AKP ភ្នំពេញ ថ្ងៃទី១៦ ខែឧសភា ឆ្នាំ២០២៥ -- អគ្គសេនាធិការចម្រុះ (JCS) បាននិយាយថា មន្ត្រីយោធាកំពូលកូរ៉េខាងត្បូងបានត្រួតពិនិត្យអង្គភាពទ័ពជើងទឹក និងបញ្ជាការនាវាមុជទឹកកាលពីថ្ងៃព្រហស្បតិ៍ ដោយជំរុញឱ្យមានការត្រៀមខ្លួនជាស្រេចរបស់កងទ័ពជើងទឹក ដើម្បីទប់ស្កាត់រាល់ការបង្កហេតុដោយប្រទេសកូរ៉េខាងជើង។

យោងតាម ​​JCS បានឱ្យដឹងថា ប្រធាន JCS លោក គីម យ៉ុងស៊ូ (Kim Myung-soo) បានធ្វើការសន្ទនាទូរស័ព្ទនៅពេលដែលលោកឡើងលើនាវាពិឃាត ROKS Jeongjo the Great ហើយបានទៅទស្សនកិច្ចបញ្ជាការកងកម្លាំងនាវាមុជទឹក បញ្ជាការមូលដ្ឋានទ័ពជើងទឹក Jinhae និងកងនាវាចរចម្បាំងពិសេសកងទ័ពជើងទឹកដែលមានមូលដ្ឋាននៅទីក្រុងជីនហេ ចម្ងាយប្រហែល ៣១០គីឡូម៉ែត្រភាគអាគ្នេយ៍នៃទីក្រុងសេអ៊ូល។

នៅពេលឡើងលើនាវាពិឃាត លោក គីម បានជំរុញឱ្យកងទ័ពស្គាល់ខ្លួនឯងជាមួយនឹងប្រព័ន្ធប្រយុទ្ធ និងឧបករណ៍របស់នាវាចម្បាំង ដើម្បីទប់ស្កាត់ និងឆ្លើយតបទុកជាមុនចំពោះការគំរាមកំហែងនុយក្លេអ៊ែរ និងមីស៊ីលរបស់ប្រទេសកូរ៉េខាងជើង។

នាវាពិឃាត Aegis មានទម្ងន់ ៨.២០០តោនដែលបំពាក់ដោយឧបករណ៍ស្ទាក់ចាប់ម៉ីស៊ីលកម្រិតខ្ពស់ត្រូវបានបញ្ជូនទៅកាន់កងទ័ពជើងទឹកកាលពីខែវិច្ឆិកាឆ្នាំមុន ហើយត្រូវបានគេរំពឹងថានឹងដាក់ពង្រាយនៅខែធ្នូ។ ខណៈពេលដែលទៅមើលបញ្ជាការកងកម្លាំងនាវាមុជទឹក លោក គីម បានណែនាំបញ្ជាឱ្យរក្សាជំហរត្រៀមខ្លួនយ៉ាងម៉ឺងម៉ាត់ប្រឆាំងនឹងការបង្កហេតុដ៏មានសក្តានុពលរបស់សត្រូវ។

JCS បាននិយាយថាជាផ្នែកមួយនៃដំណើរទស្សនកិច្ចនេះ លោក គីម ក៏បានធ្វើការហោះហើរបញ្ជានៅលើយន្តហោះស៊ើបការណ៍ដែនសមុទ្រ P-8A Poseidon ផងដែរ។

កងទ័ពជើងទឹកបានបញ្ចប់ការទិញយន្តហោះ P-8A ចំនួន ៦គ្រឿងរបស់ខ្លួនកាលពីឆ្នាំមុនជាមួយនឹងគោលបំណងដើម្បីដាក់ពង្រាយពួកវានៅឆ្នាំនេះ។ ត្រូវបានគេដាក់ឈ្មោះថា «ឃាតករនាវាមុជទឹក» យន្តហោះ P-8A មានសមត្ថភាពធ្វើបេសកកម្មជាច្រើន រួមទាំងប្រតិបត្តិការប្រឆាំងនាវាមុជទឹក ការប្រឆាំងលើផ្ទៃទឹក ការស៊ើបការណ៍សម្ងាត់ ការឃ្លាំមើល និងប្រតិបត្តិការឈ្លបយកការណ៍៕

ដោយ៖ មូល មិនា (ប្រភព៖ យ៉ុនហាប់)