AKP ភ្នំពេញ ថ្ងៃទី១៦ ខែឧសភា ឆ្នាំ២០២៥ -- ប៉ូលិសក្នុងតំបន់បាននិយាយថា យ៉ាងហោចណាស់មនុស្សម្នាក់បានស្លាប់ និង១២នាក់ផ្សេងទៀតបានរងរបួសនៅក្នុងការវាយប្រហារដោយគ្រាប់បែកដៃនៅក្នុងទីក្រុងកេតតា រដ្ឋធានីនៃខេត្តបាឡូជីស្ថាន ភាគនិរតីនៃប្រទេសប៉ាគីស្ថាន។

យោងតាមប៉ូលិសបានឱ្យដឹងថា ជនមិនស្គាល់មុខបានគប់គ្រាប់បែកដៃពីរគ្រាប់នៅក្នុងការជួបជុំអ្នកនយោបាយមួយនៅជិតផ្លូវ Munir Mengal នៃទីក្រុង។ ការ​ជួប​ជុំ​នេះ​ត្រូវ​បាន​ដឹក​នាំ​ដោយ ​លោក អាលី ម៉ាដាដ ជេតាកាក់ (Ali Madad Jtakak) សមាជិក​សភាខេត្តបាឡូជីស្ថាន និង​ជា​មេដឹកនាំ​គណបក្ស​ប្រជាជន​ប៉ាគីស្ថាន (PPP)។

កម្លាំងប៉ូលិស កម្លាំងសន្តិសុខ និងក្រុមជួយសង្គ្រោះ បានឆ្លើយតបភ្លាមៗទៅកាន់កន្លែងកើតហេតុ ហើយបានដឹកអ្នកស្លាប់ និងរបួសទៅកាន់មន្ទីរពេទ្យក្បែរនោះ។ ការ​វាយ​ប្រហារ​នេះ​បាន​បណ្តាល​ឱ្យ​ខូច​ខាត​មួយ​ផ្នែក​ដល់​រថយន្ត និង​រ៉ឺម៉ក​មួយ​គ្រឿង។

កម្លាំង​សន្តិសុខ​បាន​បិទ​តំបន់​នោះ ហើយ​បាន​ចាប់ផ្តើម​ស៊ើបអង្កេត និងធ្វើ​កោសល្យ​វិ​ច្ច័​យ​ដើម្បី​តាម​ដាន​ជនដៃដល់​។ មិនទាន់មានក្រុមណាមួយមកអះអាងទទួលខុសត្រូវចំពោះការវាយប្រហារនេះនៅឡើយទេ៕

ដោយ៖ មូល មិនា (ប្រភព៖ ស៊ីនហួ)