AKP យូណាន ថ្ងៃទី១០ ខែឧសភា ឆ្នាំ២០២៥ -- បេតិកភណ្ឌវប្បធម៌អរូបីកំណត់ដំណើរឆ្ពោះទៅកាន់ជើងមេឃថ្មី ដោយបង្កើតការសន្ទនារវាងប្រពៃណី និងទំនើបកម្ម និងបង្កើតអនាគតដ៏រុងរឿង ដែលការអភិរក្សវប្បធម៌ និងការអភិវឌ្ឍន៍សេដ្ឋកិច្ចរីកចម្រើនទៅមុខ។ កាលពីថ្ងៃទី០៩ ខែឧសភា ឆ្នាំ២០២៥ គំនិតផ្តួចផ្តើម "បេតិកភណ្ឌវប្បធម៌អរូបីឆ្ពោះទៅរកសកល លោកនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មរួមគ្នា" ត្រូវបានចាប់ផ្តើម ស្របពេលជាមួយនឹងការបើកសម្ពោធឧទ្យានបេតិកភណ្ឌវប្បធម៌អរូបីវូស៊ី (Wuxi) នៅក្នុងទីក្រុងហួយហ័រ។

ពិធីនេះមានការចូលរួមពីភ្ញៀវជាង ៣០០នាក់ រួមទាំងថ្នាក់ដឹកនាំមកពីមន្ទីរវប្បធម៌ និងទេសចរណ៍ខេត្តយូណាន គណៈកម្មាធិការបក្សក្រុងហួយហ័រ និងរដ្ឋាភិបាលប្រជាជនក្រុងហួយហ័រ តំណាងថ្នាក់ដឹកនាំ និងសហគ្រិនចិននៅក្រៅប្រទេសនៃបណ្តាប្រទេសជាសមាជិកកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងភ្ញៀវកិត្តិយសពីវិស័យផ្សេងៗទៀត។

លោក ផេង សៀមដាន (Peng Xiandan) សមាជិកគណៈកម្មាធិការអចិន្ត្រៃយ៍នៃគណៈកម្មាធិការបក្សក្រុងហួយហ័រ និងជាប្រធាននាយកដ្ឋានរណសិរ្សរួបរួម (UFWD) បានប្រកាសបើកដំណើរការជាផ្លូវការនៃព្រឹត្តិការណ៍នេះ។ ពិធីនេះត្រូវបានរៀបចំឡើងដោយលោក ហ៊ុយ ជេន (Hu Chen) សមាជិកគណៈកម្មាធិការអចិន្ត្រៃយ៍នៃគណៈកម្មាធិការបក្សក្រុងហួយហ័រ និងជាប្រធាននាយកដ្ឋានផ្សព្វផ្សាយ។

នាពេលបច្ចុប្បន្ន ក្រុងហួយហ័រមានវត្ថុចំនួន៧៤០ ដែលបានចុះបញ្ជីនៅក្នុងបញ្ជីសារពើភណ្ឌតំណាងបេតិកភណ្ឌវប្បធម៌អរូបីថ្នាក់ជាតិ ថ្នាក់ខេត្ត ថ្នាក់ក្រុង និងថ្នាក់ស្រុក រួមជាមួយនឹងមរតកវប្បធម៌អរូបីចំនួន១.០៤០ ដែលត្រូវបានទទួលស្គាល់នៅទូទាំងកម្រិតផ្សេងៗ។ ដោយជំរុញដោយសន្ទុះនៃកំពង់ផែស្ងួតអន្តរជាតិ សម្បត្តិវប្បធម៌ប្លែកៗរបស់ក្តុងហួយហ័រទាំងនេះកំពុងឆ្លងកាត់ព្រំដែនបន្តិចម្តងៗឆ្ពោះទៅកាន់ជើងមេឃពិភពលោក។

អភិបាលរងនៃរដ្ឋាភិបាលប្រជាជនក្រុងហួយហ័រ លោក សៀន រូលៀន (Xiang Rulian) បានសង្កត់ធ្ងន់ថា ក្រុងហួយហ័រកំពុងចាប់យកឱកាសនៃការរៀបចំកម្មវិធីពិព័រណ៍សេដ្ឋកិច្ច និងពាណិជ្ជកម្មយូណាន (ហួយហ័រ) RCEP លើកទី២ ដើម្បីបើកដំណើរការ "បេតិកភណ្ឌវប្បធម៌អរូបីឆ្ពោះទៅរកសកលលោកនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មរួមគ្នា" ដូច្នេះហើយ ទើបបង្កើតបាននូវភាពរស់រវើក។ ក្រុងហួយហ័រនឹងប្រើប្រាស់ឧទ្យានបេតិកភណ្ឌវប្បធម៌អរូបីវូស៊ី ជាចំណុចចាប់ផ្តើមមួយសម្រាប់បច្ចេកវិទ្យាបន្ថែមទៀតដើម្បីផ្តល់សិទ្ធិអំណាចដល់បេតិកភណ្ឌវប្បធម៌អរូបី ក្នុងការជំរុញការច្នៃប្រឌិតក្នុងវិស័យទេសចរណ៍វប្បធម៌ និងជំរុញការអភិរក្សបេតិកភណ្ឌតាមរយៈការអភិវឌ្ឍឧស្សាហកម្ម។

នៅក្នុងពិធីនេះ លោក ជីន ជៀនពីង (Jin Jianping) នាយកការិយាល័យវប្បធម៌ ទេសចរណ៍ វិទ្យុ ភាពយន្ត និងកីឡាក្រុងហួយហ័របានដាក់បង្ហាញ នូវផែនការពង្រីកទៅកាន់សកលលោកនៃបេតិកភណ្ឌវប្បធម៌អរូបីឆ្ពោះទៅរកសកលលោកនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មរួមគ្នា។ ផែនការនេះបានគូសបញ្ជាក់ពីសកម្មភាពសំខាន់ៗចំនួនបួន ដែលរួមមានការលើកកម្ពស់ការផ្សព្វផ្សាយឌីជីថលអន្តរជាតិនៃបេតិកភណ្ឌវប្បធម៌អរូបី ការលើកកម្ពស់ពិធីបុណ្យអន្តរជាតិ ការតាំងពិព័រណ៌ និងការផ្លាស់ប្តូរវប្បធម៌ ការជំរុញកិច្ចសហប្រតិបត្តិការអន្តរជាតិក្នុងវិស័យឧស្សាហកម្មអរូបី និងការជំរុញការផ្លាស់ប្តូរការសិក្សា និងការបណ្តុះទេពកោសល្យក្នុងវិស័យបេតិកភណ្ឌវប្បធម៌អរូបី៕

ដោយ៖ យា ចិន្តាខន្តី