AKP ភ្នំពេញ ថ្ងៃទី០៧ ខែឧសភា ឆ្នាំ២០២៥ -- នាយករដ្ឋមន្ត្រីប៉ាគីស្ថានលោក សេហ៍បាហ្ស សារីហ្វ (Shehbaz Sharif) បានជួបពិភាក្សាតាមទូរស័ព្ទជាមួយអគ្គលេខាធិការអង្គការសហប្រជាជាតិលោក អានតូញ៉ូ ហ្គូធឺរេស (Antonio Guterres) ដើម្បីពិភាក្សាអំពីស្ថានភាពសន្តិសុខដែលកំពុងកើតមាននៅក្នុងតំបន់អាស៊ីខាងត្បូង។

យោងតាមសេចក្តីថ្លែងការណ៍របស់ការិយាល័យនាយករដ្ឋមន្ត្រីបានឱ្យដឹងថា ក្នុងអំឡុងពេលសន្ទនា លោក សារីហ្វ បានកោតសរសើរចំពោះការបន្តការចូលរួម និងកិច្ចខិតខំប្រឹងប្រែងផ្សព្វផ្សាយរបស់អគ្គលេខាធិការអង្គការសហប្រជាជាតិ ហើយបានស្វាគមន៍ការអំពាវនាវរបស់លោកឱ្យបន្ថយការកើនឡើង ក៏ដូចជាជៀសវាងការប្រឈមមុខដាក់គ្នាណាមួយ។

នាយក​រដ្ឋមន្ត្រី​ប៉ាគីស្ថាន​បាន​សម្តែង​ការ​ព្រួយ​បារម្ភ​អំពី​ «វោហាសាស្ត្រ​បង្កហេតុ និង​ការ​បង្ក​សង្គ្រាម» របស់ប្រទេស​ឥណ្ឌា។ លោកបានរំលឹកឡើងវិញនូវការប្តេជ្ញាចិត្តរបស់ប្រទេសប៉ាគីស្ថានក្នុងការការពារអធិបតេយ្យភាព និងបូរណភាពទឹកដីរបស់ខ្លួន។

ចំណែកឯលោក ហ្គូធឺរេស បានពន្យល់ប្រាប់លោក សារីហ្វ អំពីកិច្ចខិតខំប្រឹងប្រែងរបស់លោកដើម្បីសន្តិភាព និងស្ថិរភាពនៅក្នុងតំបន់ ដោយលោកបានបង្ហាញពីការប្តេជ្ញាចិត្តរបស់លោកក្នុងការបន្តចូលរួមជាមួយកិច្ចពិភាក្សាលើបញ្ហានេះ។ នេះ​ជាការ​សន្ទនា​តាម​ទូរស័ព្ទ​លើក​ទី​ពីរ​រវាង​អ្នក​ទាំងពីរ​ក្នុង​រយៈពេល​មួយ​សប្តាហ៍​។

ភាពតានតឹងរវាងប្រទេសឥណ្ឌា និងប៉ាគីស្ថានបានកើនឡើងបន្ទាប់ពីមានការវាយប្រហារយ៉ាងសាហាវទៅលើអ្នកទេសចរនៅស្រុកប៉ាហាលហ្គាម ក្នុងតំបន់កាស្មៀ ដែលគ្រប់គ្រងដោយប្រទេសឥណ្ឌាកាលពីថ្ងៃទី២២ខែមេសា៕

ដោយ៖ មូល មិនា (ប្រភព៖ ស៊ីនហួ)