AKP ភ្នំពេញ ថ្ងៃទី២០ ខែឧសភា ឆ្នាំ២០២៥-- កងទ័ពកម្ពុជា-ឡាវ ប្តេជ្ញាបន្តពង្រឹងកិច្ចសហប្រតិបត្តិការរក្សាសន្តិសុខ រៀបរយតាមបណ្តោយព្រំដែន រវាងប្រទេសទាំងពីរ ជាព្រំដែនសន្តិភាព និងការអភិវឌ្ឍសេដ្ឋកិច្ចរីកចម្រើន។ នេះបើយោងតាមកំណត់ហេតុនៃកិច្ចប្រជុំលើកទី៣របស់គណៈកម្មការកិច្ចសហប្រតិបត្តិការរក្សាសន្តិសុខ រៀបរយតាមបណ្តោយព្រំដែននៃប្រទេសទាំងពីរ ប្រចាំឆ្នាំ២០២៥ នៅទីក្រុងប៉ាកសេ ខេត្តចាំប៉ាសាក់ សាធារណរដ្ឋប្រជាធិបតេយ្យប្រជាមានិតឡាវ កាលពីព្រឹកថ្ងៃទី១៩ ខែឧសភា ឆ្នាំ២០២៥។

ឆ្នាំ២០២៥នេះ ឡាវត្រូវធ្វើជាម្ចាស់ផ្ទះនៃកិច្ចប្រជុំ និងទទួលបានការអនុញ្ញាតពីរដ្ឋមន្ត្រីក្រសួងការពារប្រទេសនៃភាគីទាំងពីរ កាលពីថ្ងៃទី១៩ ខែឧសភា ឆ្នាំ២០២៥ នៅទីក្រុងប៉ាកសេ ខេត្តចំប៉ាសាក់ សាធារណរដ្ឋប្រជាធិបតេយ្យប្រជាមានិតឡាវ គណៈកម្មការកិច្ចសហប្រតិបត្តិការរក្សាសន្តិសុខ រៀបរយតាមបណ្តោយព្រំដែនឡាវ-កម្ពុជា កម្ពុជា-ឡាវបានរៀបចំកិច្ចប្រជុំជាផ្លូវការលើកទី៣ របស់ខ្លួនទៅតាមការគ្រោងទុក ដោយភាគីឡាវធ្វើជាម្ចាស់ផ្ទះនៃកិច្ចប្រជុំលើកនេះ។ ក្នុងកិច្ចប្រជុំ ភាគីឡាវដឹកនាំដោយ ឯកឧត្តម ឧត្តមសេនីយ៍ទោ វ៉ាន់ថង ប៊ុតតាក់វង្ស អនុប្រធានអគ្គសេនាធិការ កងទ័ពប្រជាជនឡាវ និងជាប្រធានគណៈកម្មការ កិច្ចសហប្រតិបត្តិការរក្សាសន្តិសុខ រៀបរយតាមបណ្តោយព្រំដែន ឡាវ-កម្ពុជា និងសមាជិក និងភាគីកម្ពុជា ដឹកនាំដោយ ឯកឧត្តម នាយឧត្តមសេនីយ៍ ឥត សារ៉ាត់ អគ្គមេបញ្ជាការង នាយសេនាធិការចម្រុះ នៃកងយោធពលខេមរភូមិន្ទ និងជាប្រធានគណៈកម្មការកិច្ចសហប្រតិបត្តិការរក្សាសន្តិសុខ រៀបរយតាមបណ្តោយព្រំដែន កម្ពុជា-ឡាវ និងសមាជិកមកពីស្ថាប័នជំនាញពាក់ព័ន្ធជាច្រើនរូបផងដែរ។

ក្នុងរយៈពេល១ឆ្នាំកន្លងមក គណៈកម្មការជំនាញប្រទេសទាំងពីរបានពិនិត្យឃើញថា ទទួលបានលទ្ធផលល្អ និងបានពិភាក្សាផែនការបន្តរៀបចំអនុវត្តយន្តការដែលពាក់ព័ន្ធ ក្នុងការសហការរបស់គណៈកម្មការកិច្ចសហប្រតិបត្តិការរក្សាសន្តិសុខ រៀបរយតាមបណ្តោយព្រំដែនឡាវ-កម្ពុជា កម្ពុជា-ឡាវ ដែលភាគីទាំងពីរបានឯកភាពរួមគ្នាបន្ត និងពង្រឹងកិច្ចសហការក្នុងការថែរក្សាការពារសន្តិសុខ តាមបណ្តោយព្រំដែននៃប្រទេសទាំងពីរឱ្យក្លាយជាព្រំដែនសន្តិភាព បញ្ចៀសឱ្យបានរាល់ការប៉ះទង្គិចគ្នាដោយអាវុធ រក្សាឱ្យបាននូវសន្តិសុខ សុវត្ថិភាពតាមបណ្តោយព្រំដែន។ កងទ័ពនៃប្រទេសទាំងពីរដែលឈរជើងតាមបណ្តោយព្រំដែន ត្រូវសហការជាមួយសមត្ថកិច្ច និងស្ថាប័នដែលមានការពាក់ព័ន្ធនៃប្រទេសទាំងពីរ ក្នុងការទប់ស្កាត់បទល្មើសឧក្រិដ្ឋកម្មឆ្លងដែន ដូចជា អំពើភេរវកម្ម ការជួញដូរមនុស្ស ការជួញដូរគ្រឿងញៀន ការជួញដូរអាវុធយុទ្ធភ័ណ្ឌ ការជួញដូរវត្ថុបុរាណ ការកាប់បំផ្លាញព្រៃឈើ ការរុករកសម្បត្តិធម្មជាតិខុសច្បាប់ ការបរបាញ់សត្វព្រៃ និងបទល្មើសនានា ដែលផ្ទុយពីរដ្ឋច្បាប់របស់រដ្ឋបាលនៃប្រទេសទាំងពីរ។ល។ ជាមួយគ្នានេះដែរ ភាគីទាំងពីរក៏បានជំរុញ បន្តឱ្យកងកម្លាំងការពារព្រំដែនរបស់ប្រទេសទាំង២ ឱ្យមានការទំនាក់ទំនងការងារដ៏ល្អជាមួយគ្នា ជួបប្រជុំផ្លាស់ប្តូរព័ត៌មាន និងដោះស្រាយជាមួយគ្នារាល់បញ្ហាសន្តិសុខ តាមបណ្តោយព្រំដែនដោយសន្តិវិធី ត្រូវរាយការណ៍ និងសុំគោលការណ៍ពីថ្នាក់លើ ព្រមទាំងចូលរួមទប់ស្កាត់រាល់ការឃោសនារបស់ពួកអមិត្ត ដែលញុះញុងឱ្យមានអំពើហិង្សា ក្នុងគោលបំណងបំបែកបំបាក់សាមគ្គីភាព មិត្តភាពរបស់ប្រជាជន និងកងទ័ពនៃប្រទេសទាំងពីរ ឡាវ-កម្ពុជា កម្ពុជា-ឡាវ។

ភាគីទាំងពីរបានឯកភាពគ្នាឱ្យមានការរៀបចំកិច្ចប្រជុំរួមគ្នាមួយឆ្នាំម្តងជាប្រក្រតី រវាងកងកម្លាំងកងពលថ្មើរជើងទី៥ កងទ័ពប្រជាជនឡាវ ជាមួយកងពលតូចលេខ៩នៃកងយោធពលខេមរភូមិន្ទ បញ្ជាការដ្ឋានយោធាខេត្តចំប៉ាសាក់ (ឡាវ) ជាមួយតំបន់ប្រតិបត្តិការសឹករងព្រះវិហារ(កម្ពុជា) បញ្ជាការដ្ឋានយោធាខេត្តចំប៉ាសាក់ (ឡាវ) ជាមួយតំបន់ប្រតិបត្តិការសឹករងស្ទឹងត្រែង(កម្ពុជា) បញ្ជាការដ្ឋានយោធាខេត្តអាត់តាក់ពី(ឡាវ) ជាមួយតំបន់ប្រតិបត្តិការសឹករងរតនគីរី(កម្ពុជា)។ ក្នុងករណីមានហេតុការណ៍កើតឡើងនៅកន្លែងណា ត្រូវដោះស្រាយបញ្ហានៅកន្លែងនោះ។ បន្ត និងពង្រឹងកិច្ចសហការជាមួយអាជ្ញារធរមូលដ្ឋាន និងមន្ត្រីពាក់ព័ន្ធក្នុងការអប់រំប្រជាពលរដ្ឋ ដែលរស់នៅតាមបណ្តោយព្រំដែន ឱ្យបានយល់ដឹងអំពីច្បាប់ និងសេចក្តីកំណត់ផ្សេងៗរបស់ប្រទេសទាំងពីរ ជៀសវាងការប្រព្រឹត្តិអំពើល្មើសច្បាប់ និងសកម្មភាពដែលធ្វើឱ្យប៉ះពាល់ដល់សន្តិសុខ សុវត្ថិភាព តាមបណ្តោយព្រំដែន។ បន្តគាំទ្រឱ្យគណៈកម្មាធិការព្រំដែនឡាវ-កម្ពុជា កម្ពុជា-ឡាវ (JBC) អនុវត្តតាមតួនាទីរបស់ខ្លួន។ បន្តឱ្យមានការរៀបចំកិច្ចប្រជុំគណៈកម្មការកិច្ចសហប្រតិបត្តិការរក្សាសន្តិសុខ រៀបរយតាមបណ្តោយព្រំដែននៃប្រទេសទាំងពីរ តាមផែនការដែលបានឯកភាពរួមគ្នាកន្លងមក ដោយផ្លាស់ប្តូរគ្នាធ្វើជាម្ចាស់ផ្ទះ មួយឆ្នាំម្តង និងកំណត់សមាសភាពចូលរួមភាគីនីមួយៗមិនលើសពី២៥រូប។

ទន្ទឹមនឹងនេះ ភាគីទាំងពីរបានឯកភាពគ្នារក្សាគោលការណ៍សន្តិភាព មិត្តភាព សាមគ្គីភាព និងកិច្ចសហប្រតិបត្តិការតាមបណ្តោយព្រំដែនប្រទេសទាំងពីរ។ រាល់បញ្ហាសន្តិសុខដែលកើតឡើងត្រូវរួមគ្នាដោះស្រាយដោយសន្តិវិធី និងត្រូវគោរពអធិបតេយ្យភាពទៅវិញទៅមក។ បន្តគាំទ្រ និងលើកកម្ពស់ក្នុងការពង្រឹងសាមគ្គីភាព មិត្តភាពក្នុងនាមជាអ្នកភូមិផងរបងតែមួយ និងអ្នកជិតខាងល្អ ជាពិសេសបណ្តាអង្គភាពដែលឈរជើងតាមបណ្តោយព្រំដែនត្រូវធ្វើការទាក់ទងគ្នាឱ្យបានល្អ និងជាប្រចាំ ផ្លាស់ប្តូរព័ត៌មានទាន់ សភាពការណ៍ និងបង្កើតឱ្យមានកម្មវិធីសិល្បៈ កម្សាន្ត វប្បធម៌ និងកីឡាជាមួយគ្នាទៅវិញទៅមក។ បន្តអនុវត្តតាមពិធីសារ កិច្ចសហប្រតិបត្តិការរវាងក្រសួងការពារជាតិនៃព្រះរាជាណាចក្រកម្ពុជា និងក្រសួងការពារប្រទេសនៃសាធារណរដ្ឋប្រជាធិបតេយ្យប្រជាមានិតឡាវ កាលពីថ្ងៃទី១៤ ខែកញ្ញា ឆ្នាំ២០២២ នៅរដ្ឋធានីវៀងចន្ទន៍នៃសាធារណរដ្ឋប្រជាធិបតេយ្យប្រជាមានិតឡាវ ឱ្យទទួលបានជោគជ័យ៕

ដោយ សំ សាម៉ន (ប្រភព៖ ក្រសួងការពារជាតិ)