសាធារណៈអាស៊ាន (PSTI) ៧. ការពិភាក្សាលើសេចក្តីប្រកាសរបស់អាស៊ានស្តីពីត្រៀមលក្ខណៈសម្រាប់អនាគតលើវិស័យមុខងារសាធារណៈ ៨. ការពិភាក្សាលើប្រធានបទផ្សេងៗ និង៩. ការពិភាក្សា និងអនុម័តលើរបាយការណ៍នៃកិច្ចប្រជុំមន្ត្រីជាន់ខ្ពស់ ACCSM លើកទី២៣ ប្រកបដោយលទ្ធផលផ្លែផ្កាតាមការគ្រោងទុក។

សូមជម្រាបថា បន្ទាប់ពីកិច្ចប្រជុំព្រឹកថ្ងៃទីពីរ គណ:ប្រតិភូមន្ត្រីជាន់ខ្ពស់អាស៊ាននឹងចូលរួមដំណើរទស្សនកិច្ចទៅកាន់តំបន់ទេសចរណ៍តំបន់កោះក្នុងខេត្តព្រះសីហនុ (កោះរ៉ុង) ដែលជាកោះដ៏ស្រស់ស្អាតមួយក្នុងចំណោមកោះដ៏ស្រស់ស្អាតជាច្រើនទៀតនៅលើទឹកដីនៃខេត្តព្រះសីហនុ៕

ដោយ ងូ សុមុនី