AKP ភ្នំពេញ ថ្ងៃទី១៣ ខែឧសភា ឆ្នាំ២០២៥–មានប្រសាសន៍ប្រាប់អ្នកសារព័ត៌មាន នៅថ្ងៃអង្គារទី១៣ ខែឧសភា ឆ្នាំ២០២៥ ឯកឧត្តមបណ្ឌិត ពៅ សុខ ទីប្រឹក្សា​ផ្ទាល់​សម្តេចនាយករដ្ឋមន្រ្តី ហ៊ុន ម៉ាណែត ដែលជាអ្នករៀបរៀងសៀវភៅ ស្តីពីសម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្តេចមហាបវរធិបតី ហ៊ុន ម៉ាណែត បានមានប្រសាសន៍ថា ខណៈនេះ សៀវភៅ«អ្នកយុទ្ធសាស្រ្ត​វ័យ​ក្មេង​នៅអាស៊ី»ភាគ២ ភាគ៣ និងភាគ៤ បានបញ្ចប់ការរៀបរៀងជាស្ថាពរហើយ ហើយនឹងត្រូវបានបោះពុម្ពផ្សាយជាសាធារណៈ​ក្នុង​ពេលឆាប់ៗនេះ។

ឯកឧត្តមបញ្ជាក់ថា ប្រសិនបើយុវជន ឬអ្នកនយោបាយបន្តវេន ចង់ក្លាយជាអ្នកនយោបាយ អ្នកការទូត អ្នកសេដ្ឋកិច្ច អ្នកគ្រប់​គ្រង និងជាអ្នកយុទ្ធសាស្រ្តដ៏ឆ្នើម គេគប្បីសិក្សារៀនសូត្រឱ្យបានច្រើនបំផុតពីសម្តេចអគ្គមហាសេនាបតីតេជោ ហ៊ុន សែន ប្រ​ធានគណបក្សប្រជាជនកម្ពុជា អតី​តនាយករដ្ឋមន្រ្តី នៃព្រះរាជាណាចក្រកម្ពុជា ដែលប្ចុចប្បន្នសម្តេចជាប្រធានព្រឹទ្ធសភា និង​ជា​ប្រធានក្រុមឧត្តមទីប្រឹក្សា​ព្រះ​មហា​ក្សត្រកម្ពុជា។

ឯកឧត្តមបញ្ជាក់ទៀតថា នៅក្នុងសៀវភៅ« អ្នកយុទ្ធសាស្រ្តវ័យក្មេងនៅអាស៊ី»ទាំង៤ភាគ ដែលមានកម្រាស់ជិត២ពាន់ទំព័រ ដែល​លោកចំណាយពេលរៀបរៀងឡើងវិញជាង៣ឆ្នាំមកនេះ មានរៀបរាប់ទាំងអស់អំពីភាពបន់បែន ភាពប៉ិនប្រសប់ដ៏ឈ្លាសវៃ នៃយុទ្ធសាស្រ្តនានា ទាំងនយោបាយការទូត និងយោធា ដែលសម្តេចតេជោ ហ៊ុន សែន ក្នុងឋានៈជាអ្នកដឹក​នាំប្រទេស​ដ៏វ័យ​ក្មេងជាងគេនៅលើពិភពលោក នាគ្រានោះបានប្រើប្រាស់ក្នុងការចរចាស្វែងរកសន្តិភាព ជាមួយសម្តេចព្រះនរោត្តម សីហនុ ព្រះបរមរតនកោដ្ឋ ក៏ដូចជាត្រីភាគី។

ឯកឧត្តម ពៅ សុខ អះអាងទៀតថា ប្រសិនបើអ្នកសិក្សា ឬអ្នកនយោបាយទាំងឡាយបានអានសៀវភៅ «អ្នកយុទ្ធសាស្រ្តវ័យ​ក្មេងនៅអាស៊ី» ទាំង៤​ភាគជាប់គ្នា នោះពួកគេនឹងអាចក្លាយជាអ្នកនាំពាក្យ អ្នកការទូត អ្នកនយោបាយ អ្នកសេដ្ឋកិច្ច និង​អ្នក​យុទ្ធសាស្រ្តដ៏ចំណាន ដូចសម្តេចតេជោដែរ ឬហោចណាស់ ក៏បានជ្រាបខ្លះ នូវយុទ្ធសាស្រ្តមួយចំនួនដែលសម្តេចតេជោ បាន​ប្រើ​ប្រាស់ ក្នុងការអូសទាញគូបដិបក្ខ ឱ្យយល់ស្របតាមគំនិតផ្តួចផ្តើម និងទស្សនៈរបស់សម្តេច។

ឯកឧត្តម លើកឡើងថា នៅពេលបានអានសៀវភៅ មិត្តអ្នកអានក៏ប្រហែលជាអាចក្លាយជាអ្នកឃោសនា ទាំងផ្នែកនយោបាយ ឬការធ្វើជំនួញដ៏មានទេពកោសល្យ និងប៉ិនប្រសប់ ព្រោះដំណាក់កាលចរចាសន្តិភាព ចាប់ពីថ្ងៃទី០២ ខែធ្នូ ឆ្នាំ១៩៨៧ រហូតដល់ថ្ងៃ២៩ ខែធ្នូ ឆ្នាំ១៩៩៨ រយៈពេល១១ឆ្នាំនេះ ទាំងប្រៃ ល្វីង ជូរចត់ និងផ្អែមល្ហែម គឺសម្តេចតេជោ បានឆ្លងកាត់​ទាំង​អស់។ ដំណាក់កាលចរចាសន្តិភាព ពេលខ្លះ សម្តេចក៏ប្រើប្រាស់វិធីសាស្រ្តរឹងត្អឹងបំផុត គឺការពារទស្សនៈរបស់សម្តេច ក៏ដូចជា​គណបក្សប្រជាជនកម្ពុជា ពេលខ្លះក៏បត់បែន ពេលខ្លះក៏​សម្រប​សម្រួល ដើម្បីឧត្តមផលប្រយោជន៍ជាតិ ហើយសម្រាប់​អ្នក​នយោបាយបច្ចុប្បន្ន ប្រហែលមិនមែនជាដៃគូយុទ្ធសាស្រ្ត នៃវិថី​នយោ​បាយជាមួយសម្តេចតេជោ ហ៊ុន សែន ឡើយ។

ឯកឧត្តមបញ្ជាក់ថា សៀវភៅខាងលើនេះ ពុំមែនជាការសរសេរឡើងវិញថ្មីទេ ប៉ុន្តែគ្រាន់តែជាការរៀបរៀងឡើង​វិញបន្តពី​ឯកសារ​​ដើមទាំងស្រុងដែលរក្សាទុកដោយឯកឧត្តមកែវ បាភ្នំ ហើយក៏មិនមែនជាការអួតអាងថា ឯកឧត្តមជាអ្នករៀបរៀងដ៏ល្បី និងជា​ការ​ផ្សព្វផ្សាយ ដើម្បីលក់សៀវភៅដែរ៕

 ដោយ៖ គង់ សិរីរ័ត្ន