AKPកំពង់ធំថ្ងៃទី៣០ ខែមេសា ឆ្នាំ២០២៥--លោក ចាន់ បញ្ញាវ័ន្ត ប្រធានការិយាល័យផលិតកម្មនិងបសុព្យាបាលខេត្តកំពង់ធំនិងមន្រ្តីសហការជាមួយក្រុមការងារមកពីនាយកដ្ឋានផលិតកម្មសត្វនៃអគ្គនាយកដ្ឋានសុខភាពសត្វនិងផលិតកម្មសត្វដើម្បីពិនិត្យវាយតម្លៃលើពាក្យស្នើសុំបង្កើតកសិដ្ឋានបង្កាត់ពូជសត្វ ចិញ្ចឹមសត្វនិងកសិដ្ឋានដែលត្រូវស្នើបង្កើតថ្មីនិងសុំបន្តសុពលភាពនៅកសិដ្ឋានចិញ្ចឹមសត្វដែលមានទីតាំង នៅស្រុកបារាយណ៍ ស្រុកសន្ទុក ស្រុកប្រាសាទបល្ល័ង្ក និងស្រុកកំពង់ស្វាយ ខេត្តកំពង់ធំកាលពីថ្ងៃទី២៩ ខែមេសាឆ្នាំ២០២៥។

លោក ចាន់ បញ្ញាវ័ន្ត បានបង្ហាញពីទីតាំងដែលត្រូវបង្កើតថ្មីកសិដ្ឋានសុំបន្តសុពលភាពមានចំនួន៨គឺ÷១.កសិដ្ឋានចិញ្ចឹមជ្រូកសាច់ខ្នាតមធ្យមរបស់លោក ហោ ទ្រី ស្ថិតនៅភូមិត្នោតជុំឃុំត្នោតជុំ ស្រុកបារាយណ៍(សុំបន្តសុពលភាព)។២.កសិដ្ឋានចិញ្ចឹមជ្រូកសាច់និងមាន់សាច់ខ្នាតធំ របស់លោក លី គឹមពៅ ភូមិអូរគគី ឃុំជ្រាប់ស្រុកសន្ទុក(សុំបន្តសុពលភាព)។៣.កសិដ្ឋានចិញ្ចឹមជ្រូកសាច់ខ្នាតមធ្យម របស់លោក អ៊ុង ភីរម្យ ស្ថិតនៅភូមិសាលាវិស័យ ឃុំសាលាវិស័យ ស្រុកប្រាសាទបល្ល័ង្ក(សុំបន្តសុពលភាព)។ ៤.កសិដ្ឋានចិញ្ចឹមជ្រូកសាច់ខ្នាតមធ្យមរបស់លោក ខឹម សុវណ្ណរិទ្ធស្ថិតនៅភូមិសាលាវិស័យឃុំសាលាវិស័យ ស្រុកប្រាសាទបល្ល័ង្ក(សុំបន្តសុពលភាព)។ ៥.កសិដ្ឋានចិញ្ចឹមជ្រូកសាច់ខ្នាតតូច របស់លោក ជ្រុញ ធុន ស្ថិតនៅភូមិតាព្រៀច ឃុំទីពោ ស្រុកសន្ទុក(សុំបន្តសុពលភាព)។ ៦.កសិដ្ឋានចិញ្ចឹមជ្រូកសាច់ខ្នាតតូច របស់លោក សៀកសុខហៀត ស្ថិតនៅភូមិតាព្រៀចឃុំទីពោ ស្រុកសន្ទុក(សុំបន្តសុពលភាព)។៧.កសិដ្ឋានចិញ្ចឹមទាខ្នាតមធ្យម របស់លោក សុខ កំសានស្ថិតនៅភូមិជ្រាប់ ឃុំជ្រាប់ស្រុកសន្ទុក(សុំបង្កើតថ្មី)និង៨.កសិដ្ឋានចិញ្ចឹមសត្វចម្រុះខ្នាតមធ្យម របស់លោកស្រី ឆូយ រស្មី ស្ថិតនៅភូមិរូង ឃុំត្រពាំងឬស្សី ស្រុកកំពង់ស្វាយ(សុំបង្កើតថ្មី)។

ក្នុងឱកាសនោះលោក ចាន់ បញ្ញាវ័ន្តបានផ្តាំផ្ញើដល់ម្ចាស់កសិដ្ឋានទាំងអស់ ត្រូវតែអនុវត្តនៅច្បាប់លក្ខន្តិកៈរបស់កសិដ្ឋានឱ្យបានត្រឹមត្រូវ។ការចិញ្ចឹមសត្វនិងការបង្កាត់ពូជសត្វធ្វើយ៉ាងណាឱ្យមានគុណភាព សុវត្ថិភាព ក្នុងការទទួលទានរបស់បងប្អូនប្រជាពលរដ្ឋឱ្យមានសុខភាពល្អ។ សូមឱ្យភ្នាក់ងារសុខភាពសត្វភូមិនិងអាជ្ញាធរមូលដ្ឋានចុះផ្សព្វផ្សាយពីជំងឺផ្សេងៗ ដែលឆ្លងទៅដល់សត្វដល់ម្ចាស់កសិដ្ឋានឱ្យមានការប្រុងប្រយ័ត្ន កុំឱ្យជំងឺនោះឆ្លងទៅសត្វដែលកំពុងចិញ្ចឹមនៅក្នុងកសិដ្ឋាន៕

ដោយ៖ ស៊ុម វណ្ណា