AKP កណ្ដាល ថ្ងៃទី០៦ ខែឧសភា ឆ្នាំ២០២៥-- ដើម្បីលើកកម្ពស់ការអនុវត្តច្បាប់ចរាចរណ៍ផ្លូវគោគឱ្យបានទូលំទូលាយ សំដៅកាត់បន្ថយគ្រោះថ្នាក់ចរាចរណ៍ និងការកក់ស្ទះចរាចរណ៍ ដែលបណ្តាលមកពីការបើកបរមិនគោរពច្បាប់ នៅថ្ងៃទី០៦ ខែឧសភា ឆ្នាំ២០២៥នេះ មន្ទីរអធិការកិច្ចខេត្តកណ្តាល បានរៀបចំកម្មវិធីផ្សព្វផ្សាយច្បាប់ស្តីពីចរាចរណ៍ផ្លូវគោកនៅវិទ្យាល័យទេពប្រណម្យ ស្រុកពញាឮ ដោយមានការអញ្ជើញជាអធិបតីពីលោក គា ប៊ុនថន ប្រធានមន្ទីរអធិការកិច្ចខេត្តកណ្ដាល លោក ហួត ហៃ អភិបាលរងស្រុកពញាឮ ព្រមទាំងលោកគ្រូ  អ្នកគ្រូ និងសិស្សានុសិស្សជាង ៣០០នាក់។

លោក គា ប៊ុនថន ប្រធានមន្ទីរអធិការកិច្ចខេត្តកណ្ដាល បានបញ្ជាក់ថា ការផ្សព្វផ្សាយច្បាប់ចរាចរណ៍ផ្លូវគោកនាពេលនេះ គឺចង់ដាស់ស្មារតីឱ្យប្រជាពលរដ្ឋ មន្រ្តីរាជការ និងសិស្សានុសិស្សទាំងអស់ដែលប្រើប្រាស់ផ្លូវថ្នល់សាធារណៈ ត្រូវផ្លាស់ប្តូរឥរិយាបថ ដែលធ្លាប់មានភាពអនាធិបតេយ្យ មកប្រកាន់ឥរិយាបថដែលមានសណ្តាប់ធ្នាប់ របៀបរៀបរយ គោរពច្បាប់ចរាចរណ៍រាល់ពេលធ្វើដំណើរ បើកបរយានយន្តគ្រប់ប្រភេទ។ បញ្ហាគ្រោះថ្នាក់ចរាចរណ៍ផ្លូវគោកជាបញ្ហាចម្បងដែលរាជរដ្ឋាភិបាល កំពុងមានការយកចិត្តទុកដាក់ និងព្រួយបារម្ភយ៉ាងខ្លាំង ដោយសារវាបានបង្កឱ្យមានរបួសស្នាម និងបាត់បង់អាយុជីវិតប្រជាពលរដ្ឋ និងខូចខាតទ្រព្យសម្បត្តជាច្រើនក្នុងមួយឆ្នាំៗ និងបានបន្សល់ទុកនូវស្រី្តមេម៉ាយ កូនកំព្រា ជនពិការជាច្រើន ក្នុងសង្គមជាតិផងដែរ។ ក្នុងឱកាសនោះ លោក ក៏បានសំណូមពរដល់អាជ្ញាធរ មានសមត្ថកិច្ចគ្រប់លំដាប់ថ្នាក់ ត្រូវខិតខំពង្រឹង រឹតបណ្តឹងការអនុវត្តច្បាប់ចរាចរណ៍ឱ្យមានប្រសិទ្ធភាព សម្រាប់ជំរុញការកាត់បន្ថយគ្រោះថ្នាក់ចរាចរណ៍ ឱ្យស្ថិតនៅមានកម្រិតទាបបំផុត។

លោកក៏បានអំពាវនាវដល់ប្រជាពលរដ្ឋ សិស្សានុសិស្សទាំងអស់ ជាពិសេសអ្នកបើកយាន្តជំនិះគ្រប់ប្រភេទ ត្រូវស្វែងយល់ និងអនុវត្តឱ្យបានខ្ជាប់ខ្ជួននូវបទប្បញ្ញត្តិ ដែលបានចែងក្នុងច្បាប់ស្តីពីចរាចរណ៍ផ្លូវគោកមានដូចជា ត្រូវមានស្លាកសម្គាល់យានយន្ត ត្រូវមានប័ណ្ណបើកបរ អ្នកបើកត្រូវមានស្មារតីប្រុងប្រយ័ត្នខ្ពស់ ត្រូវពាក់មួក និងខ្សែក្រវ៉ាត់ការពារសុវត្ថភាពជាដាច់ខាតក្នុងពេលបញ្ជាយានយន្ត  មិនត្រូវបើកបរហួសល្បឿន និងផ្ទុកមនុស្ស ឬទំនិញលើសចំណុះ កបើកបរពេលពិសារគ្រឿងស្រវឹង និងត្រូវមានអធ្យាស្រ័យគ្នាទៅវិញទៅមកក្នុងពេលធ្វើចរាចរណ៍។               

លោក ហួត ហៃ អភិបាលរងស្រុកពញាឮ បានការគាំទ្រចំពោះមន្ទីរទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច ដែលបានចុះមកពន្យល់ និងផ្សព្វផ្សាយច្បាប់ចរាចរណ៏ផ្លូវគោក ដល់សាធារណៈជនគ្រប់មជ្ឈដ្ឋាន ពិសេសបានផ្សព្វផ្សាយដល់សិស្សានុសិស្ស  ឱ្យបានយល់ជ្រួតជ្រាប ក្នុងន័យចូលរួមជួយកាត់បន្ថយ និងឈានទៅដល់ការលុបបំបាត់ទាំងស្រុងនូវរាល់គ្រោះថ្នាក់ចរាចរណ៍ក្នុងប្រទេសកម្ពុជា។ លោកអភិបាលរងស្រុកក៏បានធ្វើការរំលឹកដល់សិស្សានុសិស្សត្រូវខិតខំអនុវត្ត និងជួយផ្សព្វផ្សាយបន្តឱ្យបានទូលំទូលាយអំពីខ្លឹមសារសំខាន់់ៗនៃច្បាប់នេះ ត្រូវចងចាំថាបើស្រវឹងកុំបើកបរ បើបើកបរកុំផឹងគ្រឿងស្រវឹង មុន និងចេញដំណើរត្រូវពិនិត្យយានយន្តពាក់មួកសុវត្ថិភាព និងដាក់ខ្សែក្រវ៉ាត់ឱ្យបានត្រឹមត្រូវមុនចេញដំណើរ។

សូមបញ្ជាក់ផងដែរថា យោងតាមច្បាប់ស្ដីពីចរាចរណ៍ផ្លូវគោក មាត្រាទី៧៦ បានចែងថា ជនណាបើកបរមិនព្រមបញ្ឈប់យានយន្តនេះតាមការបញ្ជារបស់លោកមន្ត្រីនគរបាលចរាចរណ៍ផ្លូវគោកដើម្បីធ្វើតេស្តពិនិត្យជាតិអាល់កុល ឬសារធាតុញៀនត្រូវផ្ដន្ទាទោសដាក់ពន្ធនាគារពី ពី៦ថ្ងៃទៅ១ខែ និងពិន័យជាប្រាក់ពី ១សែនរៀលទៅ ៨សែនរៀល។ មាត្រាទី៨០ ជនណារារាំង ឬប្រើប្រាស់មធ្យោបាយណាមួយដើម្បីជាឧបសគ្គដល់ចរាចរណ៍សាធារណៈត្រូវផ្ដន្ទាទោសដាក់ពន្ធនាគារពី ១ខែទៅ១ឆ្នាំ និងពិន័យជាប្រាក់ពី ៨សែនរៀលទៅ៨លានរៀល៕

ដោយ ណយ នឿន (ប្រភព៖ រដ្ឋបាលខេត្តកណ្តាល)