AKP ភ្នំពេញ ថ្ងៃទី១៦ ខែឧសភា ឆ្នាំ២០២៥ -- គណៈប្រតិភូចិនដឹកនាំដោយ លោក លី ហុងហ្សុង (Li Hongzhong) អនុប្រធានគណៈកម្មាធិការអចិន្ត្រៃយ៍សភាប្រជាជនជាតិ (NPC) បានទៅបំពេញទស្សនកិច្ចនៅប្រទេសអូទ្រីស។

ក្នុងអំឡុងពេលស្នាក់នៅក្នុងរដ្ឋធានីវីយែនរបស់ប្រទេសអូទ្រីស លោក លី ដែលជាសមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន (CPC) បានចូលរួមក្នុងពិធីស្វាគមន៍សម្រាប់ការមកដល់នៃសត្វខ្លាឃ្មុំផេនដាយក្សមួយគូនៅក្នុងប្រទេសអូទ្រីស ជាមួយនឹងប្រធានាធិបតីអូទ្រីស លោក អាឡិចសាន់ដឺ វ៉ាន់ ដឺ ប៊ែលលេន (Alexander Van der Bellen) និងអធិការបតី លោក គ្រីស្ទាន ស្តុកគឺ (Christian Stocker) ។ លោក លី ក៏បានជួបពិភាក្សាដាច់ដោយឡែកជាមួយប្រធានក្រុមប្រឹក្សាជាតិនៃប្រទេសអូទ្រីស លោក វ៉ាល់ធឺ រ៉ូសេនក្រាន់ហ្ស៍ (Walter Rosenkranz) ប្រធានាធិបតីទីពីរ លោក ផេទឺ ហ៊ូបនឺ (Peter Haubner) និងប្រធានាធិបតីទីបី លោក ដូរីស ប៊ូរេស (Doris Bures) ។

លោក លី បាននិយាយថា ភាពជាដៃគូយុទ្ធសាស្ត្រមិត្តភាពចិន-អូទ្រីស បានរក្សាបាននូវការអភិវឌ្ឍយ៉ាងត្រឹមត្រូវ ក្រោមការដឹកនាំរបស់ប្រមុខរដ្ឋទាំងពីរ លោកបានបន្ថែមថា ជុំថ្មីនៃកិច្ចសហប្រតិបត្តិការអន្តរជាតិលើការការពារ និងស្រាវជ្រាវពីសត្វខ្លាឃ្មុំផេនដាយក្សបានឆ្លុះបញ្ចាំងពីលទ្ធផលនៃការផ្លាស់ប្តូររវាងប្រទេសទាំងពីរ។

លោក លី បាននិយាយថា ខណៈពេលដែលប្រកាន់ខ្ជាប់នូវគោលការណ៍នៃការគោរពគ្នាទៅវិញទៅមក និងស្មើភាពគ្នា ប្រទេសចិន និងអូទ្រីសគួរតែគិតគូរពីផលប្រយោជន៍ស្នូល និងកង្វល់សំខាន់ៗរបស់គ្នាទៅវិញទៅមក ហើយទាញយកសក្តានុពលសម្រាប់កិច្ចសហប្រតិបត្តិការ និងលើកកម្ពស់ផលប្រយោជន៍ទៅវិញទៅមក និងលទ្ធផលឈ្នះ-ឈ្នះ។

ភាគីអូទ្រីសបាននិយាយថា ប្រទេសអូទ្រីសគោរពទំនាក់ទំនងមិត្តភាពជាមួយប្រទេសចិន នឹងប្រកាន់យ៉ាងខ្ជាប់ខ្ជួននូវគោលការណ៍ចិនតែមួយ និងបន្តជំរុញកិច្ចសហប្រតិបត្តិការជាក់ស្តែង និងការផ្លាស់ប្តូររវាងស្ថាប័ននីតិប្បញ្ញត្តិទាំងពីរ៕

ដោយ៖ មូល មិនា (ប្រភព៖ ភីបផលដេលី)