AKP ភ្នំពេញ ថ្ងៃទី២៩ ខែមេសា ឆ្នាំ២០២៥--

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តំណាងរាជរដ្ឋាភិបាលកម្ពុជា ថ្ងៃទី២៩ ខែមេសា ឆ្នាំ២០២៥នេះ បានចុះហត្ថលេខាលើអនុស្សរណៈនៃការយោគយល់គ្នារវាងរាជរដ្ឋាភិបាលកម្ពុជា ជាមួយទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងកម្មវិធីស្បៀងអាហារពិភពលោក (WFP) លើគម្រោងគាំទ្រដល់ការពង្រីកកម្មវិធីជាតិផ្តល់អាហារតាមសាលារៀន ដោយប្រើប្រាស់កសិផលសហគមន៍ សម្រាប់អនុវត្តពីឆ្នាំ២០២៥ ដល់ ឆ្នាំ២០២៩ ក្នុងទំហំទឹកប្រាក់បន្ថែមប្រមាណ១០លានដុល្លារអាម៉េរិក ដើម្បីបន្តគាំទ្រដល់ការពង្រីក និងពន្លឿនការធ្វើស្ថាប័នូបនីយកម្មនៃកម្មវិធីជាតិផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍នៅកម្ពុជា។

បើតាមក្រសួងអប់រំ យុវជន និងកីឡា បានឱ្យដឹងថា បច្ចុប្បន្នកម្មវិធីជាតិផ្តល់អាហារតាមសាលារៀន បានផ្តល់អាហារជូនដល់សិស្សានុសិស្សប្រមាណ១៩០,០០០នាក់ នៅតាមសាលាបឋមសិក្សាទូទាំងប្រទេសចំនួន៦៨៦ ក្នុងចំណោម១,១១៤គោលដៅ ហើយថាការវិនិយោគបន្ថែមថ្មីពីរដ្ឋាភិបាលនៃសាធារណរដ្ឋកូរ៉េនាពេលនេះ ជាការកសាងបន្ថែមលើសមិទ្ធផលជាច្រើនបានមកពីការវិនិយោគនៅដំណាក់កាលទី២ ពីឆ្នាំ២០២៥ ដល់ឆ្នាំ២០២៩ និងបានអនុញ្ញាតឱ្យក្រសួងអប់រំ យុវជន និងកីឡា និងកម្មវិធីស្បៀងអាហារពិភពលោកអាចផ្តល់អាហារក្តៅៗ មានជីវជាតិគ្រប់គ្រាន់ជារៀងរាល់ព្រឹក ក្នុងរយៈពេល៥ឆ្នាំបន្តទៀតដល់សិស្សានុសិស្សរៀននៅថ្នាក់មតេ្តយ្យ និងថ្នាក់បឋមសិក្សាប្រមាណ១៣៣,៣០០នាក់ នៅតាមសាលាបឋមសិក្សាចំនួន៤២៨ ដែលនឹងត្រូវផ្ទេរចូលទៅក្នុងកម្មវិធីជាតិផ្តល់អាហារតាមសាលារៀនទៅតាមដំណាក់កាលជាបន្តបន្ទាប់រហូតអស់ទាំងស្រុងនៅត្រឹមឆ្នាំ២០២៨។

នាឱកាសនេះ ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅចំពោះការបន្តការគាំទ្រពីសំណាក់រដ្ឋាភិបាលនៃសាធារណរដ្ឋកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ និងកម្មវិធីស្បៀងអាហារពិភពលោក ដោយបានគូសបញ្ជាក់ពីសារៈសំខាន់នៃកម្មវិធីផ្តល់អាហារតាមសាលារៀន ដែលមិនត្រឹមតែបានធ្វើឱ្យប្រសើរឡើងនូវលទ្ធភាពទទួលបានអាហារូបត្ថម្ភគ្រប់គ្រាន់សម្រាប់កុមារប៉ុណ្ណោះទេ ថែមទាំងជាការវិនិយោគលើអនាគតរបស់ប្រទេសកម្ពុជាទាំងមូល ដោយបានជួយកសាងប្រព័ន្ធអប់រំមួយឱ្យរឹងមាំ មានភាពធន់ជាងមុន និងបានរួមចំណែកគាំទ្រដល់គោលដៅអភិវឌ្ឍន៍ជាតិថែមទៀតផង។

ឯកឧត្តមបានគូសបញ្ជាក់ថា រាជរដ្ឋាភិបាលកម្ពុជាបានបង្ហាញភាពជាអ្នកដឹកនាំ និងការប្តេជ្ញាចិត្តយ៉ាងមុតមាំចំពោះកម្មវិធីជាតិផ្តល់អាហារតាមសាលារៀន ដោយកាលពីខែសីហា ឆ្នាំ២០២៤ រាជរដ្ឋាភិបាលកម្ពុជាបានអនុម័តលើគោលនយោបាយស្តីពីការផ្តល់អាហារតាមសាលារៀន ដែលនេះជាជំហានដ៏សំខាន់ក្នុងការទទួលស្គាល់ជាផ្លូវការនូវតួនាទីកម្មវិធីជាតិផ្ដល់អាហារតាមសាលារៀនក្នុងការរួមចំណែកដល់ការលើកកម្ពស់គុណភាពអប់រំ អាហារូបត្ថម្ភកុមារ វិស័យកសិកម្ម និងកិច្ចគាំពារសង្គម។ កម្មវិធីជាតិផ្តល់អាហារតាមសាលារៀនត្រូវបានបង្កើតឡើងស្របតាមយុទ្ធសាស្រ្តអភិវឌ្ឍន៍មូលធនមនុស្ស និងអាទិភាពនៃយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដើម្បីកសាងមូលធនមនុស្សជំនាន់ក្រោយប្រកបដោយសុខភាព ការអប់រំ និងភាពធន់៕
ដោយ៖ ចាន់ សុភឿន (ប្រភព៖ ក្រសួងអប់រំ)