AKP ភ្នំពេញ ថ្ងៃទី០២ ខែឧសភា ឆ្នាំ២០២៥ -- បន្ទាប់ពីកិច្ចប្រជុំគណៈរដ្ឋមន្ត្រីថៃកាលពីថ្ងៃទី២៩ ខែមេសា នាយករដ្ឋមន្ត្រីថៃ លោកស្រី ផែថុងថាន ស៊ីណាវ៉ាត្រា (Paetongtarn Shinawatra) បានណែនាំដល់ក្រសួងសំខាន់ៗមួយចំនួនឱ្យបង្កើនសន្តិសុខសេដ្ឋកិច្ចក្នុងក្របខ័ណ្ឌកិច្ចសហប្រតិបត្តិការក្នុងតំបន់ ជាពិសេសអាស៊ាន ដើម្បីឆ្លើយតបទៅនឹងភាពមិនច្បាស់លាស់ជុំវិញគោលនយោបាយពន្ធគយរបស់សហរដ្ឋអាមេរិក។

នាយករដ្ឋមន្ត្រីថៃបាននិយាយថា បណ្តាមេដឹកនាំមកពីប្រទេសជាសមាជិកអាស៊ានមួយចំនួន ដែលរួមម៉ាឡេស៊ី និងកម្ពុជា បានពិភាក្សាគ្នាអំពីបញ្ហានេះ ហើយបានឯកភាពគ្នាថា រដ្ឋជាសមាជិកគួរតែធ្វើការងាររួមគ្នាដោយប្រើប្រាស់កម្លាំងផ្ទាល់ខ្លួន ដូចជាធនធានធម្មជាតិ ការតភ្ជាប់បណ្តាញដឹកជញ្ជូន និងសក្តានុពលធនធានមនុស្ស ដើម្បីស្វែងរកលទ្ធផលរួមដែលល្អបំផុត។

លោកស្រីបានណែនាំដល់ក្រសួងការបរទេស ក្រសួងពាណិជ្ជកម្ម និងក្រសួងហិរញ្ញវត្ថុ រួមជាមួយនឹងក្រុមការងារគោលនយោបាយពាណិជ្ជកម្មរបស់សហរដ្ឋអាមេរិក ដើម្បីប្រមូលផ្តុំការយល់ដឹងពីគ្រប់វិស័យ និងបង្កើតវិធានការដែលឆ្លុះបញ្ចាំងពីកម្លាំងរួមរបស់អាស៊ាន។

ទន្ទឹមនឹងនេះដែរ រដ្ឋលេខាធិការអចិន្ត្រៃយ៍ក្រសួងហិរញ្ញវត្ថុ លោក ឡាវ៉ារ៉ុន សាងស្និទ (Lavaron Sangsnit) បានទទួលស្គាល់ថា ការសម្រេចបាននូវគោលដៅកំណើនផលិតផលក្នុងស្រុកសរុប (GDP) ចំនួន ៣% របស់ប្រទេសថៃសម្រាប់ឆ្នាំ២០២៥ អាចជាបញ្ហាប្រឈមដោយសារតែផលប៉ះពាល់នៃពន្ធគយរបស់សហរដ្ឋអាមេរិក។ លោក​បាន​កត់​សម្គាល់​ថា ភាព​តានតឹង​ផ្នែក​សេដ្ឋកិច្ច​រវាង​សហរដ្ឋអាមេរិក និង​ចិន​ ត្រូវ​បាន​គេ​រំពឹង​ថា​នឹង​មាន​ផល​ប៉ះពាល់​ជា​សកល និង​ប៉ះពាល់​ដល់​សេដ្ឋកិច្ច​របស់​ប្រទេស​ថៃ។

លោក ឡាវ៉ារ៉ុន ក៏បានចង្អុលបង្ហាញផងដែរថា ខណៈដែលឱនភាពពាណិជ្ជកម្មគឺជាកង្វល់ចម្បងក្នុងកិច្ចពិភាក្សាពន្ធ សហរដ្ឋអាមេរិកពិចារណាទៅលើកត្តាបន្ថែម ដូចជាគោលនយោបាយការបរទេស និងសន្តិសុខជាតិជាដើម។ ដូច្នេះហើយ លោក​បាន​តស៊ូ​មតិ​នូវ​វិធីសាស្ត្រ​ពហុ​ក្រសួង​ក្នុងកិច្ច​ចរចា ដោយ​មាន​រដ្ឋមន្ត្រីក្រសួង​ហិរញ្ញវត្ថុ​ជា​អ្នក​ដឹកនាំ​កិច្ចខិតខំប្រឹងប្រែងនោះ​។

ទាក់ទងនឹងគោលនយោបាយរូបិយវត្ថុ លោក ឡាវ៉ារ៉ុន បានបង្ហាញថាគណៈកម្មាធិការគោលនយោបាយរូបិយវត្ថុរបស់ធនាគារកណ្តាលថៃ បានទទួលទិន្នន័យថ្មីដើម្បីណែនាំដល់ការសម្រេចទៅលើអត្រាការប្រាក់ ដើម្បីឆ្លើយតបទៅនឹងការប្រែប្រួលសេដ្ឋកិច្ច។ គណៈកម្មាធិការ​នេះ​ត្រូវ​បាន​គេ​រំពឹង​ថា​នឹង​បញ្ចុះ​អត្រា​ការ​ប្រាក់​ដើម្បី​គាំទ្រ​ដល់​ស្ថិរភាព​សេដ្ឋកិច្ច៕

ដោយ៖ យា ចិន្ដាខន្ដី (ប្រភព៖ VNA)