AKP ភ្នំពេញ ថ្ងៃទី០៨ ខែឧសភា ឆ្នាំ២០២៥ -- រដ្ឋមន្ត្រីការបរទេសចិនលោក វ៉ាង យី (Wang Yi) បានអបអរសាទរ លោក ចូហាន់ វ៉ាដេពូល (Johann Wadephul) ចំពោះតួនាទីថ្មីរបស់លោកជារដ្ឋមន្ត្រីការបរទេសអាល្លឺម៉ង់ ហើយបានសន្យាថានឹងធ្វើការជាមួយលោក។

នៅក្នុងសារអបអរសាទររបស់លោក លោក វ៉ាង ជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បាននិយាយថា ប្រទេសចិន និងអាល្លឺម៉ង់ គឺជាប្រទេសសំខាន់ពីរដែលមានឥទ្ធិពលលើសកលលោក។

លោក​បាន​មាន​ប្រសាសន៍​ថា ក្នុង​រយៈ​ពេល ​៥៣​ឆ្នាំ​ចាប់​តាំង​ពី​ការ​បង្កើត​ទំនាក់​ទំនង​ការ​ទូត​មក ប្រទេស​ទាំង​ពីរ​បាន​ជំនះ​លើ​ភាព​ខុស​គ្នា​ក្នុង​ប្រវត្តិសាស្ត្រ និង​ក្នុង​លក្ខខណ្ឌ​ជាតិ បង្កើតទំនាក់ទំនងស្ថិរភាព និងប្រកបដោយប្រសិទ្ធភាពជាមួយនឹងចក្ខុវិស័យយុទ្ធសាស្ត្រទូលំទូលាយដោយធ្វើឱ្យមានការរួមចំណែកជាវិជ្ជមានដល់ការអភិវឌ្ឍទំនាក់ទំនងចិន-សហភាពអឺរ៉ុប និងវិបុលភាពពិភពលោក។

លោក វ៉ាង បាននិយាយថា នៅក្នុងពិភពលោកនាពេលបច្ចុប្បន្ននេះគឺជាកន្លែងដែលមានភាពចលាចល និងមានការផ្លាស់ប្តូរ ហើយជំនោរនៃឯកតោភាគីនិយម និងលទ្ធិគាំពារនិយមកំពុងកើនឡើង ប្រទេសចិន និងអាល្លឺម៉ង់គួរតែគោរពគ្នាទៅវិញទៅមក ស្វែងរកមូលដ្ឋានរួមគ្នា លើកកម្ពស់ការផ្លាស់ប្តូរ និងការរៀនសូត្រគ្នាទៅវិញទៅមក និងបន្តកិច្ចសហប្រតិបត្តិការឈ្នះឈ្នះ ដើម្បីលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយរបស់ភាគីទាំងពីរទៅកម្រិតកំពូល និងរួមគ្នាការពារពិភពលោកពហុប៉ូលប្រកបដោយសមធម៌ មានសណ្តាប់ធ្នាប់ និងសកលភាវូបនីយកម្មសេដ្ឋកិច្ចដែលមានអត្ថប្រយោជន៍។

អ្នកការទូតកំពូលរបស់ចិន បាននិយាយថា លោកមានឆន្ទៈក្នុងការបង្កើតទំនាក់ទំនងការងារល្អជាមួយលោក វ៉ាដេពូល ហើយទន្ទឹងរង់ចាំជួបលោកនៅពេលវេលាដំបូងសម្រាប់ការផ្លាស់ប្តូរស៊ីជម្រៅ៕

ដោយ៖ មូល មិនា (ប្រភព៖ ភីបផលដេលី)