AKP បន្ទាយមានជ័យ ថ្ងៃទី១៦ ខែឧសភា ឆ្នាំ២០២៥-- 

លេខាធិការដ្ឋានរៀបចំការបោះឆ្នោតខេត្តបន្ទាយមានជ័យសហការជាមួយអាជ្ញាធរខេត្ត នាព្រឹកថ្ងៃសុក្រ ទី១៦ ខែឧសភា ឆ្នាំ២០២៥នៅ សាលប្រជុំសាលាគរុកោសល្យ និងវិក្រឹតការខេត្តបន្ទាយមានជ័យ បានរៀបចំកិច្ចប្រជុំដ៏សំខាន់មួយ ស្តីពីកិច្ចសហការ និងវិធានការការពារសន្តិសុខ សុវត្ថិភាព និងសណ្តាប់ធ្នាប់ សម្រាប់ការពិនិត្យ បញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ ដោយមានវត្តមានរបស់លោក ហ៊ឹល រ៉ាយ៉ា អភិបាលរងខេត្ត ដែលជាតំណាងដ៏ខ្ពង់ខ្ពស់របស់ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និងលោក យ៉ង់ សក្តិ ប្រធានលេខាធិការដ្ឋានរៀបចំការបោះឆ្នោតខេត្តបន្ទាយមានជ័យ ព្រមទាំងមានការចូលរួមពីឯកឧត្តម ឡោក ប៊ុនពេជ្រ សមាជិកក្រុមប្រឹក្សាខេត្ត អភិបាលរងក្រុង-ស្រុក ថ្នាក់ដឹកនាំកងកម្លាំងប្រដាប់អាវុធគ្រប់ប្រភេទ និងប្រធានមន្ទីរអង្គភាពពាក់ព័ន្ធជាច្រើនរូបទៀត។

លោក ហ៊ឹល រ៉ាយ៉ា បានមានប្រសាសន៍បើកកិច្ចប្រជុំ ដោយបានគូសបញ្ជាក់អំពីសារៈសំខាន់នៃការបោះឆ្នោត ដែលជាសិទ្ធិ និងកាតព្វកិច្ចដ៏សំខាន់របស់ប្រជាពលរដ្ឋគ្រប់រូបក្នុងការចូលរួមសម្រេចជោគវាសនារបស់ប្រទេសជាតិ។ ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ គឺជាដំណាក់កាលដំបូងដ៏សំខាន់ ដើម្បីធានាបាននូវភាពត្រឹមត្រូវ តម្លាភាព និងយុត្តិធម៌នៃដំណើរការបោះឆ្នោតទាំងមូល។ ក្នុងន័យនេះ លោកអភិបាលរងខេត្តបានលើកឡើងនូវការប្តេជ្ញាចិត្តរបស់រដ្ឋបាលខេត្ត ក្នុងការសហការយ៉ាងជិតស្និទ្ធជាមួយគណៈកម្មាធិការជាតិរៀបចំការបោះឆ្នោត (គ.ជ.ប) និងស្ថាប័នពាក់ព័ន្ធទាំងអស់ ដើម្បីធានាថាដំណើរការនេះប្រព្រឹត្តទៅដោយរលូន ប្រកបដោយសន្តិសុខ សុវត្ថិភាព និងសណ្តាប់ធ្នាប់ល្អ។

ទន្ទឹមនឹងនេះ លោកអភិបាលរងបានជំរុញឱ្យអាជ្ញាធរក្រុង-ស្រុក កងកម្លាំងប្រដាប់អាវុធ និងមន្ទីរអង្គភាពពាក់ព័ន្ធ ត្រូវចាត់វិធានការចាំបាច់នានា ដើម្បីសម្រួលដល់ប្រជាពលរដ្ឋក្នុងការអញ្ជើញមកពិនិត្យបញ្ជីឈ្មោះ និងចុះឈ្មោះបោះឆ្នោត ដោយធានាថាមិនមានការរំខាន ឬការគំរាមកំហែងណាមួយកើតឡើង។

ជាមួយគ្នានេះដែរ លោក យ៉ង់ សក្តិ ប្រធានលេខាធិការដ្ឋានរៀបចំការបោះឆ្នោតខេត្តបន្ទាយមានជ័យ បានធ្វើបទបង្ហាញលម្អិតអំពីផែនការ និងនីតិវិធីនៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥។ លោកបានពន្យល់អំពីកាលបរិច្ឆេទសំខាន់ៗ ទីតាំងនៃការិយាល័យចុះឈ្មោះបោះឆ្នោត និងឯកសារដែលប្រជាពលរដ្ឋត្រូវយកមកជាមួយ។ គ.ជ.ប បានដាក់ចេញនូវគោលការណ៍ច្បាស់លាស់ ដើម្បីធានាបាននូវភាពត្រឹមត្រូវ និងតម្លាភាពនៃបញ្ជីឈ្មោះបោះឆ្នោត។ លោកបានស្នើឱ្យអាជ្ញាធរមូលដ្ឋាន និងកងកម្លាំងមានសមត្ថកិច្ច ត្រូវសហការក្នុងការផ្សព្វផ្សាយព័ត៌មាននេះឱ្យបានទូលំទូលាយដល់ប្រជាពលរដ្ឋនៅតាមមូលដ្ឋានរបស់ខ្លួន ដើម្បីឱ្យពួកគាត់បានយល់ដឹង និងចូលរួមក្នុងដំណើរការនេះឱ្យបានគ្រប់ៗគ្នា។

លើសពីនេះ លោក យ៉ង់ សក្តិ ក៏បានលើកឡើងអំពីសារៈសំខាន់នៃការធានាសន្តិសុខ និងសុវត្ថិភាពនៅតាមទីតាំងនៃការិយាល័យចុះឈ្មោះបោះឆ្នោត និងនៅជុំវិញបរិវេណនោះ ដើម្បីបង្កើតបរិយាកាសអំណោយផលដល់ប្រជាពលរដ្ឋក្នុងការបំពេញកាតព្វកិច្ចពលរដ្ឋរបស់ខ្លួនដោយសេរី និងដោយគ្មានការភ័យខ្លាច។

សូមជម្រាបថា កិច្ចប្រជុំបានប្រព្រឹត្តទៅក្នុងបរិយាកាសស្មារតីសហការ និងការយល់ដឹងខ្ពស់។ អ្នកចូលរួមទាំងអស់បានបង្ហាញនូវការប្តេជ្ញាចិត្តយ៉ាងមុតមាំក្នុងការអនុវត្តតាមការណែនាំ និងគោលការណ៍ដែលបានដាក់ចេញ ដើម្បីធានាបាននូវភាពជោគជ័យនៃដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ នៅខេត្តបន្ទាយមានជ័យ ប្រកបដោយសន្តិសុខ សុវត្ថិភាព និងសណ្តាប់ធ្នាប់ល្អ ដែលជាមូលដ្ឋានគ្រឹះដ៏សំខាន់សម្រាប់ដំណើរការបោះឆ្នោតជាតិប្រកបដោយគុណភាព និងភាពជឿជាក់នាពេលខាងមុខ៕

ដោយ ឈុន សារ៉ាត