AKP កំពង់ធំ ថ្ងៃទី១២ ខែឧសភា ឆ្នាំ២០២៥ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី១២ ខែឧសភា ឆ្នាំ២០២៥ បានអញ្ជើញជាអធិបតីក្នុងពិធីផ្សព្វផ្សាយសភាពការណ៍ថ្មីៗ និងពង្រឹងតួនាទីភារកិច្ចរបស់កងយោធពលខេមរភូមិន្ទ ដែលពិធីនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤។

ឧត្តមសេនីយ៍ទោ សោម ស៊ុន បានផ្សព្វផ្សាយអំពីស្ថានភាពសង្គ្រាមរវាងរុស្ស៊ី និងអ៊ុយក្រែន  រវាងឥណ្ឌា និងប៉ាគីស្ថាន និងស្ថានភាពទូទៅនៅតាមព្រំដែនកម្ពុជាថៃ ក៏ដូចជានៅតាមព្រំដែនកម្ពុជាវៀតណាម ដែលមានស្ថានភាពល្អប្រសើរ គឺព្រំដែនមានសន្តិភាព និងការអភិវឌ្ឍ ក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរចំពោះថ្នាក់ដឹកនាំគ្រប់លំដាប់ថ្នាក់ មេបញ្ជាការគ្រប់បណ្តាកងឯកភាព នាយការិយាល័យស្ថាប័នចំណុះ និងយោធិនគ្រប់រូប ដែលបានខិតខំបំពេញតួនាទីភារកិច្ច ស្របតាមលក្ខន្តិកៈរបស់កងយោធពលខេមរភូមិន្ទ ពិសេសអនុវត្តបានល្អនូវសេចក្តីណែនាំលេខ០០៣/២០២០ សណន របស់ក្រសួងការពារជាតិ ស្ដីពីវិធានការពង្រឹងអនុវត្តលក្ខខន្តិកៈទូទៅចំពោះយោធិននៃខ.ភ.ម បទវិន័យទូទៅ សម្រាប់ ខ.គ.ម និងលំហាត់របៀបនៃកងយោធពលខេមរភូមិន្ទ នឹងបានចូលរួមបំពេញភារកិច្ចក្នុងការការពារទប់ស្កាត់និងបង្ក្រាបបទល្មើសធនធានធម្មជាតិ ទទួលបានលទ្ធផលល្អប្រសើរ។

ឧត្តមសេនីយ៍ទោ សោម ស៊ុន បានប្រគល់ភាគកិច្ចសំខាន់ៗមួយចំនួនជូនថ្នាក់ដឹកនាំគ្រប់លំដាប់ថ្នាក់ មេបញ្ជាការគ្រប់កងឯកភាពនិងស្ថាប័នចំណុះ និងយោធិនគ្រប់រូប ត្រូវតែស្មោះត្រង់ដាច់ខាតចំពោះជាតិសាសនា និងព្រះមហាក្សត្រ។ ការពារឱ្យបានបូរណភាពទឹកដី និងសេចក្តីសុខជូនប្រជាជន ពិសេសការពារឱ្យបានសន្តិភាព ដែលយើងកំពុងមានដូចសព្វថ្ងៃនេះឱ្យនៅគង់វង្សជារៀងរហូត ទោះបីក្នុងតម្លៃណាក៏ដោយ។ ជាមួយនោះត្រូវចូលរួមជាមួយកងកម្លាំងប្រដាប់អាវុធទាំងបី អាជ្ញាធរដែនដីគ្រប់លំដាប់ថ្នាក់ ក្នុងការអនុវត្តនូវគោលនយោបាយភូមិឃុំសង្កាត់ មានសុវត្ថិភាពរបស់រាជរដ្ឋាភិបាល ឱ្យទទួលបានជោគជ័យ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)