AKP កំពង់ស្ពឺ ថ្ងៃទី២០ ខែឧសភា ឆ្នាំ២០២៥–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបានគូសបញ្ជាក់ថា អត្ថន័យនៃការសម្ពោធសមិទ្ធផលថ្ងៃនេះគឺវាភ្ជាប់ទៅនឹងទិវាប្រវត្តិសាស្ត្ររបស់យើង ហើយថាតើយើងចាំបាច់ត្រូវរំលឹកដែរទេនូវអ្វីដែលបានកន្លងហួសទៅហើយ តើយើងនៅតែជាប់ផុងជាមួយនឹងអតីតកាល ដោយមិនវិវត្តន៍ដែរទេ «គឺអត់ទេ» យើងនៅតែដើរទៅមុខ ប៉ុន្តែយើងក៏មិនត្រូវភ្លេចនូវអតីតកាលដ៏ឈឺចាប់របស់យើងផងដែរ ដែលថ្ងៃនេះ(២០ ឧសភា) គឺជាថ្ងៃនៃទិវានៃការរំលឹកទៅដល់ប្រជាពលរដ្ឋដែលបានស្លាប់នៅក្នុងរបបប្រល័យពូជសាសន៍ ប៉ុន្តែក៏ជាទិវាដែលយើងត្រូវតែចងចាំថាមូលហេតុអ្វីបានជាមានរបបខ្មែរក្រហម។ ការលើកឡើងរបស់សម្តេចធិបតីនាយករដ្ឋមន្ត្រីយ៉ាងដូច្នេះ ក្នុងពិធីសម្ពោធបើកឱ្យដំណើរជាផ្លូវការរោងចក្រផលិតស៊ីម៉ង់ត៍របស់ក្រុមហ៊ុន ខនស៍ ខេធី ស៊ីមេន (ភ្នំពេញ) ឯ.ក នៅស្រុកឱរ៉ាល់ ខេត្តកំពង់ស្ពឺ ព្រឹកថ្ងៃទី២០ ខែឧសភា ឆ្នាំ២០២៥។

សម្តេចមហាបវរធិបតីមានប្រសាសន៍ថា នៅទីនេះ! នៅថ្ងៃនេះ! សម្តេចគិតថាវាមានអត្ថន័យសំខាន់ សម្រាប់យើងព្រោះវាចំថ្ងៃដែលយើងនឹកដល់អតីតកាលដ៏សែនឈឺចាប់ ដែលត្រូវរំលឹកដើម្បីកុំឱ្យឈានទៅដល់ការបែកបាក់ ដែលការឈឺចាប់វាបណ្តាលមកពីការបែកបាក់ជាតិក្រោមរូបភាពនៃការប្រឆាំងអំពើពុករលួយ ប្រឆាំងយួន ប្រឆាំងការដឹកនាំរបស់សម្តេចព្រះនរោត្តម សីហនុ ចោទថាព្រះអង្គក្បត់ជាតិ ដោយឱ្យយៀកកុងចូលស្រុក ហើយបានធ្វើរដ្ឋប្រហារនៅថ្ងៃ១៨ មីនា ១៩៧០ ក្រោមការសម្រេចចិត្តតែមួយភ្លែតប៉ុណ្ណោះ ប៉ុន្តែធ្វើឱ្យស្លាប់ជីវិតមនុស្សរាប់លាននាក់ ហើយរយៈពេលជិត៣០ឆ្នាំទើបអាចបញ្ចប់សង្គ្រាមបាន។ អ៊ីចឹងយើងត្រូវតែចងចាំរឿងនេះឱ្យជាប់ដើម្បីកុំឱ្យមានការបែកបាក់ មានការកាប់សម្លាប់តទៅទៀត យើងត្រូវរួមគ្នាក្នុងការថែរក្សាសន្តិភាពឱ្យបានជាដាច់ខាត ដោយសម្តេចនាយករដ្ឋមន្ត្រីបាន គូសបញ្ជាក់ថា ពិតណាស់ ប្រសិនបើគ្មានការបញ្ចប់សង្គ្រាម គ្មានការធ្វើសមាហរណកម្មកងកម្លាំងច្បាំង គ្នានោះទេ យើងពិតជាគ្មានសន្តិភាព គ្មានការអភិវឌ្ឍនោះទេ។

យកឱកាសនេះប្រមុខរាជរដ្ឋាភិបាល សម្តេចមហាបវរធិបតី ហ៊ុន ម៉ាណែត បានថ្លែងអំណរគុណយ៉ាងជ្រាលជ្រៅជូនចំពោះក្រុមហ៊ុន ខនស៍ ខេធី ស៊ីមេន (ភ្នំពេញ) ឯ.ក និងក្រុមហ៊ុនដៃគូ ដែលបានសម្រេចចិត្តក្នុងការបោះទុនវិនិយោគប្រមាណ២៥០លានដុល្លារអាម៉េរិក បង្កើតរោងចក្រផលិតស៊ីម៉ង់ត៍នៅក្នុងស្រុកឱរ៉ាល់ ខេត្តកំពង់ស្ពឺនេះ ដែលវាមានសមត្ថភាពក្នុងការផលិតស៊ីម៉ង់ត៍បានប្រមាណ២,២លានតោនក្នុង១ឆ្នាំ និងអាចផ្តល់ការងារដោយផ្ទាល់ចំនួនប្រមាណ៤៥០កន្លែងដល់ប្រជាពលរដ្ឋ ជាពិសេសបងប្អូនប្រជាពលរដ្ឋនៅក្នុងមូលដ្ឋានស្រុកឱរ៉ាល់នេះតែម្តង៕

ដោយ៖ ចាន់ សុភឿន