AKP ភ្នំពេញ ថ្ងៃទី២០ ខែឧសភា ឆ្នាំ២០២៥ -- នាយកដ្ឋានតម្រង់ទិសវិជ្ជាជីវៈ ក្រោមក្របខ័ណ្ឌនៃការអនុវត្តគម្រោងវិទ្យាសាស្ត្រ និងបច្ចេកវិទ្យា សម្រាប់ការអប់រំកម្រិតមធ្យមសិក្សាទុតិយភូមិ (STEP-UP) ចាប់ពីថ្ងៃទី១៦ ដល់ថ្ងៃទី១៩ ខែឧសភា ឆ្នាំ២០២៥ បានរៀបចំវគ្គបណ្ដុះបណ្ដាលវគ្គទី២ ស្ដីពី «ការអនុវត្តកម្មវិធីមគ្គុទ្ទេសក៍អាជីព និងការផ្ដល់ប្រឹក្សា និងសកម្មភាពភាពជាដៃគូរវាងរដ្ឋនិងឯកជន» នៅសាលាគរុកោសល្យ និងវិក្រឹតការខេត្តកំពត។

វគ្គបណ្ដុះបណ្ដាលនេះត្រូវបានរៀបចំឡើងដោយមានការចូលរួមពីថ្នាក់ដឹកនាំនាយកដ្ឋានតម្រង់ទិសវិជ្ជាជីវៈ ក្រុមការងារគ្រូឧទ្ទេសថ្នាក់ជាតិផ្នែក CGC និងសិក្ខាកាមចូលរួមសរុប ១១២នាក់។ គោលបំណងនៃការរៀបចំវគ្គបណ្ដុះបណ្ដាលនេះជាការអភិវឌ្ឍសមត្ថភាពគណៈគ្រប់គ្រង និងបុគ្គលិកអប់រំនៃវិទ្យាល័យគោលដៅ លើផ្នែកទ្រឹស្ដី ការដឹកនាំយន្ដការបច្ចេកទេស និងសកម្មភាពការងារនានា ក្នុងដំណើរការអនុវត្តកម្មវិធីមគ្គុទ្ទេសក៍អាជីពនិងការផ្ដល់ប្រឹក្សា និងសកម្មភាពភាពជាដៃគូរវាងរដ្ឋនិងឯកជន ក្នុងក្របខ័ណ្ឌគម្រោង STEP-UP សំដៅពង្រឹងសមត្ថភាពពេញលេញដល់ប្រតិបត្តិករនៅតាមសាលារៀន ។

គួររំលឹកផងដែរថា ផ្អែកតាមផែនការប្រតិបត្តិឆ្នាំ២០២៥ របស់គម្រោង STET-UP នាយកដ្ឋានតម្រង់ទិសវិជ្ជាជីវៈនឹងត្រូវអនុវត្តកម្មវិធីមគ្គុទ្ទេសក៍អាជីពនិងការផ្ដល់ប្រឹក្សា និងសកម្មភាពភាពជាដៃគូរវាងរដ្ឋនិងឯកជន នៅតាមវិទ្យាល័យធនធានចំនួន៥០ បន្ដពីគម្រោង USESDP2 និងពង្រីកទៅកាន់វិទ្យាល័យគោលដៅថ្មីរបស់គម្រោងចំនួន ៥០ រួមមាន វិទ្យាល័យធនធានចិន ៧ វិទ្យាចំណេះទូទៅនិងបច្ចេកទេស ៤ និងវិទ្យាល័យបណ្ដាញ ៣៩។ វគ្គបណ្ដុះបណ្ដាលនេះ នឹងត្រូវរៀបចំឡើងជាស៊េរីចំនួន០៣វគ្គ ស្មើនឹង ៦ក្រេឌីត៕

ដោយ  ណយ នឿន (ប្រភព៖ នាយកដ្ឋានតម្រង់ទិសវិជ្ជាជីវៈ)