AKP ភ្នំពេញ ថ្ងៃទី០៧ ខែឧសភា ឆ្នាំ២០២៥-- ឯកឧត្តម ឈាង វុន ប្រធានគណៈកម្មការ សេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ដោយមានការអញ្ជើញចូលរួមពីឯកឧត្តម អនុប្រធាន លោកជំទាវ លេខាធិការ ឯកឧត្តម សមាជិក សមាជិកា គណៈកម្មការ និងទីប្រឹក្សា មន្រ្តីជំនួយការគណៈកម្មការទី២នៃរដ្ឋសភា បានអញ្ជើញជួបប្រជុំពិភាក្សាការងារជាមួយ ឯកឧត្តម ឃួង ស្រេង អភិបាលរាជធានីភ្នំពេញ នាព្រឹកថ្ងៃទី០៧ ខែឧសភា ឆ្នាំ២០២៥ នៅសាលារាជធានីភ្នំពេញ។

ឯកឧត្តម ឈាង វុន បានមានប្រសាសន៍ថា ឯកឧត្តមបានដឹកនាំសហការី អញ្ជើញចុះបេសកកម្មនៅសាលារាជធានីភ្នំពេញ ដើម្បីឈ្វេងយល់ពីប្រសិទ្ធភាពនៃការអនុវត្តច្បាប់ ការអនុវត្តកម្មវិធីនយោបាយ និងយុទ្ធសាស្ត្របញ្ចកោណរបស់រដ្ឋាភិបាល នីតិកាលទី៧ នៃរដ្ឋសភា ព្រមទាំងបញ្ហាប្រឈមនានាក្នុងវង្វង់វិស័យការងារអនុវត្តច្បាប់ និងវិស័យនានាដែលពាក់ព័ន្ធ និងសមត្ថកិច្ចគណ:កម្មការទី២ នៃរដ្ឋសភា។

ឯកឧត្តមបានបន្តថា សម្រាប់ការចុះបំពេញបេសកម្មរបស់គណៈកម្មការទី២នៃរដ្ឋសភាមកកាន់សាលារាជធានីភ្នំពេញ គឺដើម្បីស្វែងយល់កាន់តែស៊ីជម្រៅអំពីការងារនានាដែលមានការពាក់ព័ន្ធទៅនឹងតួនាទី និងភារកិច្ចរបស់គណៈកម្មការទី២នៃរដ្ឋសភា នៅក្នុងមូលដ្ឋានរាជធានីភ្នំពេញស្របតាមគោលការណ៍កំណែទម្រង់ កម្មវិធីនយោបាយ និងយុទ្ធសាស្រ្តបញ្ចកោណដំណាក់កាលទី១របស់រាជរដ្ឋាភិបាលសំដៅពង្រឹងការអនុវត្តមុខងាររបស់រដ្ឋសភាក្នុងភាពជាតំណាងរបស់ប្រជាពលរដ្ឋម្ចាស់ឆ្នោត និងធ្វើឱ្យមានសង្គតិភាពរវាងការតាក់តែងច្បាប់និងការអនុវត្តច្បាប់នៅមូលដ្ឋានជាក់ស្តែង។

ទន្ទឹមនឹងនេះ ឯកឧត្តមអភិបាលរាជធានីបានមានប្រសាសន៍ថា រាជរដ្ឋាភិបាលកម្ពុជា ក្នុងនីតិកាលកន្លងមក ក្រោមការដឹកនាំរបស់សម្តេចតេជោ ហ៊ុន សែន ក៏ដូចជារាជរដ្ឋាភិបាលនីតិកាលទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលជាថ្នាក់ដឹកនាំបន្តវេនវ័យក្មេងប្រកបដោយសមត្ថភាព និងថាមពល បានបន្តធ្វើការប្តេជ្ញាចិត្តខ្ពស់ក្នុងការបន្តអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការឱ្យកាន់តែស៊ីជម្រៅដើម្បីបន្តពង្រឹងរដ្ឋបាលថ្នាក់ក្រោមជាតិ កែលំអរប្រព័ន្ធរដ្ឋបាលហិរញ្ញវត្ថុ អភិវឌ្ឍន៍ធនធានមនុស្ស ទន្ទឹមគ្នានឹងការផ្ទេរមុខងារ និងធនធានរបស់ជាតិជាបណ្តើរៗសំដៅធានាឱ្យរដ្ឋបាលថ្នាក់ក្រោមជាតិ អាចបំពេញការងារដោយរលូន គណនេយ្យភាព តម្លាភាព និងការឆ្លើយតបទាន់ពេលវេលាតម្រូវការក្នុងមូលដ្ឋាន។

ក្នុងឱកាសនោះ ឯកឧត្តម ឈាង វុន បានថ្លែងការកោតសរសើរ និងវាយតម្លៃខ្ពស់ជូនឯកឧត្តម ឃួង ស្រេង  អភិបាលរាជធានីភ្នំពេញ ក៏ដូចជាមន្ទីរពាក់ព័ន្ធដែលបានខិតខំយកចិត្តទុកដាក់ខ្ពស់ក្នុងការបំពេញភារកិច្ចដើម្បីរួមចំណែកកសាងសេដ្ឋកិច្ចជាតិឱ្យបានរីកចម្រើនលូតលាស់ជាលំដាប់ ក្នុងការឈានឆ្ពោះទៅកាន់ប្រទេសមានចំណូលមធ្យមក្រិតខ្ពស់នៅឆ្នាំ២០៣០និងប្រទេសមានចំណូលខ្ពស់នៅឆ្នាំ២០៥០។

ឯកឧត្តមប្រធានគណៈកម្មការជំនាញរដ្ឋសភា បានលើកទឹកចិត្តដល់ថ្នាក់ដឹកនាំ និងអាជ្ញាធររាជធានីភ្នំពេញទំាងអស់ សូមអនុវត្តឱ្យបានខ្ជាប់ខ្ជួននូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព ជូនប្រជាពលរដ្ឋ។ ចំពោះសំណូមពរ និងបញ្ហាប្រឈមនានា ដែលមន្ទីរជំនាញលើកឡើង គណៈកម្មការនឹងធ្វើរបាយការណ៍ជម្រាបជូនសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងគណៈកម្មាធិការអចិន្ត្រៃយ៍រដ្ឋសភា ក្នុងការបន្តនីតិវិធី ដោះស្រាយជូន៕

ដោយ សួស សំរិត