AKP ភ្នំពេញ ថ្ងៃទី០៩ ខែឧសភា ឆ្នាំ២០២៥ -- ប៉ូលីសតួកគីបានរឹបអូសវត្ថុធាតុដើមសម្រាប់ផលិតថ្នាំសំយោគ «បុនហ្សៃ» (bonzai) ចំនួន ១៥តោននិងបានឃាត់ខ្លួនជនសង្ស័យចំនួន ១៦នាក់ក្នុងអំឡុងពេលប្រតិបត្តិការទ្រង់ទ្រាយធំនៅទីក្រុងអ៊ីស្តង់ប៊ុល។

រដ្ឋមន្ត្រីមហាផ្ទៃតួកគី លោក អាលី យឺលីកាយ៉ា (Ali Yerlikaya) បាននិយាយនៅលើវេទិកាប្រព័ន្ធផ្សព្វផ្សាយសង្គមអ៊ិចថា ប្រតិបត្តិការនេះផ្តោតលើស្រុកធំៗចំនួនបួននៅទូទាំងទីក្រុង។

លោក យឺលីកាយ៉ា បាននិយាយថា «វត្ថុធាតុដើមសរុប ១៤៤គីឡូក្រាមនៃសារធាតុញៀន អាចគ្រប់គ្រាន់សម្រាប់ផលិតប្រហែល ១៥តោននៃថ្នាំសំយោគ bonzai និងថ្នាំ ៨,៤លានគ្រាប់ត្រូវបានរឹបអូស»។ លោក​បាន​បន្ថែម​ថា ជន​ជួញ​ដូរ​គ្រឿង​ញៀន ១៦​នាក់ ក្នុង​នោះ​មាន​ជន​បរទេស ២​នាក់ត្រូវ​បាន​ចាប់​ខ្លួន​ក្នុង​ពេល​ប្រតិបត្តិការ។

រដ្ឋាភិបាល​តួ​ក​គី​បាន​ចាប់ផ្តើម​ប្រតិបត្តិការ​ប្រឆាំង​គ្រឿងញៀន​ជាញឹកញាប់​។ លោក យឺលីកាយ៉ា បានជំរុញឱ្យប្រជាពលរដ្ឋរាយការណ៍ពីសកម្មភាពគួរឱ្យសង្ស័យណាមួយដោយធានាថាអាជ្ញាធរនឹងចាត់វិធានការចាំបាច់៕

ដោយ៖ មូល មិនា (ប្រភព៖ ស៊ីនហួ)