AKP ភ្នំពេញ ថ្ងៃទី២០ ខែឧសភា ឆ្នាំ២០២៥ -- “ខ្ញុំសូមបងប្អូនប្រជាពលរដ្ឋ ជាពិសេសជនវ័យចាស់ ចាស់ជរា អ្នកមានជំងឺប្រចាំកាយ និងអ្នកដែលមានប្រព័ន្ធការពារខ្សោយ សូមទៅចាក់វ៉ាក់សាំងកូវដ-១៩ ភីហ្វាយហ្សឺ (Pfizer) ចាប់ពីពេលនេះទៅ ដើម្បីការពារជាមុននូវភាពឈឺធ្ងន់ធ្ងរបណ្តាលមកពីវីរុសកូវីដ-១៩ បំប្លែងថ្មី ជាពិសេសប្រភេទ ពពួកជេអ៊ិន.១ (JN.1)”។ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានអំពាវនាវដូច្នេះ តាមរយៈទីភ្នាក់ងារសារព័ត៌មានកម្ពុជា (AKP) នាព្រឹកថ្ងៃទី២០ ខែឧសភា ឆ្នាំ២០២៥។

លោកជំទាវវេជ្ជបណ្ឌិត បានបន្ថែមថា វីរុសកូវីដ-១៩ បំប្លែងថ្មី ពពួកជេអ៊ិន.១ (JN.1) និងប្រភេទផ្សេងទៀត បាននិងកំពុងតែចរាចរនៅតាមបណ្តាប្រទេសជិតខាង ក្នុងតំបន់ និងនៅលើសាកលលោក។ ដូច្នេះហើយ យើងទាំងអស់គ្នា ជាពិសេសក្រុមដែលមានហានិភ័យដូចរៀបរាប់ខាងលើ សូមទៅចាក់វ៉ាក់សាំងការងារនៅតាមមន្ទីរពេទ្យរដ្ឋ មន្ទីរពេទ្យបង្អែក និងមណ្ឌលសុខភាព នៅទីតាំងដែលបងប្អូនរស់នៅ ដោយមិនមានបង់ថ្លៃអ្វីទាំងអស់ ដើម្បីបង្ការមុននូវភាពឈឺធ្ងន់ធ្ងរពីវីរុសនេះ។

ជាមួយគ្នានេះ លោកជំទាវវេជ្ជបណ្ឌិត អំពាវនាវដល់បងប្អូនប្រជាពលរដ្ឋទាំងអស់ ត្រូវបង្កើនការយកចិត្តទុកដាក់ និងប្រុងប្រយ័ត្នខ្ពស់ ការពារខ្លួនពីការឆ្លងវីរុសកូវីដ-១៩ ដែលអាចមានផលប៉ះពាល់សុខភាពដោយសារជំងឺកូវីដ-១៩ ដែលអាចឈានដល់ភាពធ្ងន់ធ្ងរ និងអាចស្លាប់បាត់បង់ជីវិតបានដែរនោះ។ ដូច្នេះសូមកុំភ្លេចវិធានការ “៣ ការពារ និង ៣ កុំ” រួមជាមួយនឹងការចាក់វ៉ាក់សាំងកូវីដ-១៩ ទើបអាចជួយកាត់បន្ថយជាអតិបរមា នូវភាពធ្ងន់ធ្ងរនៃជំងឺ ការចូលសម្រាកពេទ្យ និងការស្លាប់ ដូចដែលយើងទាំងអស់គ្នាឆ្លងកាត់បទពិសោធន៍ទទួលបានលទ្ធផលល្អនៅឆ្នាំ២០២១ ដល់ឆ្នាំ២០២២ ស្រាប់ហើយ។

លោកជំទាវបានបន្ថែមថា បច្ចុប្បន្ននេះកម្ពុជាមិនទាន់មានស្ថានភាពឆ្លងឡើងវិញនូវវីរុសកូវីដ-១៩ នៅឡើយទេ ប៉ុន្តែការ “ការពារប្រសើរជាងព្យាបាល” ជាជម្រើសដ៏ល្អប្រសើរបំផុត សម្រាប់យើងទាំងអស់គ្នា ហើយយើងក៏កំពុងផ្សព្វផ្សាយ និងជំរុញការអនុវត្តវិធានការការពារខ្លួនជាមុន នាពេលនេះផងដែរ៕

ដោយ ផែន រតនៈ