AKP ភ្នំពេញ ថ្ងៃទី០៨ ខែឧសភា ឆ្នាំ២០២៥ -- ប្រទេសន័រវេស និងចក្រភពអង់គ្លេសកាលពីថ្ងៃពុធបានចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីភាពជាដៃគូឧស្សាហកម្មបៃតង។

រដ្ឋាភិបាលន័រវេសបាននិយាយនៅក្នុងសេចក្តីប្រកាសព័ត៌មានមួយថា«ភាពជាដៃគូឧស្សាហកម្មបៃតងនឹងលើកកម្ពស់ការអភិវឌ្ឍឧស្សាហកម្មបៃតង កសាងជំនាញក្នុងវិស័យការបំភាយឧស្ម័នទាប និងគាំទ្រខ្សែសង្វាក់តម្លៃសម្រាប់វត្ថុធាតុដើម»។

តំបន់ផ្តោតសំខាន់រួមមានការចាប់យកកាបូន និងការផ្ទុក (CCS) អ៊ីដ្រូសែន ខ្យល់នៅឆ្នេរសមុទ្រ ការអភិវឌ្ឍខ្សែសង្វាក់តម្លៃបៃតង និងប្រព័ន្ធថាមពលប្រកបដោយនិរន្តរភាព។ ភាគីទាំងពីរក៏បានសន្យាបង្កើនកិច្ចសហប្រតិបត្តិការក្នុងការអភិវឌ្ឍជំនាញបៃតងផងដែរ។

រដ្ឋមន្ត្រីក្រសួងពាណិជ្ជកម្ម និងឧស្សាហកម្មន័រវេស លោកស្រី សេស៊ីលី មីសេត (Cecilie Myrseth) បាននិយាយថា «ការរួមបញ្ចូលគ្នានូវភាពខ្លាំងរបស់ប្រទេសន័រវេស និងចក្រភពអង់គ្លេស យើងអាចបង្កើតការងារអភិវឌ្ឍន៍ឧស្សាហកម្មថ្មីៗ និងលើកកម្ពស់ការប្រកួតប្រជែងរបស់យើង»។

រដ្ឋមន្ត្រីក្រសួងអាកាសធាតុ និងបរិស្ថានន័រវេស លោក អានដ្រៀស ប៊ីជេលលែន អេរីកសេន (Andreas Bjelland Eriksen) បានសង្កត់ធ្ងន់ថាការផ្លាស់ប្តូរពណ៌បៃតងមានសារៈសំខាន់សម្រាប់ការសម្រេចបាននូវគោលដៅអាកាសធាតុ ហើយបានបង្កើតឱកាសការងារថ្មី។

យោងតាមរដ្ឋាភិបាលន័រវេសបានឱ្យដឹងថា ចក្រភពអង់គ្លេសគឺជាដៃគូពាណិជ្ជកម្មធំទីពីររបស់ប្រទេសន័រវេសបន្ទាប់ពីសហភាពអឺរ៉ុប ហើយពាណិជ្ជកម្មទ្វេភាគីបានឈានដល់ជាង ៥៣០ប៊ីលានក្រូនន័រវេស (៥១,៦ប៊ីលានដុល្លារអាម៉េរិក) ក្នុងឆ្នាំ២០២៤៕

ដោយ៖ មូល មិនា (ប្រភព៖ ភីបផលដេលី)