AKP ព្រះសីហនុ ថ្ងៃទី០៧ ខែឧសភា ឆ្នាំ២០២៥-- 

ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី១ គ.ជ.គ.ម និងជាអគ្គលេខាធិការសមាគមអតីតយុទ្ធជនកម្ពុជា និងឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ អញ្ជើញដឹកនាំកិច្ចប្រជុំបូកសរុបលទ្ធផលការងារគ្រប់គ្រងគ្រោះមហន្តរាយឆ្នាំ២០២៤ និងទិសដៅអនុវត្តបន្តឆ្នាំ២០២៥ នៅព្រឹកថ្ងៃពុធ ទី០៧ ខែឧសភា ឆ្នាំ២០២៥។

ឯកឧត្តម ម៉ាង ស៊ីណេត អភិបាលខេត្តព្រះសីហនុ បានរាយការណ៍ពីផលប៉ះពាល់ដោយគ្រោះមហន្តរាយក្នុងឆ្នាំ២០២៤៖ ១. ករណីខ្យល់កន្ត្រាក់ និងភ្លៀងធ្លាក់បណ្តាលឱ្យក្រុង-ស្រុកចំនួន០៤ មានដូចជាក្រុងព្រះសីហនុ, ក្រុងកោះរ៉ុង, ស្រុកស្ទឹងហាវ និងស្រុកព្រៃនប់ រងផលប៉ះពាល់ និងខូចខាតផ្ទះប្រជាពលរដ្ឋរួមមាន៖ រលំផ្ទះចំនួន ០២ខ្នងផ្ទះ ស្មើនឹង០២គ្រួសារ របើកដំបូលផ្ទះចំនួន ៤៣៥ខ្នងផ្ទះ ស្មើនឹង ៤៣៥គ្រួសារ ជំនន់ទឹកភ្លៀងលិចផ្ទះចំនួន ៤៥៤ខ្នងផ្ទះ ស្មើនឹង ៤៦៦គ្រួសារ ទឹកហូរច្រោះដាច់ផ្លូវលំចំនួន ០៣ខ្សែ ប្រវែងសរុប ៣,០០០ម៉ែត្រ (ក្រុងកោះរ៉ុង) បាក់ស្ពានឈើឆ្លងព្រែកឡុងសិតប្រវែង ៣៥ម៉ែត្រ (ក្រុងកោះរ៉ុង)  ទឹកហូរច្រោះខាងក្រោមផ្លូវបេតុង ០២ខ្សែ ប្រវែង ២៦ម៉ែត្រ (ក្រុងកោះរ៉ុង) ស្រុតបង្គោលភ្លើងចំនួន១ដើម (ក្រុងកោះរ៉ុង) លិចទូកនេសាទចំនួន ០៤គ្រឿង (ក្រុងកោះរ៉ុង)។ ២. គ្រោះមហន្តរាយផ្សេងៗ គ្រោះថ្នាក់ចរាចរណ៍បានកើតឡើងចំនួន ១៥៧ករណី បណ្តាលឱ្យស្លាប់មនុស្សចំនួន ១០៧នាក់ ស្រី ០៩នាក់ រងរបួស ២០៧នាក់ ស្រី ៦០នាក់ និងខូចខាតយានយន្តចំនួន ២៣៨គ្រឿង (រថយន្ត ៨៣គ្រឿង, ម៉ូតូ ១៥២គ្រឿង, ម៉ូតូកង់បី ០២គ្រៀង និងរថភ្លើង ០១គ្រឿង។ អគ្គិភ័យបានកើតឡើងចំនួន ៦៥ករណី មូលហេតុមកពីឆ្លងចរន្តអគ្គិសនី បណ្ដាលឱ្យរងរបួសមនុស្ស ០៣នាក់ និងការខូចខាតរួមមាន៖ ម៉ូតូចំនួន ០៦គ្រឿង និងរថយន្ត០៨គ្រឿង ឆេះបន្ទប់ស្នាក់នៅ៧៣កន្លែង និសម្ភារមួយចំនួន ឆេះផ្ទះចំនួន០៩ខ្នង និងសម្ភារមួយចំនួន ឆេះអគាររោងចក្រ០៣អគារ ឆេះទូកុងតឺន័រ ០១ ឆេះបន្ទប់ខារ៉ាអូខេ ០១  លង់ទឹក ០៨ករណី ស្លាប់មនុស្សចំនួន ០៨នាក់ ស្រី ០១នាក់។ រន្ទះបាញ់ចំនួន ០៣ករណី ស្លាប់មនុស្ស ០៣នាក់។

ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម បានវាយតម្លៃចំពោះការខិតខំដោះស្រាយគ្រោះមហន្តរាយបានទាន់ពេលវេលា ព្រមទាំងបានថ្លែងអំណរគុណចំពោះគណ:កម្មការគ្រោះមហន្តរាយគ្រប់លំដាប់ថ្នាក់ចាប់ពីឃុំ សង្កាត់ ក្រុង ស្រុក និងខេត្ត បានបំពេញតួនាទីក្នុងការគ្រប់គ្រងធានារ៉ាប់រងបានទាំងស្រុង និងសូមជូនពរឪ្យបន្តការងារទទួលបានជោគជ័យបន្តទៀត។ ជំហានបន្ទាប់ដែលយើងត្រូវធ្វើនោះគឺ ពិនិត្យចំពោះអតីតយុទ្ធជនរបស់យើងដែលគ្នានដី និងផ្ទះជាក់ស្តែង ខេត្តរបស់យើងមានជាង ១០០គ្រួសារ ក៏ប៉ុន្តែការពិនិត្យជាក់ស្តែងមាន ៥០គ្រួសារដែលគ្នានដី និងផ្ទះស្នាក់នៅ ហើយមួយគ្រួសារទៀតបានមកដាក់ពាក្យស្នើសុំដី និងផ្ទះ ដែលទាមទារឱ្យយើងធ្វើការដោះស្រាយជាបន្ទាប់ ហើយគណ:កម្មាធិការខេត្តបានពិនិត្យវាយតម្លៃចំពោះដី និងផ្ទះដែលយើងបានចែកជូនរួចហើយ ប្រសិនមិនមានអ្នករស់នៅ យើងត្រូវដកហូតយកមកវិញ។ ចំពោះអតីតយុទ្ធជនរបស់យើងដែលបានរស់នៅអាស្រ័យផលជាក់ស្តែងរយ:ពេល៥ឆ្នាំ និងចេញបណ្ណកម្មសិទ្ធជូនពួកគាត់ ហើយមន្ទីរដែនដីមានភារកិច្ចលើការងាររៀបចំចេញបណ្ណកម្មសិទ្ធនេះ ។ មកដល់ពេលនេះយើងបានគ្រប់គ្រងដីសម្បទាសង្គមកិច្ចបានសឹងតែទាំងស្រុកនៅទូទាំងប្រទេស ដែលរាជរដ្ឋាភិបាលបានផ្តល់ដីសម្បទានសង្គមកិច្ចសម្រាប់ធ្វើការចែកជូនអតីតយុទ្ធជនរបស់យើងដែលគ្នានដី គ្នានផ្ទះស្នាក់នៅពិតប្រាកដ សំរាមខេត្តព្រះសីហនុ មានផ្ទះចំនួន ៥១ខ្នង ត្រូវធ្វើការសាងសង់ និងធ្វើការប្រគល់ជូនអតីតយុទ្ធជនរបស់យើងនៅពេលខាងមុខ ហើយផ្ទះចំនួន ២០ខ្នងយើងបានសាងសង់រួចហើយ នៅសល់ ៣១ ខ្នងផ្ទះទៀត ដែលត្រូវធ្វើការសាងសង់បន្ត ដើម្បីប្រគល់ទទួលឱ្យពួកគាត់នៅពេលខាងមុខនេះ។

ឯកឧត្តមក៏បានបញ្ជាក់ថានឹងបញ្ជូនក្រុមជាង ដើម្បីមកធ្វើការសាងសង់ផ្ទះជូនអតីតយុទ្ធជនរបស់យើងបន្ថែមទៀតតាមសំណើរសំណូមពររបស់គណ:កម្មការ ទន្ទឹមនោះយើងត្រូវចលនាមហាជន ក្រសួង មន្ទីរ អង្គភាព និងសប្បុរសជនចូលរួម ព្រោះនៅឆ្នាំ២០២៥នេះ រាជរដ្ឋាភិបាលគ្រោងនឹងសាងសង់ផ្ទះជាច្រើនខ្នង ដើម្បីប្រគល់ជូនអតីតយុទ្ធជនរបស់យើង ក្រៅពីការងារសាងសង់ផ្ទះជូនអតីតយុទ្ធជនរបស់យើង យើងត្រូវសាងសង់ផ្លូវប្រវែង៣គីឡូម៉ែត្រ ព្រមទាំងបានធ្វើការណែនាំដល់មន្ទីរអភិវឌ្ឍជនបទខេត្តព្រះសីហនុ រៀបចំគម្រោងស្នើទៅឯកឧត្តម អភិបាលខេត្ត ដើម្បីបញ្ជូនទៅក្រសួងអភិវឌ្ឍន៍ជនបទ។  មន្ទីររៀបចំដែនដីត្រូវចុះពុះឡូតិ៍ ដើម្បីត្រៀមចែកជូនអតីតយុទ្ធជនរបស់យើងដែលគ្មានដី និងផ្ទះពិតប្រាកដ យើងអាចបង្កើតជាភូមិ រៀបចំជាបុរីជនបទសម្រាប់ចែកជូនប្រជាពលរដ្ឋក្រីក្រដែលរស់នៅលើលូ រស់នៅលើដីសាធារណៈជាដើម។

ក្នុងឱកាសនោះ ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ក៏បានណែនាំដល់ក្រុង ស្រុក ត្រូវយកចិត្តទុកដាក់ចំពោះគ្រួសារអតីតយុទ្ធជនពលីនៅក្នុងសមរភូមិក្នុងភូមិសាស្ត្រខេត្តព្រះសីហនុ ចំនួន ២៨៧គ្រួសារ នៅពេលខែបុណ្យទានមានដូចជា ចូលឆ្នាំខ្មែរ ភ្ជុំបិណ្ឌ ត្រូវចុះសួរសុខទុក្ខ និងចែករំលែកនូវការខ្វះខាតរបស់ពួកគាត់ ដើម្បីជាការតបស្នងសងគុណដែលពួកគាត់បានពលីជីវិតក្នុងសមភូមិ ក្នុងបុព្វហេតុការពារជាតិ មាតុភូមិកម្ពុជា៕

ដោយ ងូ សុមុនី