AKP ម៉ុងហ្គោលីក្នុង ថ្ងៃទី១៤ ខែឧសភា ឆ្នាំ២០២៥ -- ក្រុមហ៊ុនជ្រលងភ្នំសុខភាពឆ្លាតវៃទំនើបយីលី (Yili) ដែលត្រូវបានប្រតិបត្តិការនៅក្នុងរដ្ឋធានី Hohhot ដែលជាជាបេះដូងនៃតំបន់ស្វយ័តម៉ុងហ្គោលីក្នុងនៅភាគខាងជើងនៃប្រទេសចិន ដែលបានធ្វើបដិវត្តន៍នៃការរួមបញ្ចូលគ្នារវាងទីក្រុង និងឧស្សាហកម្ម។ ក្រុមហ៊ុននេះផ្តោតសំខាន់ទៅលើការជំរុញការអភិវឌ្ឍខ្សែសង្វាក់ពេញលេញនៅក្នុងឧស្សាហកម្មទឹកដោះគោ ដោយប្រើប្រាស់នវានុវត្តន៍ឌីជីថលដ៏ទំនើបដើម្បីផ្តល់ការគាំទ្រដល់គំនិតផ្តួចផ្តើមទីក្រុងឆ្លាតវៃ។

កាលពីដើមសប្តាហ៍នេះ ក្រុមអ្នកសារព័ត៌មានអន្តរជាតិមកពី ២៣ប្រទេសនៃតំបន់អាស៊ីប៉ាស៊ីហ្វិកបានទៅទស្សនកិច្ចក្រុមហ៊ុនផលិតទឹកដោះគោជ្រលងភ្នំសុខភាពឆ្លាតវៃទំនើបយីលី ដែលត្រូវបានទទួលស្គាល់ថាជាក្រុមហ៊ុនផលិតទឹកដោះគោកំពូលទាំងប្រាំរបស់ពិភពលោក និងធំជាងគេនៅអាស៊ី។

ក្រុមហ៊ុនផលិតទឹកដោះគោជ្រលងភ្នំសុខភាពឆ្លាតវៃទំនើបយីលី គឺជាគម្រោងដ៏សំខាន់មួយនៅក្នុងទីក្រុង Hohhot ស្របតាមផែនការប្រាំឆ្នាំលើកទី១៤។ តំបន់អភិវឌ្ឍន៍ស្នូលរបស់វាគ្របដណ្តប់លើផ្ទៃដីទំហំ ៣៨គីឡូម៉ែត្រក្រឡា ជាមួយនឹងផ្ទៃដីសហការសរុប ១២០គីឡូម៉ែត្រក្រឡា។ ក្រុមហ៊ុននេះមានគោលបំណងជំរុញការអភិវឌ្ឍខ្សែសង្វាក់ពេញលេញដែលជំរុញដោយឧស្សាហកម្ម គាំទ្រដល់គំនិតផ្តួចផ្តើមទីក្រុងឆ្លាតវៃតាមរយៈនវានវុត្តន៍ឌីជីថល និងដឹកនាំការរួមបញ្ចូលឧស្សាហកម្ម និងទីក្រុងជាមួយនឹងគំនិតផ្តួចផ្តើមបៃតង ដើម្បីដឹកនាំក្នុងយុគសម័យថ្មីនៃការអភិវឌ្ឍទីក្រុង និងឧស្សាហកម្មដែលមានការរួមបញ្ចូលគ្នា។

ក្រុមអ្នកសារព័ត៌មានបានស្វែងយល់ស៊ីជម្រៅអំពីប្រវត្តិ និងអនាគតរបស់ក្រុមហ៊ុន បទពិសោធន៍នៃគំរូផលិតកម្មទឹកដោះគោទំនើបបំផុតរបស់ពិភពលោក និងបានឃើញភាពខ្លាំងបំផុតនៃឧស្សាហកម្មទឹកដោះគោរបស់ប្រទេសចិន ព្រមទាំងសមិទ្ធិផលគួរឱ្យកត់សម្គាល់នៃគំនិតផ្តួចផ្តើម «ការស្តារឡើងវិញនូវឧស្សាហកម្មទឹកដោះគោ» របស់ប្រទេសចិន។

ជាមួយនឹងបរិក្ខារគាំទ្រផ្នែកឧស្សាហកម្ម និងទីក្រុងពេញលេញ គម្រោងនេះត្រូវបានគេរំពឹងថានឹងផ្តល់អត្ថប្រយោជន៍ផ្នែកបរិស្ថាន សង្គម និងសេដ្ឋកិច្ចកាន់តែច្រើននៅត្រឹមឆ្នាំ២០៣៥ ដែលជំរុញឱ្យមានការងារធ្វើសម្រាប់មនុស្សជាង ៣៥០.០០០នាក់ និងបង្កើតការងារចំនួន ១៤០.០០០។

គួរបញ្ជាក់ថា ដំណើរទស្សនកិច្ចនេះត្រូវបានរៀបចំឡើងដោយរដ្ឋបាលសាយប័រនៃតំបន់ស្វយ័តម៉ុងហ្គោលីក្នុង និងដឹកនាំដោយសមាគមការទូតសាធារណៈចិន (CPDA) រួមជាមួយសារព័ត៌មាន Global Times Online ដែលជាផ្នែកមួយនៃគំនិតផ្តួចផ្តើមកម្មវិធីដំណើររបស់ប្រទេសចិន៕

ដោយ៖ យា ចិន្តាខន្តី