AKP បន្ទាយមានជ័យ ថ្ងៃទី១៣ ខែឧសភា ឆ្នាំ២០២៥--ក្នុងស្មារតីទទួលខុសត្រូវខ្ពស់ចំពោះសុខទុក្ខរបស់ប្រជាពលរដ្ឋ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានដឹកនាំដោយផ្ទាល់នូវក្រុមការងារគណៈបញ្ជាការឯកភាពរដ្ឋបាលក្រុងប៉ោយប៉ែត កាលពីរសៀលថ្ងៃទី១២ ខែឧសភា ឆ្នាំ២០២៥ ចុះពិនិត្យ និងចាត់វិធានការបន្ទាន់ក្នុងការកាយស្តារប្រឡាយទឹកសំខាន់ៗក្នុងក្រុង។ ការចុះអន្តរាគមន៍នេះគឺបន្ទាប់ពីមានភ្លៀងធ្លាក់យ៉ាងខ្លាំងកាលពីថ្ងៃទី១០-១១ ខែឧសភា ដែលបណ្តាលឱ្យប្រព័ន្ធលូទឹកក្នុងក្រុងប៉ោយប៉ែតស្ទះ បង្កឱ្យមានការជន់លិចតាមដងផ្លូវ និងលំនៅឋានរបស់ប្រជាពលរដ្ឋជាច្រើនគ្រួសារ។

វត្តមានរបស់ឯកឧត្តមអភិបាលខេត្តនៅក្រុងប៉ោយប៉ែតបានបង្ហាញយ៉ាងច្បាស់ពីការយកចិត្តទុកដាក់ និងការប្តេជ្ញាចិត្តរបស់ថ្នាក់ដឹកនាំខេត្ត ក្នុងការដោះស្រាយបញ្ហាទឹកជំនន់ដែលកំពុងរំខានដល់ជីវភាពរស់នៅរបស់ប្រជាពលរដ្ឋ។ ឯកឧត្តមបានបញ្ជាឱ្យក្រុមការងារប្រើប្រាស់គ្រឿងចក្រអេស្ការវ៉ាទ័រ ដើម្បីបើកមុខទឹកតាមប្រឡាយ និងលូរំដោះទឹកចេញពីក្នុងក្រុងឱ្យបានឆាប់រហ័សបំផុត។ ទន្ទឹមនឹងការចុះពិនិត្យស្ថានភាពជាក់ស្តែង ឯកឧត្តមក៏បានដឹកនាំកិច្ចប្រជុំបន្ទាន់ជាមួយក្រុមការងារក្រុង និងមន្ត្រីមូលដ្ឋានសង្កាត់ពាក់ព័ន្ធ ដើម្បីពិភាក្សារកដំណោះស្រាយយូរអង្វែងសម្រាប់បញ្ហាទឹកជំនន់នេះ។ ក្នុងកិច្ចប្រជុំនោះ ឯកឧត្តមបានសង្កត់ធ្ងន់លើការងារស្តារប្រឡាយ និងប្រព័ន្ធលូឱ្យបានទូលំទូលាយ ដើម្បីធានាបាននូវលំហូរទឹកល្អប្រសើរនៅពេលមានភ្លៀងធ្លាក់នាពេលខាងមុខ។

ឯកឧត្តមអភិបាលខេត្តបានមានប្រសាសន៍ថា “បញ្ហាទឹកជំនន់នេះគឺជាកង្វល់រួមរបស់យើងទាំងអស់គ្នា។ ខ្ញុំសូមជំរុញដល់គណៈបញ្ជាការឯកភាពក្រុងប៉ោយប៉ែត ត្រូវស្វែងរកគ្រប់វិធីសាស្ត្រ ដើម្បីបញ្ចៀសការជន់លិចនៅរដូវវស្សាខាងមុខ។ ការស្តារប្រឡាយ និងប្រព័ន្ធលូ គឺជាអាទិភាពចម្បងរបស់យើង ដើម្បីបើកមុខទឹកឱ្យបានធំ និងរហ័ស សម្រួលដល់ចរន្តទឹកហូរបានល្អ និងការពារទ្រព្យសម្បត្តិរបស់ប្រជាពលរដ្ឋ។”

ជាលទ្ធផលនៃកិច្ចប្រជុំ និងការចង្អុលបង្ហាញដ៏ម៉ឺងម៉ាត់របស់ឯកឧត្តមអភិបាលខេត្ត អាជ្ញាធរខេត្ត ក្រុង និងសង្កាត់ពាក់ព័ន្ធ បានដាក់ចេញនូវផែនការសកម្មភាពភ្លាមៗ ដោយបានរៀបចំប្រព័ន្ធលូរំដោះទឹកបន្ទាន់ចំនួន ៣ ខ្សែសំខាន់ៗ ក្នុងគោលបំណងបញ្ចៀសបញ្ហាទឹកជំនន់នៅក្នុងក្រុងប៉ោយប៉ែត។ ខ្សែលូរំដោះទឹកទាំង៣ រួមមានខ្សែទី១ ចាប់ពីចំណុចផ្លូវអង់តែន០១៦ សាលាព្រហ្មនិមិត្ត ឆ្ពោះមកផ្លូវជាតិលេខ៥។ ខ្សែទី២ ផ្លូវផ្សារត្រី ឆ្ពោះមកផ្លូវជាតិលេខ៥ ទល់មុខសុធារ៉ាប្តូប្រាក់ និងខ្សែទី៣ ផ្លូវវត្តថ្មី ឆ្ពោះមកផ្លូវជាតិលេខ៥។

ក្នុងឱកាសនោះដែរ លោក គាត ហ៊ុល អភិបាលក្រុងប៉ោយប៉ែត ក៏បានអំពាវនាវដល់បងប្អូនប្រជាពលរដ្ឋដែលរស់នៅតាមបណ្តោយផ្លូវទាំង ៣ ខ្សែខាងលើ ឱ្យចូលរួមសហការជាមួយអាជ្ញាធរក្រុង និងសង្កាត់ ដើម្បីសម្រួលដល់ក្រុមការងារក្នុងការកាយ និងរៀបចំប្រព័ន្ធលូរំដោះទឹកឱ្យបានឆាប់រហ័ស និងមានប្រសិទ្ធភាព។  លោកអភិបាលក្រុងបានថ្លែងថា “កិច្ចសហការពីបងប្អូនប្រជាពលរដ្ឋពិតជាមានសារៈសំខាន់ណាស់ ក្នុងការជួយឱ្យការងាររៀបចំប្រព័ន្ធលូរំដោះទឹកនេះ ប្រព្រឹត្តទៅបានដោយរលូន និងឆាប់រហ័ស។ ខ្ញុំសង្ឃឹមថាបងប្អូននឹងចូលរួមសហការទាំងអស់គ្នា ដើម្បីការពារផលប្រយោជន៍រួម និងចៀសវាងការជន់លិចដោយសារទឹកជំនន់ទឹកភ្លៀងនាពេលខាងមុខ។”

សកម្មភាពដ៏សកម្ម និងការយកចិត្តទុកដាក់ខ្ពស់របស់ឯកឧត្តម អ៊ុំ រាត្រី និងលោក គាត ហ៊ុល ព្រមទាំងក្រុមការងារ បានបង្ហាញពីការប្តេជ្ញាចិត្តយ៉ាងមុតមាំរបស់អាជ្ញាធរខេត្តបន្ទាយមានជ័យ ក្នុងការដោះស្រាយបញ្ហាទឹកជំនន់នៅក្រុងប៉ោយប៉ែត និងកែលម្អគុណភាពជីវិតរបស់ប្រជាពលរដ្ឋក្នុងមូលដ្ឋានឱ្យកាន់តែប្រសើរឡើង។ ប្រជាពលរដ្ឋក្នុងក្រុងប៉ោយប៉ែតបានសម្តែងនូវការកោតសរសើរ និងក្តីសង្ឃឹមចំពោះការខិតខំប្រឹងប្រែងរបស់ថ្នាក់ដឹកនាំខេត្ត និងក្រុងក្នុងការដោះស្រាយបញ្ហាប្រឈមនេះ៕

ដោយ ឈុន សារ៉ាត