AKP ភ្នំពេញ ថ្ងៃទី០៩ ខែឧសភា ឆ្នាំ២០២៥ -- ឧបនាយករដ្ឋមន្ត្រីចិនលោក ហេ លីហ្វេង (He Lifeng) បានជួបជាមួយ លោក ម៉ាជេដ អាល់ រ៉ូម៉ៃធី (Majed Al Romaithi) ប្រធានគណៈកម្មាធិការគ្រប់គ្រងនៃអាជ្ញាធរវិនិយោគទីក្រុងអាប៊ូដាប៊ី (ADIA) នៃប្រទេសអារ៉ាប់រួម នៅទីក្រុងប៉េកាំង។

លោកជាសមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បាននិយាយថា សេដ្ឋកិច្ចរបស់ប្រទេសចិនបានចាប់ផ្តើមល្អនៅឆ្នាំនេះជាមួយនឹងការរីកចម្រើនយ៉ាងរឹងមាំក្នុងការអភិវឌ្ឍប្រកបដោយគុណភាពខ្ពស់ និងការបន្តធ្វើឱ្យប្រសើរឡើងនូវទំនុកចិត្ត និងការរំពឹងទុករបស់សង្គម។

លោកបានកត់សម្គាល់ថា ប្រទេសចិនកំពុងបន្តធ្វើឱ្យស៊ីជម្រៅកំណែទម្រង់របស់ខ្លួនយ៉ាងទូលំទូលាយ និងខិតខំប្រឹងប្រែងដើម្បីលើកកម្ពស់ការបើកចំហកម្រិតកំពូលក្នុងវិស័យផ្សេងៗដូចជាហិរញ្ញវត្ថុដោយលោកបានបន្ថែមថា ប្រទេសចិនស្វាគមន៍ស្ថាប័នហិរញ្ញវត្ថុបរទេស រួមទាំង អាជ្ញាធរ ADIA និងអ្នកវិនិយោគរយៈពេលវែងក្នុងការធ្វើអាជីវកម្មនៅក្នុងប្រទេសចិន និងចែករំលែកនៅក្នុងឱកាសអភិវឌ្ឍន៍របស់ខ្លួន។

លោក ម៉ាជេដ បាននិយាយថា អាជ្ញាធរ ADIA មានភាពសុទិដ្ឋិនិយមចំពោះទស្សនវិស័យសេដ្ឋកិច្ចរបស់ប្រទេសចិន ហើយកំពុងទន្ទឹងរង់ចាំដើម្បីធ្វើកិច្ចសហប្រតិបត្តិការ និងការផ្លាស់ប្តូរជាមួយប្រទេសចិនក្នុងវិស័យផ្សេងៗ៕

ដោយ៖ មូល មិនា (ប្រភព៖ ភីបផលដេលី)