AKP ភ្នំពេញ ថ្ងៃទី១៦ ខែឧសភា ឆ្នាំ២០២៥--ការប្រកួតបាល់ទាត់ក្របខណ្ឌលីគកំពូលកម្ពុជានឹងឈានដល់សប្តាហ៍ទី៣២ នាចុងសប្តាហ៍នេះ ថ្ងៃទី១៧-១៨ ខែឧសភា ឆ្នាំ២០២៥ ដែលជាសប្តាហ៍ចុងក្រោយគេ ដើម្បីបញ្ចប់ការប្រកួតរដូវកាល ២០២៤-២០២៥ ដោយមាន៥ប្រកួត ខណៈដំណែងម្ចាស់ស្បែកជើងមាសនៅតែប្រកួតប្រជែងគ្នា ដោយមានកីឡាករ២ រូបគឺ DE ANORADE SOUZA RAMON របស់វិសាខា រកបាន ២០គ្រាប់ និងតាមពីក្រោយដោយកីឡាករ RAFAEL ANDRES NIETO RONDON របស់ភ្នំពេញក្រោនរកបាន ១៩គ្រាប់។

សម្រាប់៥ប្រកួតចុងក្រោយនៃ៦ក្រុមខាងលើ និង៥ក្រុមខាងក្រោម រួមមាន៖ ក្រុមទ័ព ប៉ះ ក្រសួងមហាផ្ទៃ ខណៈអាយអេសអាយដង្កោសែនជ័យ ត្រូវប្រជែងជាមួយក្រុមភ្ញៀវ ឡាយហ្វខេត្តព្រះសីហនុ។ ចំពោះ៣ប្រកួតទៀត នាថ្ងៃអាទិត្យ គឺក្រុមព្រះខ័នរាជស្វាយរៀង ដែលឈ្នះជើងឯកមុនបញ្ចប់រដូវកាល ត្រូវប្រជែងពិន្ទុជាមួយភ្នំពេញក្រោន ដែលកំពុងក្តោបក្តាប់ដំណែងចំណាត់ថ្នាក់លេខ២ ស្របពេលដែលវិសាខា ប៉ះអង្គរថាយហ្គឺរ រីឯ ណាហ្គាវើលត្រូវប៉ះជាមួយក្រុមបឹងកេត។ បើទោះបីជា ១ប្រកួតចុងក្រោយរបស់ក្រុមទាំង៣លើកំពូលតារាងមានលទ្ធផលបែបណា ក្តី ក៏មិនធ្វើឱ្យប៉ះពាល់ដល់ចំណាត់ថ្នាក់នៃ៣ក្រុមលើកំពូលតារាងឡើយ ក្នុងនោះព្រះខ័នរាជស្វាយរៀង លេខ១ មាន ៧៦ពិន្ទុ, ភ្នំពេញក្រោន លេខ២ មាន ៦៩ពិន្ទុ ខណៈវិសាខា ឈរលេខ៣ មាន៦២ពិន្ទុ (គិតត្រឹមសប្តាហ៍៣១)។

ងាកមកមើលកីឡាករ ដែលរកបានគ្រាប់បាល់ច្រើនជាងគេ ដើម្បីដណ្តើមស្បែកជើងមាស ប្រចាំរដូវកាលនេះ គឺគិតត្រឹមសប្ដាហ៍ទី៣១ កីឡាករ DE ANORADE SOUZA RAMON របស់វិសាខាទាត់ចូលទីគូប្រកួតបាន ២០គ្រាប់ ហើយប្រកួតចុងក្រោយនឹងត្រូវលេងជាមួយ អង្គរថាយហ្គឺរ។ រីឯកីឡាករ RAFAEL ANDRES NIETO RONDON របស់ភ្នំពេញក្រោន រកបាន ១៩គ្រាប់ ខណៈដែលប្រកួតបន្ទាប់ គឺភ្នំពេញក្រោនត្រូវជួបជាមួយម្ចាស់ជើងឯក ព្រះខ័នរាជស្វាយរៀង។ រង់ចាំមើលថាកីឡាករទាំង២ តើនរណាជាម្ចាស់ស្បែកជើងមាស។ 

ងាកមកមើលកីឡាករទាត់បញ្ជូលទីបានច្រើនជាងគេ ផ្នែកយុវជនខ្មែរដែលមានពានរង្វាន់ដោយឡែក១ផ្សេងទៀតដែរនោះ គឺក្នុងចំណោម ៨នាក់ គឺកីឡាករ សៀង ចន្ធា របស់ក្លឹបបឹងកេត ឈរលេខ១ រកបាន១៤គ្រាប់ កីឡាករ ម៉ាត់ នូរុណ របស់បឹងកេត ឈរលេខ២ រកបាន១០គ្រាប់ ខណៈកីឡាករ ញាន សុស៊ីដាន់ របស់ក្លឹបព្រះខ័នរាជស្វាយរៀង រកបាន១០គ្រាប់ដែរ ដែលតាមពីក្រោយដោយកីឡាករ ហាវ សុខនេត្រ របស់ក្រុមអាយអេសអាយដង្កោសែនជ័យ ៩គ្រាប់ និងស រតនា របស់វិសាខា រកបាន៨គ្រាប់។

គួរបញ្ជាក់ថា ពិធីប្រគល់ពានរង្វាន់ជម្រើសជើងឯកខេមបូឌានព្រីមៀរលីគ (CPL) រដូវកាល ២០២៤-២០២៥ គ្រោងនឹងធ្វើឡើងនៅលើកីឡដ្ឋានខេត្តស្វាយរៀង ក្រោយពីបញ្ចប់ការប្រកួតរវាងម្ចាស់ផ្ទះ ព្រះខ័នរាជស្វាយរៀង ជាមួយ ភ្នំពេញក្រោន នាថ្ងៃទី១៨ ខែឧសភា ឆ្នាំ២០២៥ តែម្ដង៕

ដោយ ហេង ណាលីន (រូបភាព៖ CPL)