AKP ភ្នំពេញ ថ្ងៃទី៣០ ខែមេសា ឆ្នាំ២០២៥ -- ប្រព័ន្ធផ្សព្វផ្សាយរដ្ឋកូរ៉េខាងជើងបានរាយការណ៍កាលពីថ្ងៃអង្គារថា គណៈប្រតិភូយោធារបស់ប្រទេសកូរ៉េខាងជើងបានធ្វើដំណើរទៅប្រទេសរុស្ស៊ីដើម្បីចូលរួមព្រឹត្តិការណ៍អន្តរជាតិមួយ បន្ទាប់ពីទីក្រុងព្យុងយ៉ាងបានបញ្ជាក់ជាលើកដំបូងថាខ្លួនបានដាក់ពង្រាយកងទ័ពទៅកាន់ប្រទេសរុស្ស៊ីដើម្បីប្រយុទ្ធជាមួយអ៊ុយក្រែននៅតំបន់ឃឺស។

ទីភ្នាក់ងារសារព័ត៌មានកណ្តាលកូរ៉េខាងជើង (KCNA) បាននិយាយថា ដឹកនាំដោយលោក ប៉ាក់ យ៉ុងអ៊ីល (Pak Young-il) អនុប្រធានការិយាល័យនយោបាយទូទៅនៃកងទ័ពប្រជាជនកូរ៉េខាងជើង គណៈប្រតិភូបានធ្វើដំណើរពីទីក្រុងព្យុងយ៉ាងដើម្បីចូលរួមព្រឹត្តិការណ៍ប្រឆាំងហ្វាស៊ីសអន្តរជាតិក្នុងប្រទេសរុស្ស៊ី។

ការរំពឹងទុកបានកើនឡើងជុំវិញថាតើមេដឹកនាំកូរ៉េខាងជើង លោក គីមជុងអ៊ុន (Kim Jong-un) នឹងធ្វើដំណើរទៅកាន់ប្រទេសរុស្ស៊ីជុំវិញពេលវេលានៃការប្រារព្ធពិធីនេះដែរឬទេ បន្ទាប់ពីការអញ្ជើញពីប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ក្នុងដំណើរទស្សនកិច្ចរបស់លោកទៅកាន់ទីក្រុងព្យុងយ៉ាងកាលពីខែមិថុនាឆ្នាំមុន។

កាលពីថ្ងៃច័ន្ទ ប្រទេសកូរ៉េខាងជើងបានបញ្ជាក់ជាផ្លូវការថា ខ្លួនបានដាក់ពង្រាយកងទ័ពដើម្បីគាំទ្ររុស្ស៊ីក្នុងសង្គ្រាមប្រឆាំងនឹងអ៊ុយក្រែន ខណៈដែលលោក ពូទីន បានចេញសេចក្តីថ្លែងការណ៍អរគុណលោក គីម សម្រាប់ការដាក់ពង្រាយកងទ័ព។

កាលពីថ្ងៃច័ន្ទនោះផងដែរ លោក ពូទីន បាននិយាយថា លោកនឹងប្រកាសបទឈប់បាញ់រយៈពេល ៧២ម៉ោងក្នុងប្រទេសអ៊ុយក្រែនដើម្បីប្រារព្ធទិវាជ័យជំនះ៕

ដោយ៖ មូល មិនា (ប្រភព៖ យ៉ុនហាប់)