AKP ម៉ុងហ្គោលីក្នុង ថ្ងៃទី១៤ ខែឧសភា ឆ្នាំ២០២៥ -- អ្នកសារព័ត៌មានមកពី ២៣ប្រទេសបានធ្វើដំណើរទស្សនកិច្ចសិក្សាមួយទៅកាន់តំបន់ស្វយ័តម៉ុងហ្គោលីក្នុង ដែលស្ថិតនៅភាគខាងជើងប្រទេសចិនកាលពីថ្ងៃអង្គារ ដើម្បីស្វែងយល់ពីទិសដៅដ៏អស្ចារ្យបំផុតមួយចំនួនរបស់តំបន់ ដោយបង្ហាញពីការរួមបញ្ចូលគ្នានៃបេតិកភណ្ឌវប្បធម៌ដ៏សម្បូរបែប និងការរីកចម្រើនផ្នែកឌីជីថលដ៏ទំនើប។
នៅក្នុងដំណើរទស្សនកិច្ចនេះ អ្នកសារព័ត៌មានមកពីតំបន់អាស៊ីប៉ាស៊ិហ្វិកចំនួន ៣៥នាក់ បានទៅកាន់មជ្ឈមណ្ឌលផ្លាស់ប្តូរទិន្នន័យម៉ុងហ្គោលី ដែលត្រូវបានបង្កើតឡើងក្នុងគោលបំណងពង្រីកឥទ្ធិពលរបស់ខ្លួនលើសពីតំបន់ម៉ុងហ្គោលីក្នុង និងដើម្បីបម្រើដល់ប្រទេសចិនទាំងមូល ដោយធានានូវទីផ្សារប្រកបដោយសុវត្ថិភាព និងប្រសិទ្ធភាពសម្រាប់ការជួញដូរទិន្នន័យ។
មជ្ឈមណ្ឌលនេះជាមជ្ឈមណ្ឌលផ្តាច់មុខក្នុងតំបន់សម្រាប់ប្រតិបត្តិការទិន្នន័យ បង្កើនការអភិវឌ្ឍសេដ្ឋកិច្ចឌីជីថល ហើយមជ្ឈមណ្ឌលនេះត្រូវបានប្រើប្រាស់ជាគម្រោងហេដ្ឋារចនាសម្ព័ន្ធដ៏សំខាន់ដែលសម្រួលដល់ការជួញដូរ និងការចរាចរទិន្នន័យ។

មជ្ឈមណ្ឌលផ្លាស់ប្តូរទិន្នន័យម៉ុងហ្គោលីក្នុង ត្រូវបានអនុម័តដោយរដ្ឋាភិបាលនៃប្រជាជននៃតំបន់ស្វយ័តម៉ុងហ្គោលីក្នុង សម្រាប់ប្រតិបត្តិការទិន្នន័យ គាំទ្រដល់ការអភិវឌ្ឍទីផ្សារទិន្នន័យ និងសេដ្ឋកិច្ចឌីជីថល។ មជ្ឈមណ្ឌលនេះផ្តល់ជូននូវសេវាកម្មជាច្រើន ដែលរួមមានការចុះបញ្ជីប្រតិបត្តិការទិន្នន័យដែលមានការអនុញ្ញាត ការជួញដូរទិន្នន័យដែលទទួលស្គាល់យ៉ាងទូលំទូលាយ ការផ្គូផ្គងដោយស្វ័យប្រវត្តិសម្រាប់ផលិតផលទិន្នន័យ បច្ចេកវិទ្យាឈានមុខគេសម្រាប់ចរាចរទិន្នន័យ ប្រតិបត្តិការធនធានកុំព្យូទ័ររួមបញ្ចូលគ្នា និងការគ្រប់គ្រងប្រតិបត្តិការដ៏ទូលំទូលាយ។
តាមរយៈការប្រមូលផ្តុំធនធានទិន្នន័យជាក់លាក់ក្នុងឧស្សាហកម្មពីម៉ុងហ្គោលីក្នុង និងខេត្តជិតខាង មជ្ឈមណ្ឌលនេះបង្កើនប្រភេទផលិតផលទិន្នន័យ ពង្រីកដែនប្រតិបត្តិការ និងពង្រីកប្រព័ន្ធអេកូឡូស៊ីទិន្នន័យ ដែលទាំងអស់នេះបាននាំមកនូវសន្ទុះថ្មីមួយទៅក្នុងទីផ្សារជួញដូរទិន្នន័យ។ មជ្ឈមណ្ឌលនេះក៏មានគោលបំណងបង្កើតការចរាចរទិន្នន័យ និងវេទិកាពាណិជ្ជកម្មដែលចាក់ឬសនៅម៉ុងហ្គោលីក្នុង និងសាយភាយទៅកាន់តំបន់ជុំវិញផងដែរ ដោយផ្តល់ជូននូវសេវាកម្មជួញដូរទិន្នន័យដែលផ្តោតសំខាន់ទៅលើទីផ្សារប្រកបដោយប្រសិទ្ធភាព ភាពងាយស្រួល និងសុវត្ថិភាពស្របតាមច្បាប់ និងបទប្បញ្ញត្តិ។

បន្ទាប់មក អ្នកសារព័ត៌មានបានទៅទស្សនកិច្ចនៅ Yungu ដែលជាកន្លែងតាំងពិពណ៌ឌីជីថលដ៏គួរឱ្យទាក់ទាញដែលមានទីតាំងនៅចំកណ្តាលទីក្រុងទិន្នន័យក្នុងតំបន់ Horinger New Area ដោយគ្របដណ្ដប់លើផ្ទៃដីទំហំ ៨.០០០ម៉ែត្រក្រឡា ដោយកំពង់ផែអនាគតនេះបានបង្ហាញពីវិស័យផ្សេងៗ រួមទាំងវិស័យអាកាសចរណ៍ និងការការពារជាតិ តាមរយៈបទពិសោធន៍ដ៏សម្បូរបែប និងទេសចរណ៍ឌីជីថល៕

ដោយ៖ យា ចិន្តាខន្តី