AKP ភ្នំពេញ ថ្ងៃទី០៦ ខែឧសភា ឆ្នាំ២០២៥ -- នាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម (Anwar Ibrahim) បាននិយាយកាលពីថ្ងៃចន្ទថាប្រទេសរបស់លោកបានត្រៀមខ្លួនរួចជាស្រេចដើម្បី «ដើរតួនាទី» សម្រាប់សន្តិភាពរវាងប៉ាគីស្ថាន និងឥណ្ឌា ខណៈដែលអ្នកការទូតកំពូលរបស់ប្រទេសអ៊ីរ៉ង់បានទៅបំពេញទស្សនកិច្ចនៅទីក្រុងអ៊ីស្លាម៉ាបាដ ដើម្បីជួបមេដឹកនាំប៉ាគីស្ថាន។

បន្ទាប់ពីកិច្ចពិភាក្សាតាមទូរស័ព្ទជាមួយសមភាគីប៉ាគីស្ថាន លោក ស្សេបាស់ ស្សារីហ្វ (Shehbaz Sharif) កាលពីថ្ងៃអាទិត្យ លោក អាន់វ៉ា បានបញ្ជាក់អំពីការគាំទ្ររបស់ប្រទេសម៉ាឡេស៊ីសម្រាប់ការស៊ើបអង្កេតដោយឯករាជ្យ និងតម្លាភាព ដើម្បីកំណត់អត្តសញ្ញាណអ្នកដែលទទួលខុសត្រូវចំពោះការវាយប្រហារកាលពីថ្ងៃទី២២ ខែមេសា នៅឯរមណីយដ្ឋានទេសចរណ៍ប៉ាហាល់ហ្កាម ក្នុងតំបន់កាស្មៀរដែលគ្រប់គ្រងដោយឥណ្ឌាដែលបានសម្លាប់មនុស្សចំនួន ២៦នាក់។

លោកបាននិយាយនៅក្នុងបណ្តាញសង្គមអ៊ិច (X) ថា «ប្រទេសម៉ាឡេស៊ីនៅតែបើកចំហក្នុងការដើរតួនាទីស្ថាបនា ប្រសិនបើមានតម្រូវការ។ យើងជឿថា ទំនាក់ទំនងជិតស្និទ្ធរបស់យើងជាមួយប៉ាគីស្ថាន និងឥណ្ឌា នឹងធ្វើឱ្យពួកយើងស្ថិតនៅក្នុងតួនាទីមួយដែលគាំទ្រដល់កិច្ចខិតខំប្រឹងប្រែងឆ្ពោះទៅរកសន្តិភាព និងស្ថិរភាពក្នុងតំបន់»។

ដោយឡែក ​អ្នកការទូត​កំពូល​អ៊ីរ៉ង់​លោក អាប់បាស់ អារ៉ាកជី (Abbas Araghchi) បានទៅ​បំពេញ​ដំណើរ​ទស្សនកិច្ច​ផ្លូវការ​នៅ​ទីក្រុង​អ៊ីស្លាម៉ាបាដជា​កន្លែង​ដែល​លោក​នឹង​ជួប​ជាមួយមន្ត្រី​កំពូល​ប៉ាគីស្ថាន នៅរយៈពេលតែប៉ុន្មាន​ថ្ងៃប៉ុណ្ណោះ​បន្ទាប់​ពី​លោក​បាន​ផ្តល់​ការ​សម្រុះសម្រួល​ដើម្បី​កាត់បន្ថយ​ភាព​តានតឹង​រវាង​មហាអំណាច​នុយក្លេអ៊ែរ​ទាំងពីរ។

លោក អារ៉ាកជី គ្រោងនឹងជួបជាមួយលោកប្រធានាធិបតី អាស៊ីហ្វ អាលី ហ្សាដារី (Asif Ali Zardari) លោកនាយករដ្ឋមន្ត្រី ស្សារីហ្វ និងលោករដ្ឋមន្ត្រីការបរទេស អ៊ីសាក ដារ (Ishaq Dar)។ នេះបើយោងតាមក្រសួងការបរទេសប៉ាគីស្ថានបានចេញផ្សាយ។

ថ្លែងទៅកាន់អ្នកសារព័ត៌មាននៅពេលទៅដល់ទីក្រុងអ៊ីស្លាម៉ាបាដលោក អារ៉ាកជី បានជំរុញឱ្យកាត់បន្ថយភាពតានតឹងរវាងទីក្រុងអ៊ីស្លាម៉ាបាដនិងទីក្រុងញូវដេលី ហើយបានអំពាវនាវឱ្យភាគីទាំងអស់អនុវត្តការអត់ធ្មត់និងទប់ស្កាត់ការកើនឡើងភាពតានតឹង។ នេះបើយោងតាមទីភ្នាក់ងារសារព័ត៌មានអ៊ីរ៉ង់ IRNA។

លោកក៏ត្រូវបានគេរំពឹងទុកផងដែរថានឹងធ្វើដំណើរទៅកាន់ទីក្រុងញូវដេលី បន្ទាប់ពីកិច្ចប្រជុំរបស់លោកជាមួយថ្នាក់ដឹកនាំប៉ាគីស្ថាន។

ភាព​តានតឹង​កំពុង​កើនឡើង​ខ្លាំង​រវាង​ប្រទេស​ជិតខាង​ដែល​មាន​អាវុធ​នុយក្លេអ៊ែរ ​បន្ទាប់​ពី​ការ​វាយ​ប្រហារ​នៅតំបន់​កាស្មៀរ៕

ដោយ៖ យា ចិន្ដាខន្ដី (ប្រភព៖ AA-AKP)