AKP ភ្នំពេញ ថ្ងៃទី០២ ខែឧសភា ឆ្នាំ២០២៥ -- នៅពេលនេះ ប្រជាជននៅទីក្រុងសេអ៊ូលអាចរីករាយជាមួយនឹងការជិះទូកកាយ៉ាក់ ជិះទូកកម្សាន្ត និងជិះទូកក្តោងនៅលើទន្លេហាន (Han) ជាមួយនឹងការចូលទៅកាន់ការថែទាំនាវាផ្ទាល់ខ្លួន និងកន្លែងផ្ទុកឧបករណ៍ បន្ទាប់ពីការដាក់ឱ្យដំណើរការកាលពីថ្ងៃព្រហស្បតិ៍នៃមជ្ឈមណ្ឌលកីឡាទឹកទីក្រុងសេអ៊ូលដោយរដ្ឋាភិបាលទីក្រុងសេអ៊ូល។

មជ្ឈមណ្ឌលនេះមានទីតាំងនៅឧទ្យានទន្លេហានណានជី នៅភាគខាងជើងនៃទន្លេហាន ក្បែរឧទ្យានពានរង្វាន់ពិភពលោក ហើយបើកប្រចាំថ្ងៃពីម៉ោង ១០:00ព្រឹកដល់ម៉ោង ៧:០០យប់ លើកលែងតែថ្ងៃច័ន្ទ។

អ្នកគ្រប់គ្នាអាចរីករាយនឹងការជិះទូកកាយ៉ាក់ នាវា ឬទូកក្តោងនៅមជ្ឈមណ្ឌលកីឡាក្នុងទឹកក្នុងតម្លៃពី ១០.០០០វ៉ុន ទៅ ៨០.០០០វ៉ុន (ពី ៧ ទៅ៥៦ដុល្លារអាម៉េរិក)។

កម្មវិធីកីឡាក្នុងទឹកទាំងអស់អាចចូលលេងបានបន្ទាប់ពីចូលរួមវគ្គបណ្តុះបណ្តាលសុវត្ថិភាពកីឡាក្នុងទឹកជាមួយអ្នកជំនាញ។

កម្មវិធីជិះទូកកាយ៉ាក់ ដំណើរការពីថ្ងៃត្រង់ដល់ ៣០នាទីមុនពេលថ្ងៃលិច។ វគ្គនីមួយៗមានរយៈពេលពីរម៉ោង ហើយអាចទទួលមនុស្សបានរហូតដល់ ១០នាក់ក្នុងមួយម៉ោង។

បទពិសោធន៍ជិះទូកក្តោងត្រូវបានបើកសម្រាប់មនុស្សដែលមានអាយុចាប់ពី ១៤ឆ្នាំឡើងទៅ។ ការកក់ទុកជាមុនអាចធ្វើបានលុះត្រាតែមានអ្នកចូលរួមយ៉ាងតិច ៥នាក់ ហើយវគ្គដែលអាចចូលរួមបានមានទាំងកម្រិតចាប់ផ្តើម កម្រិតមធ្យម និងកម្រិតខ្ពស់ ដែលមានរយៈពេល ៤ម៉ោង។

បទពិសោធន៍ជិះទូកកម្សាន្តក៏អនុញ្ញាតសម្រាប់អ្នកដែលមានអាយុចាប់ពី១៤ឆ្នាំឡើងទៅដែរ ហើយត្រូវបានបែងចែកទៅជាកម្រិតរាក់ និងកម្រិតជ្រៅ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)