AKP ភ្នំពេញ ថ្ងៃទី២៩ ខែមេសា ឆ្នាំ២០២៥ -- នាយកដ្ឋានតម្រង់ទិសវិជ្ជាជីវៈនៃក្រសួងអប់រំ យុវជន និងកីឡា ក្រោមកិច្ចសហការជាមួយសមាគមវារីវប្បករកម្ពុជា និងអង្គការ People in Need  ក្រោមការគាំទ្រថវិកាពី Česká rozvojová agentura - CzechAid នៅថ្ងៃទី២៩ ខែមេសា ឆ្នាំ២០២៥ បានសម្របសម្រួលទស្សនកិច្ចសិក្សារបស់សិស្សផ្នែកអប់រំបច្ចេកទេសនៃវិទ្យាល័យចំណេះទូទៅនិងបច្ចេកទេសព្រះបាទសម្ដេចព្រះបរមនាថ នរោត្តម សីហមុនី ខេត្តកំពង់ឆ្នាំង ទៅកាន់កសិដ្ឋានសុវណ្ណរុងរឿង សាខាទី២ ស្ថិតក្នុងនៅភូមិកំពង់អុស ឃុំកំពង់អុស ស្រុកពញាឮ ខេត្តកណ្តាល។ ទស្សនកិច្ចសិក្សានេះត្រូវបានផ្ដោតលើការសិក្សាស្វែងយល់ពីខ្សែច្រវាក់ផលិតកម្មវារីសត្វ ក្រោមការអនុវត្តគម្រោង «ការបញ្ជ្រាបវារីវប្បកម្មក្នុងវិស័យបណ្តុះបណ្តាលវិជ្ជាជីវៈកម្ពុជា» ដោយមានការចូលរួមពីក្រុមការងារបច្ចេកទេសទេសនៃនាយកដ្ឋានតម្រង់ទិសវិជ្ជាជីវៈ តំណាងអង្គការ People in Need តំណាងសមាគមវារីវប្បករកម្ពុជា គណៈគ្រប់គ្រង លោកគ្រូអ្នកគ្រូ និងសិស្សផ្នែកអប់រំបច្ចេកទេសជំនាញបសុវប្បកម្ម ជំនាញកែច្នៃអាហារ ជំនាញក្សេត្រសាស្ត្រ សរុប ៦៥នាក់ ស្រី ៣៧នាក់។

តំណាងក្រុមការងារនាយកដ្ឋានបានបញ្ជាក់ថា កម្មវិធីនេះមានគោលបំណង២សំខាន់គឺ៖ ទី១.  អនុញ្ញាតឱ្យសិស្សបានចុះសិក្សាឈ្វេងយល់ផ្ទាល់នៅទីតាំងកសិដ្ឋាន ស្តីពីទិដ្ឋភាពនៃខ្សែច្រវាក់ផលិតកម្មផ្នែកវារីសត្វ និងទី២. ស្វែងរកការកសាងកិច្ចសហការជាមួយកសិដ្ឋាន ដើម្បីរួមគ្នាអភិវឌ្ឍន៍ផ្នែកអប់រំបច្ចេកទេស ផ្តោតលើការសិក្សាក្នុងពិភពការងារ ការចុះកម្មសិក្សា ទស្សនកិច្ចសិក្សា និងការប្រតិបត្តិជំនាញរបស់សិស្ស និងការផ្តល់ឱកាសការងារ និងផលិតភាពសិស្សផ្នែកអប់រំបច្ចេកទេស។ 

កម្មវិធីនេះពិតជាមានសារៈសំខាន់ណាស់ ដើម្បីកៀរគរការចូលរួមរបស់វិស័យពាក់ព័ន្ធ ពិសេសវិស័យឯកជន ក្នុងការអនុវត្តកម្មវិធី PPPs ដែលជាផ្នែកមួយដ៏មានសារៈសំខាន់ ក្នុងការគាំទ្រ និងការសម្រេចគោលនយោបាយអភិវឌ្ឍសមត្ថភាពយុវជនលើផ្នែកកម្លាំងផលិត សហគ្រិនភាព និងការធានានូវនិរន្តរភាពការងារ ជាអន្ដរាគមន៍ដ៏មានសារៈសំខាន់គាំទ្រដល់ក្មួយៗសិស្សានុសិស្សផ្នែកអប់រំបច្ចេកទេស ដើម្បីពង្រឹងបន្ថែមដល់ប្អូនៗ ក្រៅតែពីជំនាញនៅសាលា ពួកគេបានទៅសិក្សាឈ្វេងយល់ពីទិដ្ឋភាពនៃពិភពការងារផ្ទាល់ ការរៀនសង្កេតពីមូលដ្ឋានគ្រឹះផលិតកម្ម និងព័ត៌មានទីផ្សារការងារ ក៏ដូចជាព័ត៌មានទំនោរការវិវត្តផ្នែកសេដ្ឋកិច្ច សង្គម ដែលជះឥទ្ធិពលដល់តម្រូវការជំនាញនៃកម្លាំងពលកម្មកម្ពុជាយើង។ ដូច្នេះ ក្មួយៗសិស្សានុសិស្សត្រូវមានភាពបុរេសកម្មក្នុងស្មារតីខិតខំប្រឹងប្រែង កែខៃខ្លួនឯងឱ្យប្រសើរឡើង ពោលគឺក្លាយខ្លួនជាមូលធនមនុស្ស ដើម្បីអាចជួយខ្លួនឯង គ្រួសារ និងសង្គមជាតិបាន។ ដូចគ្នាដែរ គណៈគ្រប់គ្រងសាលា គ្រូបង្រៀន ចាំបាច់ណាស់ត្រូវតែខិតខំប្រឹងប្រែងបន្តអនុវត្តន៍ការងារនេះឱ្យកាន់តែល្អប្រសើរ ដើម្បីគុណភាព ប្រសិទ្ធភាព ផលិតភាព និងចីរភាព ។

លោក ផុន សុវណ្ណ ម្ចាស់កសិដ្ឋាន បានលើកឡើងថា កសិដ្ឋានស្វាគមន៍ជានិច្ចក្នុងការកសាងកិច្ចសហការជាមួយក្រសួងអប់រំ យុវជន និងកីឡា សាលារៀន និងអ្នកពាក់ព័ន្ធផ្សេងទៀត ដើម្បីមានឱកាសក្នុងការរួមចំណែកជួយអភិវឌ្ឍដល់យុវជនជំនាន់ក្រោយរបស់កម្ពុជា ពិសេសយុវជនដែលចង់រៀនសូត្រផ្នែកនេះ តាមរយៈការចែករំលែកនូវចំណេះដឹង បទពិសោធន៍ និងបច្ចេកទេស ការផ្តល់កន្លែងទស្សនកិច្ចសិក្សា និងកម្មសិក្សារយៈពេលវែងឬខ្លី និងការគាំទ្រផ្សេងទៀត៕

ដោយ ណយ នឿន (ប្រភព៖ នាយកដ្ឋានតម្រង់ទិសវិជ្ជាជីវៈ)