AKP កំពង់ចាម ថ្ងៃទី០៦ ខែឧសភា ឆ្នាំ២០២៥ -- លោកស្រី ប៉ាង ដានី អភិបាលរងខេត្តកំពង់ចាម បានលើកឡើងថា ស្ដ្រីដាច់ខាតនៅតែជាកម្លាំងចលករដ៏មានតម្លៃដែលមិនអាចខ្វះបានក្នុងការចូលរួមចំណែក ក្នុងការដឹកនាំ និងអភិវឌ្ឍរបស់ប្រទេសជាតិ។ សូម្បីតែក្នុងប្រវត្តិសាស្ត្រ របស់ខ្មែរយើង តាំងតែពីយូរលង់មកហើយក៏បង្ហាញពីតម្លៃរបស់នារី ក្នុងការដឹកនាំ អភិវឌ្ឍសង្គមសេដ្ឋកិច្ចជាតិដែរ។

លោកស្រីអភិបាលរងបានថ្លែងដូច្នេះក្នុងកិច្ចដឹកនាំកិច្ចប្រជុំស្ដីពីការពង្រឹងការអនុវត្តតួនាទីភារកិច្ចរបស់ថ្នាក់ដឹកនាំជាស្ត្រី ខេត្តកំពង់ចាម នាព្រឹកថ្ងៃទី០៦ ខែឧសភា ឆ្នាំ២០២៥ នៅសាលប្រជុំសាលាខេត្តកំពង់ចាម ដោយមានការចូលរួមពីលោកជំទាវជាសមាជិកក្រុមប្រឹក្សាខេត្ត លោកស្រីជាប្រធាននាយករងនៃរដ្ឋបាលសាលាខេត្ត លោកស្រីជាប្រធានអនុប្រធានតាមមន្ទីរអង្គភាពជុំវិញខេត្ត និងលោកស្រីអភិបាលរងក្រុង-ស្រុកទាំង១០ខេត្តកំពង់ចាម។

លោកស្រីបានបញ្ជាក់ថា កិច្ចប្រជុំនេះធ្វើឡើងក្នុងគោលបំណងដើម្បីពង្រឹងភាពជាថ្នាក់ដឹនាំស្ដ្រីក្នុងខេត្តកំពង់ចាម ជាពិសេសគឺស្ត្រីជាអភិបាលរងក្រុង-ស្រុកទាំង១០ ដែលកំពុងអនុវត្តន៍ការងារនៅតាមមូលដ្ឋានរបស់ខ្លួន ព្រោះស្ដ្រី យើងបាន និងកំពុងរួមចំណែកក្នុងចលនាសង្គមយ៉ាងសស្រាក់សស្រាំ ពិសេសជួយដោះស្រាយបញ្ហាលំបាកផ្សេងៗ ក្នុងសង្គមជាតិ។ ជាក់ស្តែងក្រោមការដឹកនាំរបស់រាជរដ្ឋាភិបាលកម្ពុជាយើង បងប្អូននារីបានបំពេញការងារ និងចូលខ្លួនប្រឡូកក្នុងវិស័យការងារជាច្រើនដូចជា ក្នុងសមាជិកព្រឹទ្ធសភា  រដ្ឋសភា រាជរដ្ឋាភិបាល គ្រូបង្រៀន វេជ្ជបណ្ឌិត គ្រូពេទ្យ នយោជិត និយោជក សហគ្រិន មេឃុំ ស្មៀនឃុំ សិល្បករ ប្រធានសមាគម សហជីព  និងថ្នាក់ដឹកនាំសំខាន់ៗដទៃជាច្រើនទៀត ដែលជាបងប្អូនស្ត្រីរបស់យើង។ ដូច្នេះ ស្ត្រីនៅតែដើរតួ និងមិនអាចខ្វះបានក្នុងការដឹកនាំ និងអភិវឌ្ឍរបស់ប្រទេសជាតិ៕

ដោយ ឆាយ ម៉ុត