AKP ភ្នំពេញ ថ្ងៃទី២០ ខែឧសភា ឆ្នាំ២០២៥ -- គណ:ប្រតិភូក្រុមសភាជាតិកម្ពុជានៃអ្នកនយោបាយសភាស្រ្តីដឹកនាំដោយលោកជំទាវ ឡោក ខេង ប្រធានគណ:កម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា និងជាប្រធានក្រុមសភាជាតិកម្ពុជា នៃអ្នកនយោបាយសភាស្រ្តី បានអញ្ជើញចុះជួបសំណេះសំណាលជាមួយបងប្អូនប្រជានេសាទជាស្រ្តីនៅសហគមន៍នេសាទកោះគ្រឹះស្នាលក ស្ថិតក្នុងភូមិកោះគ្រឹះស្នា និងភូមិលក ឃុំឫស្សីស្រុកខាងលិច ស្រុកកំពុងត្រាច ខេត្តកំពតនាព្រឹកថ្ងៃទី២០ ខែឧសភា ឆ្នាំ២០២៥។

ក្នុងឱកាសនោះលោកជំទាវ ឡោក ខេង បានមានប្រសាសន៍ថា គោលបំណងដែលគណ:ប្រតិភូគណ:កម្មការទី៨ នៃរដ្ឋសភា និងក្រុមសភាជាតិកម្ពុជា នៃអ្នកនយោបាយសភាស្ត្រីចុះមកជួបសំណេះសំណាលជាមួយប្រជានេសាទជាស្ត្រីក្នុងពេលនេះគឺដើម្បីស្វែងយល់ពីភាពខ្វះខាត ទុក្ខកង្វល់នានា ព្រមទាំងការប្រកបរបរនេសាទដើម្បីផ្គត់ផ្គង់ជីវភាពប្រចាំថ្ងៃរបស់បងប្អូនខ្មែរប្រជានេសាទ ជាពិសេសចង់ដឹងនូវការសំណូមពររបស់បងប្អូនប្រជានេសាទ ដើម្បីឱ្យក្រុមតំណាងរាស្ត្រជាស្ត្រីជួយរកមធ្យោបាយធ្វើការដោះស្រាយជូនឱ្យទាន់ពេលវេលា និងត្រូវចំតម្រូវការចាំបាច់របស់ប្អូនប្រជានេសាទជាស្ត្រី។

ក្នុងរបាយការណ៍សា្វគមន៍របស់ លោក អូន ខន អភិបាលនៃគណៈអភិបាលស្រុកំពង់ត្រាច បានឱ្យដឹងថា សហគមន៍នេសាទកោះគ្រឹះស្នាបានបង្កើតឡើងនៅឆ្នាំ២០០៣ ហើយគិតមកត្រឹមឆ្នាំ២០២៣ សហគមន៍នេសាទកោះគ្រិះស្នា ឋិតនៅក្នុងភូមិសាស្ត្រតំបន់លក មានផ្ទៃដីសម្រាប់ធ្វើអាជីវកម្មនេសាទបែបធម្មជាតិមានចំនួន: ៥៦៣ហិកតា។ ក្នុងនោះផ្ទៃដីព្រៃកោងកាងចំនួន៨៩ ហិកតា ផ្ទៃដីតំបន់នេសាទទឹករាក់ចំនួន ៣៦៧ ហិកតា ផ្ទៃដីតំបន់អភិរក្សចំនួន ៧០ហិកតា និងតំបន់វាលភក់ចំនួន ៣៧ហិកតា និងមានគណៈកម្មាធិការសហគមន៍ចំនួន ១១នាក់ ស្រីចំនួន០២នាក់ និងប្រជានេសាទជាសមាជិក សមាជិកាចំនួន ៤៣០ គ្រួសារ ដែលប្រកបមុខរបរទូកអូស ទូកដាក់លបក្តាម ដាក់មងត្រី រាវក្រែង រាវងាវ និងរើសសារ៉ាយនេសាទ តាមបែបធម្មជាតិនៅតំបន់នោះ។ល។

លោកអភិបាលស្រុកបន្តថាតាមការចង្អុលបង្ហាញរបស់ឯកឧត្តមបណ្ឌិត ម៉ៅ ធនិន អភិបាល នៃគណ:អភិបាលខេត្តកំពត ក៏ដូចជាស្របតាមយុទ្ធបញ្ចកោណដំណាក់កាលទី១របស់រាជរដ្ឋាភិបាលដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា គឺបានយកចិត្តទុកដាក់លើសុខទុក្ខរបស់បងប្អូនប្រជាពលរដ្ឋគ្រប់ពេលវេលាដើម្បីឆ្លើយតបឱ្យបានឆាប់រហ័សនូវការផ្តល់សេវាសាធារណ:ជូនបងប្អូនទាន់សភាពការណ៍ ជាពិសេសអាជ្ញាធរខេត្ត ក្រុង ស្រុក ក៏បានបង្ករលក្ខណ:ជូនបងប្អូនក្នុងសហគមន៍នេសាទឱ្យមានភាពងាយស្រួលក្នុងប្រកបរបរការនេសាទសម្រាប់ផ្គត់ផ្គង់ជីវភាពប្រចាំថ្ងៃ រីឯបញ្ហាប្រឈមនៅក្នុងស្រុកកំពង់ត្រាច ជាពិសេសក្នុងសហគមន៍នេសាទ គឺនៅមានបទល្មើសនេសាទខុសច្បាប់ក្រៅសហគមន៍ចំនួនតិចតួច។ ក្រៅពីនេះ ស្រ្តីជាប្រជានេសាទក៏បានលើកឡើងពីបញ្ហាប្រឈមមួយចំនួនដែលមិនអាចឱ្យខ្លួនជាប់ឆ្នោតនៅក្នុងគណៈកម្មការសហគមន៍នេសាទ ទាក់ទងនឹងសមត្ថភាពនៅក្នុងការដឹកនាំ ការទទួលបានវគ្គបណ្តុះបណ្តាលនានា ការចំណាយពេលវេលាច្រើនលើការងារផ្ទះ និងស្ថានភាពជីវភាពគ្រួសារជាដើម។

លោកជំទាវ ឡោក ខេង ប្រធានគណ:ប្រតិភូ បានវាយតំលៃខ្ពស់ចំពោះការខិតខំរបស់អជ្ញាធរស្រុកដែលបានយកចិត្តទុកដាក់លើសុខទុក្ខរបស់បងប្អូនប្រជាពលរដ្ឋនៅក្នុងសហគមន៍នេសាទ ជាពិសេសយកចិត្តទុកដាក់លើបញ្ហាស្រ្តីឱ្យពួកគាត់មានភាពក្លាហានក្នុងការចូលរួមគិតគូនិងដើរតួនាទីជាអ្នកដឹកនាំនៅក្នុងសហគមន៍ឱ្យបានច្រើនដើម្បីរួមចំណែកថែរក្សាសម្បត្តិធម្មជាតិដូចជាព្រៃកោងកាងនៅក្នុងសហគមន៍ ជាពិសេសជំរុញ និងលើកទឹកចិត្តដល់ស្រ្តីឱ្យចូលរួមក្រកួតប្រជែងឱ្យបានច្រើនតាមរយ:ការប្រកួតប្រជែងបោះឆ្នោតជ្រើសរើសអ្នកដឹកនាំនៅក្នុងសហគមន៍។
បន្ទាប់ពីកិច្ចសំណេះសំណាលរួច លោកជំទាវ ឡោក ខេង ព្រមទាំងឯកឧត្តម លោកជំទាវ សមាជិកគណៈប្រតិភូក៏បាននាំយកនូវអំណោយរបស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ចែកជូនបងប្អូនប្រជានេសាទជាស្រ្តីរបស់សហគមន៍ ដែលបានចូលរួមនាឱកាសនោះមានចំនួន ៦០គ្រួសារ ក្នុងមួយគ្រួសារទទួលបានក្រម៉ាមួយទុកជាអនុស្សាវរីយ៍ផងដែរ ៕ដោយ៖ ប៊ុនរិទ្ធ