AKP ភ្នំពេញ ថ្ងៃទី០៦ ខែឧសភា ឆ្នាំ២០២៥ -- រដ្ឋាភិបាលទីក្រុងសេអ៊ូលនឹងបញ្ជូនអ្នកស្ម័គ្រចិត្តចំនួន ១៣០នាក់ទៅកាន់ប្រទេសអ៊ូសបេគីស្ថាន និងឡាវដើម្បីជួយដល់សហគមន៍ក្រីក្រនៅក្នុងឆ្នាំនេះ ដែលជាផ្នែកមួយនៃកម្មវិធីយុវជនរបស់ខ្លួន។

យោងតាមមន្ត្រីបានឱ្យដឹងថា ពាក្យស្នើសុំសម្រាប់កម្មវិធីនេះកំពុងត្រូវបានប្រមូលរហូតដល់ថ្ងៃទី២០ ខែឧសភា។ អ្នករស់នៅក្នុងទីក្រុងដែលមានអាយុចាប់ពី ១៩ឆ្នាំ ទៅ ៣៩ឆ្នាំ អាចចូលរួមក្នុងកម្មវិធីនេះបាន។ អ្នកដែលត្រូវបានជ្រើសរើសនឹងទទួលបានការបណ្តុះបណ្តាលមុនពេលទៅទស្សនកិច្ចនៅទីក្រុងតាស្កិនត៍របស់ប្រទេសអ៊ូសបេគីស្ថាន និងទីក្រុងវៀងចន្ទន៍របស់ប្រទេសឡាវ នៅចន្លោះខែកក្កដា និងខែសីហា។

ពួកគេនឹងត្រូវបានផ្តល់ជូននូវសំបុត្រយន្តហោះទៅមកដោយឥតគិតថ្លៃអាហារ កន្លែងស្នាក់នៅ និងសាច់ប្រាក់មួយចំនួន។

ពេលស្នាក់នៅក្នុងទីក្រុងទាំងនោះ អ្នកស្ម័គ្រចិត្តទាំងអស់នឹងចូលរួមក្នុងគម្រោងផ្សេងៗ ដូចជាការជួសជុល និងកែលម្អហេដ្ឋារចនាសម្ព័ន្ធ និងការបង្រៀនកុមារក្នុងស្រុកអំពីវប្បធម៌កូរ៉េខាងត្បូង។

ទីក្រុងតាស្កិនត៍ ត្រូវបានជ្រើសរើសជាទិសដៅមួយរបស់កម្មវិធីនៅក្នុងឆ្នាំនេះ ដើម្បីរំលឹកខួបលើកទី១៥ នៃទំនាក់ទំនងរវាងទីក្រុងនេះជាមួយទីក្រុងសេអ៊ូល ខណៈដែលទីក្រុងវៀងច័ន្ទន៍ត្រូវបានជ្រើសរើសដោយទទួលស្គាល់នូវភាពជាដៃគូរយៈពេល ១០ឆ្នាំរបស់ទីក្រុងនេះ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)