AKP ភ្នំពេញ ថ្ងៃទី០២ ខែឧសភា ឆ្នាំ២០២៥ -- រដ្ឋមន្ត្រីក្រសួងសេដ្ឋកិច្ចឥណ្ឌូណេស៊ី លោក អ៊ែរឡាងហ្កា ហាតាតូ (Airlangga Hartarto) បាននិយាយកាលពីពេលថ្មីៗនេះថា បន្ទាប់ពីចូលរួមកិច្ចប្រជុំរវាងសមាគមធុរកិច្ចកូរ៉េខាងត្បូង និងប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីអាន់តូ (Prabowo Subianto) បណ្តាក្រុមហ៊ុនរបស់កូរ៉េខាងត្បូងនឹងបង្កើនការវិនិយោគរបស់ពួកគេនៅក្នុងប្រទេសឥណ្ឌូណេស៊ី​នូវទឹកប្រាក់ចំនួន ១,៧ពាន់លានដុល្លារអាម៉េរិក។

លោក អ៊ែរឡាងហ្កា បាននិយាយថា ការកើនឡើងនៃទឹកប្រាក់ដែលបានគ្រោងទុកនេះ គឺស្មើនឹងជាង ១០% នៃទឹកប្រាក់ ១៥,៤ពាន់លានដុល្លារអាម៉េរិក ដែលក្រុមហ៊ុនកូរ៉េខាងត្បូងបានវិនិយោគរួចហើយនៅក្នុងប្រទេសឥណ្ឌូណេស៊ី។

ការិយាល័យរបស់លោកប្រធានាធិបតី ប្រាបូវ៉ូ បាននិយាយថា លោកប្រធានាធិបតីបានជួបជាមួយបណ្តាក្រុមហ៊ុនធុរកិច្ចកូរ៉េខាងត្បូងជាងដប់បួនក្រុមហ៊ុនដែលបានបណ្តាក់ទុននៅក្នុងប្រទេសឥណ្ឌូណេស៊ី ដែលរួមមានទាំងក្រុមហ៊ុន Lotte Corporation ក្រុមហ៊ុនដែកថែប POSCO Holdings ក្រុមហ៊ុនផលិតកញ្ចក់ KCC Glass Corporation និងក្រុមហ៊ុនផលិតយានយន្ត Hyundai Motor Group ។

លោក អ៊ែរឡាងហ្កា បាននិយាយថា ក្រុមហ៊ុន POSCO និងក្រុមហ៊ុនKCC Glass គឺស្ថិតក្នុងចំណោមក្រុមហ៊ុនដែលគ្រោងវិនិយោគថ្មីនោះ ប៉ុន្តែមិនបានផ្តល់នូវព័ត៌មានលម្អិតបន្ថែមទេ។

លោក អ៊ែរឡាងហ្កា បាននិយាយថា ការវិនិយោគទឹកប្រាក់ចំនួន៣,៩ពាន់លានដុល្លារអាម៉េរិកទៅលើរោងចក្រគីមីឥន្ធនៈខ្នាតធំរបស់ក្រុមហ៊ុនLotte Chemical Corp នៅក្នុងប្រទេសឥណ្ឌូណេស៊ី ត្រូវបានគេរំពឹងថានឹងចាប់ផ្តើមដំណើរការនៅក្នុងខែកញ្ញា ឬខែតុលាឆ្នាំនេះ៕

ដោយ៖ យា ចិន្ដាខន្ដី (ប្រភព៖ VNA)