AKP ភ្នំពេញ ថ្ងៃទី៣០ ខែមេសា ឆ្នាំ២០២៥ -- អាជ្ញាធរក្នុងតំបន់បាននិយាយកាលពីថ្ងៃអង្គារថា យ៉ាងហោចណាស់មនុស្ស ១៤នាក់ត្រូវបានសម្លាប់នៅក្នុងការវាយប្រហារមួយដោយក្រុមភេរវករដែលសង្ស័យថាបានវាយប្រហារសហគមន៍មួយក្នុងទីក្រុងប័រណូ ដែលជារដ្ឋនៅមួយនៅក្នុងតំបន់ភាគខាងជើងនៃប្រទេសនីហ្សេរីយ៉ា។

លោក ម៉ូឌូ មូស្ដាផា (Modu Mustapha) ប្រធានតំបន់រដ្ឋាភិបាលក្នុងតំបន់ Chibok នៃទីក្រុងប័រណូ បានប្រាប់អ្នកយកព័ត៌មានថា ក្រុមភេរវករត្រូវបានគេសង្ស័យថាជាសមាជិកនៃក្រុម Boko Haram ក្រៅច្បាប់បានសម្រុកចូលសហគមន៍ Chibok ក្នុងអំឡុងពេលការអធិស្ឋានថ្ងៃទីបីកាលពីល្ងាចថ្ងៃច័ន្ទ ហើយបានបាញ់ប្រហារដោយមិនរើសមុខ និងបានសម្លាប់អ្នកកាន់ទុក្ខចំនួន ៧នាក់ភ្លាមៗ។

សាកសពចំនួន ៧នាក់ទៀតត្រូវបានគេរកឃើញកាលពីថ្ងៃអង្គារ ខណៈដែលអ្នកស្ម័គ្រចិត្តក្នុងតំបន់បានប្រមូលផ្តុំគ្នាដើម្បីស្វែងរកអ្នកស្លាប់ និងរបួស។ មនុស្សជាច្រើននាក់ផ្សេងទៀតបានរងរបួសដោយគ្រាប់កាំភ្លើងក្នុងកម្រិតផ្សេងៗគ្នា ក្នុងអំឡុងពេលនៃអំពើហិង្សា។ ផ្ទះ​ជា​ច្រើន​ត្រូវ​បាន​ដុត​បំផ្លាញ​ក្នុង​ពេល​មាន​ការ​វាយ​ប្រហារ។

មន្ត្រីរដ្ឋាភិបាលក្នុងតំបន់បាននិយាយថា អ្នកស្លាប់ និងរបួសកាន់តែច្រើនអាចនឹងត្រូវបានរកឃើញឡើងវិញ ដោយសារតែអ្នកស្ម័គ្រចិត្តនៅតែបន្តស្វែងរកសាកសពបន្ថែមទៀត។

ក្រុម Boko Haram បាននឹងកំពុងសហការជាមួយក្រុមប្អូនស្រីរបស់ខ្លួនក្នុងខេត្តរដ្ឋឥស្លាមនៅតំបន់អាហ្វ្រិកខាងលិចក្នុងការប៉ុនប៉ងបង្កើតរដ្ឋអ៊ីស្លាមនៅភាគឦសានប្រទេសនីហ្សេរីយ៉ា។ ក្រុម​ភេរវជន​ក៏បាន​ពង្រីក​ការ​វាយ​ប្រហារ​របស់​ខ្លួន​ទៅ​កាន់​ប្រទេស​ផ្សេង​ទៀត​នៅ​ជិតព្រំដែនប្រទេស​ឆាដ៕

ដោយ៖ មូល មិនា (ប្រភព៖ ស៊ីនហួ)