AKP ភ្នំពេញ ថ្ងៃទី០៦ ខែឧសភា ឆ្នាំ២០២៥ -- នាយកដ្ឋានទំនាក់ទំនងរបស់ប្រទេសតួកគី បាននិយាយថា ប្រធានាធិបតីតួកគី លោក រេសេប តាយយីប អឺដូហ្គែន (Recep Tayyip Erdogan) និងសមភាគីសហរដ្ឋអាមេរិក លោកដូណាល់ ត្រាំ (Donald Trump) បានពិភាក្សាគ្នាកាលពីថ្ងៃចន្ទ អំពីបញ្ហាក្នុងតំបន់ និងពិភពលោក ក៏ដូចជាទំនាក់ទំនងទ្វេភាគី។

នៅក្នុងការជជែកពិភាក្សាគ្នាតាមទូរស័ព្ទ លោក អឺដូហ្គែន បានអញ្ជើញលោក ត្រាំ ឱ្យទៅបំពេញទស្សនកិច្ចនៅប្រទេសតួកគី។

មេដឹកនាំតួកគីបានប្រាប់លោក ត្រាំ ថា​ ទីក្រុងអង់ការ៉ានឹងបន្តចាត់វិធានការដើម្បីជំរុញកិច្ចសហប្រតិបត្តិការជាមួយទីក្រុងវ៉ាស៊ីនតោនជាពិសេសនៅក្នុងវិស័យឧស្សាហកម្មការពារជាតិ។

វិបត្តិមនុស្សធម៌នៅតំបន់ហ្គាហ្សាបានឈានដល់កម្រិតធ្ងន់ធ្ងរ ដោយលោក អឺដូហ្គែន បានប្រាប់ទៅលោក ត្រាំ ដោយបានសម្តែងនូវការត្រៀមខ្លួនរួចជាស្រេចរបស់ទីក្រុងអង់ការ៉ាក្នុងការផ្តល់ការគាំទ្រសម្រាប់ការផ្តល់ជំនួយ និងការបង្កើតសន្តិភាពយូរអង្វែង។

ដោយបង្ហាញពីការគាំទ្រចំពោះវិធីសាស្រ្តរបស់លោក ត្រាំ ក្នុងការបញ្ចប់សង្គ្រាម លោក អឺដូហ្គែន បាននិយាយថា ប្រទេសតួកគីកោតសរសើរចំពោះកិច្ចខិតខំប្រឹងប្រែងដែលបានធ្វើឡើងនៅក្នុងដំណើរការនៃកចិ្ចចរចាជាមួយអ៊ីរ៉ង់ និងឆ្ពោះទៅរកដំណោះស្រាយនៃសង្គ្រាមរុស្ស៊ី-អ៊ុយក្រែន។

លោក អឺដូហ្គែន បាននិយាយបន្ថែមថា ទីក្រុងអង់ការ៉ាកំពុងធ្វើការដើម្បីការពារបូរណភាពទឹកដីរបស់ប្រទេសស៊ីរី និងធានាស្ថិរភាពរបស់ខ្លួនដោយសង្កត់ធ្ងន់ទៅលើសារៈសំខាន់នៃកិច្ចខិតខំប្រឹងប្រែងរបស់សហរដ្ឋអាមេរិកក្នុងការបន្ធូរបន្ថយទណ្ឌកម្មលើប្រទេសស៊ីរី ដើម្បីរួមចំណែកនៅក្នុងដំណើរការនេះ។

លោកបាន​គូសបញ្ជាក់​ថា ស្ថិរភាព​ស៊ី​រី​នឹង​ជួយ​ដល់​សន្តិភាព​ក្នុង​តំបន់និង​ពិភពលោក៕

ដោយ៖ យា ចិន្ដាខន្ដី (ប្រភព៖ AA-AKP)