AKP ភ្នំពេញ ថ្ងៃទី២៩ ខែមេសា ឆ្នាំ២០២៥ -- នាយកគ្រប់គ្រងមូលនិធិរូបិយវត្ថុអន្តរជាតិ (IMF) លោកស្រី គ្រីស្តាលីណា ចចជីវ៉ា (Kristalina Georgieva) បានប្រាប់សារព័ត៌មាន BTA កាលពីថ្ងៃអាទិត្យថា វាកាន់តែមានសារៈសំខាន់ណាស់សម្រាប់ប្រទេសប៊ុលហ្គារីក្នុងការបំពេញតាមលក្ខណៈវិនិច្ឆ័យនៃការចូលក្នុងតំបន់ប្រើប្រាស់រូបិយវត្ថុអឺរ៉ូទាំងមូល ហើយរៀបចំខ្លួនឱ្យមានសណ្តាប់ធ្នាប់នៅពេលបិទកិច្ចប្រជុំនិទាឃរដូវរបស់ IMF និងធនាគារពិភពលោកនៅទីក្រុងវ៉ាស៊ីនតោនឌីស៊ី។

លោកស្រី ចចជីវ៉ា បាននិយាយថា ប្រទេសប៊ុលហ្គារីត្រូវតែបំពេញតាមលក្ខណៈវិនិច្ឆ័យសម្រាប់សមាជិកភាព និងប្រើប្រាស់ឱកាសនេះដើម្បីពង្រឹងការប្រកួតប្រជែងរបស់ខ្លួន។

លោកស្រីក៏បានកត់សម្គាល់ពីតម្រូវការសម្រាប់កំណែទម្រង់នៅក្នុងប្រព័ន្ធសោធននិវត្តន៍ និងពន្ធដារ ដើម្បីធានាបាននូវស្ថិរភាពរយៈពេលវែង។

ទាក់ទងនឹងកិច្ចប្រជុំរបស់ធនាគារពិភពលោក និង IMF លោកស្រី ចចជីវ៉ា បាននិយាយថា ទាំងនេះតែងតែមានប្រយោជន៍ ពីព្រោះសមាជិកអាចពិភាក្សាអំពីស្ថានភាពបច្ចុប្បន្ន និងទិសដៅនៃសេដ្ឋកិច្ចពិភពលោករួមគ្នា ដែលអនុញ្ញាតឱ្យពួកគេយល់កាន់តែច្បាស់អំពីស្ថានភាពពិភពលោក និងនិន្នាការនាពេលអនាគត៕

ដោយ៖ យា ចិន្ដាខន្ដី (ប្រភព៖ BTA)