AKP ព្រះសីហនុ ថ្ងៃទី១៣ ខែឧសភា ឆ្នាំ២០២៥--សេចក្ដីជូនដំណឹងរបស់រដ្ឋបាលខេត្តព្រះសីហនុបានឱ្យដឹងថា កងយោធពលខេមរភូមិន្ទ និងកងទ័ពប្រទេសជាមិត្តនឹងសហការរៀបចំធ្វើសមយុទ្ធនាគមាសឆ្នាំ២០២៥ ក្រោមប្រធានបទ «ប្រតិបត្តិការប្រឆាំងភេវរកម្មរួមគ្នា និងការងារសង្គ្រោះមនុស្សធម៌» នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ និងនៅលើផ្ទៃសមុទ្រ និងដែនអាកាសកម្ពុជាក្នុងតំបន់ខេត្តព្រះសីហនុ ចាប់ពីថ្ងៃទី១៤ ដល់ថ្ងៃទី២៨ ខែឧសភា ឆ្នាំ២០២៤។

សមយុទ្ធនាគមាសឆ្នាំ២០២៥ធ្វើឡើងដើម្បីលើកកម្ពស់សមត្ថភាពកងយោធពលខេមរភូមិន្ទ ក្នុងកិច្ចការពារបូរណភាពទឹកដី ប្រឆាំងនឹងភេរវកម្ម និងជំរុញកិច្ចសហ ប្រតិបត្តិការ ព្រមទាំងផ្លាស់ប្តូរបទពិសោធន៍គ្នាទៅវិញទៅមកក្នុងកិច្ចការរក្សា សន្តិភាព សន្តិសុខ សុវត្ថិភាពជូនប្រជា ពលរដ្ឋ និងការងារសង្គ្រោះមនុស្សធម៌។ ដូច្នេះបងប្អូនប្រជាពលរដ្ឋ ប្រជានេសាទ សាធារណជន សូមកុំមានការភាន់ច្រឡំ ពេលមានលឺសំឡេងកាំភ្លើង រួមជាមួយការចល័តកងទ័ពនាវាចម្បាំងនៅលើផ្ទៃសមុទ្រ និងយន្តហោះចម្បាំងហោះនៅលើអាកាសតាមពេលវេលាខាងលើ ព្រោះសកម្មភាពនេះគ្រាន់តែជាសមយុទ្ធនាគមាសឆ្នាំ២០២៥។

ទន្ទឹមនឹងនេះ បន្ទាប់ពីទទួលបានសេចក្តីជូនដំណឹងនេះ អាជ្ញាធរដែនដីគ្រប់លំដាប់ថ្នាក់ កងកម្លាំងមានសមត្ថកិច្ចគ្រប់ប្រភេទ ប្រធានមន្ទីរ អង្គភាពជុំវិញខេត្ត ត្រូវទទួលបន្ទុកផ្សព្វផ្សាយឱ្យបានទូលំទូលាយ និងសហការអនុវត្តឱ្យបានល្អប្រសើរ៕

ដោយ ងូ សុមុនី