AKP យូណាន ថ្ងៃទី០៩ ខែឧសភា ឆ្នាំ២០២៥ --

កាលពីថ្ងៃទី០៨ ខែឧសភា ឆ្នាំ២០២៥ ដំណើរទស្សនកិច្ចប្រព័ន្ធផ្សព្វផ្សាយសំខាន់ៗអាស៊ានឆ្នាំ២០២៥ ទីក្រុងវ៉ាយហ័រ បានចាប់ផ្តើមជាផ្លូវការនៅទីក្រុងវ៉ាយហ័រ ខេត្តយូណាន សាធារណរដ្ឋប្រជាមានិតចិន។ ក្នុងរយៈពេលប្រាំថ្ងៃ ចាប់ពីថ្ងៃទី០៨ ដល់ថ្ងៃទី១២ ខែឧសភា ឆ្នាំ២០២៥ ប្រព័ន្ធផ្សព្វផ្សាយមកពីប្រទេសអាស៊ានចំនួនប្រាំពីរ ដែលរួមមានកម្ពុជា ហ្វីលីពីន ឡាវ ម៉ាឡេស៊ី មីយ៉ាន់ម៉ា ថៃ និងឥណ្ឌូណេស៊ី បាននិងកំពុងចាប់ផ្តើមដំណើរទស្សនកិច្ចនៅទូទាំងទីក្រុង និងតំបន់ជុំវិញ។ ជាផ្នែកមួយនៃកម្មវិធី អ្នកតំណាងប្រព័ន្ធផ្សព្វផ្សាយទាំងនោះនឹងចូលរួមពិព័រណ៍សេដ្ឋកិច្ច និងពាណិជ្ជកម្ម RCEP របស់ខេត្តយូណា (ទីក្រុងវ៉ាយហ័រ) លើកទី២ រាយការណ៍អំពីវេទិកាសំខាន់ៗដូចជាផែស្ងួតអន្តរជាតិវ៉ាយហ័រ និងទទួលបានបទពិសោធន៍ និងឱកាសក្នុងការផ្លាស់ប្តូរសេដ្ឋកិច្ច និងពាណិជ្ជកម្មរបស់ខេត្តយូណាជាមួយអាស៊ាន។ ដំណើរទស្សនកិច្ចនេះក៏រួមបញ្ចូលផងដែរនូវដំណើរទៅកាន់តំបន់ហ្ស៊ីជាំង ស៊ីនហ័ង និងស៊ុយពូ ដើម្បីស្វែងយល់អំពីការអភិវឌ្ឍន៍លើវិស័យធម្មជាតិ វប្បធម៌ និងសេដ្ឋកិច្ច នៃតំបន់បេតិកភណ្ឌវប្បធម៌ពិសេសទាំងនោះ។

ទីក្រុងវ៉ាយហ័រ ជាសមាជិកនៃយន្តការពិគ្រោះយោបល់ និងកិច្ចសហប្រតិបត្តិការអន្តរខេត្ត «១៣+២» នៃច្រករបៀងដីគោក-សមុទ្រខាងលិចថ្មី និងជាមជ្ឈមណ្ឌលដឹកទំនិញតែមួយគត់នៅក្នុងខេត្តយូណានដែលតម្រង់ឆ្ពោះទៅទីផ្សារអាស៊ាន។ ចាប់តាំងពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ចូលជាធរមានកាលពីក្នុងឆ្នាំ២០២២ មក ទីក្រុងវ៉ាយហ័រ បានប្រើប្រាស់ទីតាំងយុទ្ធសាស្ត្ររបស់ខ្លួនដែលជាច្រករបៀងដីគោក-សមុទ្រខាងលិចថ្មីនេះ ភ្ជាប់ជាមួយច្រករបៀងសមុទ្រអន្តរជាតិទៅកាន់មហាសមុទ្រឥណ្ឌា ក្នុងការក្លាយជាច្រករបៀងថ្មីសម្រាប់តំបន់ដីគោករបស់ប្រទេសចិន ដើម្បីបើកចំហទៅកាន់ពិភពខាងក្រៅ។ ចាប់ពីឆ្នាំ២០២២ ដល់ឆ្នាំ២០២៤ ការនាំចូល និងនាំចេញរបស់ទីក្រុងវ៉ាយហ័រជាមួយបណ្តាប្រទេសជាសមាជិកកិច្ចព្រមព្រៀង RCEP ផ្សេងទៀត បានកើនឡើងក្នុងអត្រាប្រចាំឆ្នាំជាមធ្យម ៨៧,២៣% ដោយរក្សាបាននូវអត្រាកំណើនខ្ពស់បំផុតនៅក្នុងខេត្តយូណានបីឆ្នាំជាប់ៗគ្នា។

ដោយប្រើប្រាស់នូវផែស្ងួតអន្តរជាតិរបស់ខ្លួន ទីក្រុងវ៉ាយហ័របានបើកច្រករបៀងដឹកជញ្ជូនអន្តរជាតិចំនួន៧ ដែលតភ្ជាប់ប្រទេសចិនជាមួយប្រទេសឡាវ វៀតណាម និងមីយ៉ាន់ម៉ា ក៏ដូចជាផ្លូវដឹកជញ្ជូនក្នុងស្រុក និងអន្តរជាតិចំនួន១៥៥ ដែលគ្របដណ្តប់ទៅលើកំពង់ផែ និងស្ថានីយ៍ចំនួន១៣៨ នៅក្នុងប្រទេស និងតំបន់ចំនួន៥០។ នៅក្នុងឆ្នាំ២០២៤ ទីក្រុងវ៉ាយហ័រ បានដំណើរការសេវាកម្មរថភ្លើងដឹកទំនិញសរុបចំនួន១.០០៩ដង ដោយការដឹកជញ្ជូនតាមរថភ្លើងភ្ជាប់ជាមួយអាស៊ានរបស់ខ្លួនបានជាប់ចំណាត់ថ្នាក់មួយក្នុងចំណោមថ្នាក់កំពូលទូទាំងប្រទេស ហើយរថភ្លើងចិន-ឡាវ ជាប់ចំណាត់ថ្នាក់ទីមួយនៅតំបន់ភាគកណ្តាលប្រទេសចិន។

ក្នុងអំឡុងពេលនៃដំណើរទស្សនកិច្ចប្រព័ន្ធផ្សព្វផ្សាយនេះ អ្នកសារព័ត៌មានអាស៊ាននឹងទៅទស្សនកិច្ចសាលតាំងពិព័រណ៍ផែនការ តំបន់ត្រួតពិនិត្យគយ សួនឧស្សាហកម្មដាក់អីវ៉ាន់ និងសហគ្រាសដែលក្នុងផែស្ងួតអន្តរជាតិវ៉ាយហ័រ។ ដំណើរទស្សនកិច្ចទាំងនេះនឹងបង្ហាញពីរបៀបដែលទីក្រុងវ៉ាយហ័រកំពុងសាងសង់មជ្ឈមណ្ឌលដឹកជញ្ជូន ដែលផ្តោតសំខាន់ទៅលើផែស្ងួត និងការបង្កើតគំរូអភិវឌ្ឍន៍ក្នុងស្រុកថ្មីដែលរួមបញ្ចូលនូវការដឹកជញ្ជូនកំពង់ផែ + នវានុវត្តន៍បទប្បញ្ញត្តិ + ការសម្របសម្រួលឧស្សាហកម្ម»។ ដំណើរទស្សនកិច្ចនេះក៏រួមបញ្ចូលផងដែរនូវដំណើរទស្សនកិច្ចទៅកាន់តំបន់ហ្ស៊ីជាំង ស៊ីនហ័ង និងស៊ុយពូ ដើម្បីស្វែងយល់អំពីសហគ្រាសក្នុងការកែច្នៃផលិតផលកសិកម្ម ឱសថបុរាណចិន ព្រមទាំងសម្ភារៈថ្មីៗដែលបង្ហាញពីការផ្លាស់ប្តូររបស់ទីក្រុងវ៉ាយហ័រ ពី «សេដ្ឋកិច្ចភ័ស្តុភារ» ទៅជា «សេដ្ឋកិច្ចឧស្សាហកម្ម» ក្រោមគំរូនៃ «ធនធានអាស៊ាន - ការផលិតវ៉ាយហ័រ - ទីផ្សារ RCEP»។

លើសពីសេដ្ឋកិច្ច ដំណើរទស្សនកិច្ចនេះក៏នឹងផ្តល់នូវការយល់ដឹងអំពីបេតិកភណ្ឌជាតិ និងវប្បធម៌ដ៏សម្បូរបែបរបស់ទីក្រុងវ៉ាយហ័រក្នុងនាមជាតំបន់មួយក្នុងចំណោមតំបន់ដែលមានប្រព័ន្ធអេកូឡូស៊ីសំបូរបែបទាំង៩ របស់ប្រទេសចិន។ ទីក្រុងវ៉ាយហ័រ គឺជាជម្រករបស់ក្រុមជនជាតិភាគតិចជាង៥០ ដែលរួមមានមានជនជាតិភាគតិចដុង ជនជាតិភាគតិចមីអៅ ជនជាតិភាគតិចទុយជា និងជនជាតិភាគតិចយ៉ៅ។ ទីក្រុងនេះក៏មានភូមិប្រពៃណីច្រើនជាងគេផងដែរនៅក្នុងខេត្តយូណាន។ ក្នុងដំណើរទស្សនកិច្ចនេះ អ្នកសារព័ត៌មានអាស៊ាននឹងទៅទស្សនាឧទ្យានបេតិកភណ្ឌវប្បធម៌អរូបីវូស៊ី វិមានអនុស្សាវរីយ៍ជ័យជំនះនៃសង្គ្រាមប្រជាជនចិននៃការតស៊ូប្រឆាំងនឹងការឈ្លានពានរបស់ជប៉ុន ទីក្រុងបុរាណឡុងស៊ី និងតំបន់ទេសភាពស៊ីម៉េងប៊ីស៊ុយដាន់សៀ នៅតំបន់ស៊ុយពូ។ ការទស្សនាទាំងនេះនឹងផ្តល់នូវការពិនិត្យមើលយ៉ាងដិតដល់អំពីសិល្បៈហត្ថកម្មរបស់ចិន ដូចជាគ្រឿងអលង្ការប្រាក់មីអ ល្ខោនជេនហេមូឡាន និងល្ខោនស៊ុយពូនូ ដោយផ្តល់នូវបទពិសោធន៍ដ៏អស្ចារ្យនៃការរួមបញ្ចូលនៃវប្បធម៌ និងទេសចរណ៍៕

ដោយ៖ យា ចិន្តាខន្តី