AKP ភ្នំពេញ ថ្ងៃទី២៨ ខែមេសា ឆ្នាំ២០២៥ -- ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញជាអធិបតីក្នុងពិធីបើកសិក្ខាសាលាស្តីពីការវាយតម្លៃខ្លួនឯងនៃប្រព័ន្ធនិយ័តកម្មឱសថ និងវ៉ាក់សាំង នៅសណ្ឋាគារ ហ្វ៊ែរហ្វៀល បាយ ម៉ារៀត ភ្នំពេញ នាព្រឹកថ្ងៃទី២៨ ខែមេសា ឆ្នាំ២០២៥។ សិក្ខាសាលានេះរៀបចំឡើងដើម្បីវាយតម្លៃនៃប្រព័ន្ធនិយ័តកម្មឱសថ និងវ៉ាក់សាំង ជាសូចនាករមួយសម្រាប់វាស់វែងនូវសមត្ថភាពរបស់អង្គភាពពាក់ព័ន្ធ ដែលបំពេញមុខងារទាក់ទងនឹងការងារគ្រប់គ្រងផលិតផលឱសថ និងវ៉ាក់សាំង ដោយប្រើប្រាស់ឧបករណ៍វាយតម្លៃរបស់អង្គការសុខភាពពិភពលោក (Global Benchmarking Tools: GBT) ដើម្បីកំណត់នូវចំណុចខ្វះខាត និងកំណត់ពីគោលនយោបាយ និយ័តកម្ម និងមុខងារដែលត្រូវកែលម្អបន្ថែម សំដៅធានាបាននូវគុណភាព សុវត្ថិភាព និងប្រសិទ្ធភាព ឱសថ និងវ៉ាក់សាំងនៅកម្ពុជា។

ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តីបានលើកឡើងថា គុណភាព សុវត្ថិភាព និងប្រសិទ្ធភាព នៃផលិតផលឱសថ និងវ៉ាក់សាំង គឺមានសារសំខាន់ណាស់ ដើម្បីចូលរួមការ អភិវឌ្ឍប្រព័ន្ធសុខាភិបាលកម្ពុជាឱ្យកាន់តែមានភាពប្រសើរឡើង សំដៅជំរុញការអនុវត្តគោលនយោបាយ អាទិភាពទី១ របស់រាជរដ្ឋាភិបាល អាណត្តិទី៧ នៃរដ្ឋសភា ដោយផ្តោតលើការពង្រីកសេវាសុខាភិបាល ឆ្ពោះទៅកាន់ការគ្របដណ្តប់សុខភាពជាសកល និងការអនុវត្តវិធានការគន្លឹះក្នុងវិស័យសុខាភិបាល ឱ្យទទួលបានលទ្ធផលល្អប្រសើរ ស្របតាមសេចក្តីត្រូវការរបស់ប្រជាជនក្នុងការទទួលបាននូវ សេវាថែទាំសុខភាព ដែលមានគុណភាព សុវត្ថិភាព ប្រសិទ្ធភាពប្រកបដោយសមធម៌ ចាប់ពីមណ្ឌល សុខភាព រហូតដល់មន្ទីរពេទ្យគ្រប់កម្រិត។

ឯកឧត្តមសាស្រ្តាចារ្យរដ្ឋមន្រ្តីបានផ្តល់អនុសាសន៍ដល់អង្គសិក្ខាសាលា ដើម្បីឱ្យប្រព័ន្ធនិយ័តកម្មឱសថ និងវ៉ាក់សាំងនៅកម្ពុជា អនុវត្តបានប្រកបដោយប្រសិទ្ធភាពខ្ពស់ ក៏ដូចជាការលើកកម្ពស់ការផ្តល់សេវាសុខាភិបាល ប្រកបដោយមានគុណភាព និងប្រសិទ្ធភាពខ្ពស់ដូចជា៖ ប្រធានអង្គភាព ដែលកំពុងមានភារកិច្ចអនុវត្តនូវការផ្តល់សេវាពិគ្រោះ និងព្យាបាលជំងឺ ត្រូវត្រួតនិពិត្យលើការប្រើប្រាស់ឱសថ ចរាចរឱសថ ដែលត្រូវតែមានការទទួលស្គាល់ និងមានលេខបញ្ជិកាពីក្រសួងសុខាភិបាល ព្រមទាំងត្រូវមានការប្រុងប្រយ័ត្នក្នុងការទទួលយកនូវឱសថជំនួយដែលមិនមានប្រភពអាចបញ្ជាក់បានត្រឹមត្រូវ។ ត្រូវមានការគ្រប់គ្រង និងគិតទុកជាមុន នូវឱសថ វ៉ាក់សាំង បរិក្ខារពេទ្យ សម្រាប់ករណីចាំបាច់ ឬបន្ទាន់ ដែលចាំបាច់ត្រូវមានផលិតផលទាំងនេះសម្រាប់ប្រើប្រាស់ករណីបន្ទាន់ៗ។ អ្នកប្រកបវិជ្ជាជីវៈសុខាភិបាល ត្រូវមានក្រមសីលធម៌វិជ្ជាជីវៈ ក្នុងការចេញវេជ្ជបញ្ជាឱ្យបានសមស្រប និងត្រឹមត្រូវ។ ទន្ទឹមនេះដែរ ចំពោះឱសថការី ផ្តល់ឱសថតាមវេជ្ជបញ្ជា ក៏ចូលរួមត្រូវពិនិត្យនូវវេជ្ជបញ្ជាឱ្យបានហ្មត់ចត់ ដែលត្រូវតាមនិយាមវេជ្ជសាស្ត្រ ក្នុងករណីពិនិត្យឃើញថាវេជ្ជបញ្ជានោះ មិនសមស្រប ត្រូវស្នើសុំការបញ្ជាក់ឡើងវិញពីគ្រូពេទ្យព្យាបាល។ វិស័យឯកជន ត្រូវសហការចូលរួមក្នុងផលិតកម្មឱសថ ចែកចាយ ការស្តុកទុក ឱ្យស្របតាម និយាមស្តង់ដាសកល។ បន្តពង្រឹងបន្ថែមនូវការងារចុះធ្វើនិយ័តកម្ម ការងារវាយតម្លៃចុះបញ្ជិកាឱសថ និងវ៉ាក់សាំង។ ជំរុញការរាយកាណ៍ពីផលរំខានឱសថ និងវ៉ាក់សាំង ពីគ្រប់ដៃគូពាក់ព័ន្ធ។ ពិនិត្យពីធនធានមនុស្ស ជាពិសេសឱសថការី ដែលមាននាទីសំខាន់ណាស់ក្នុងការចូលរួមផ្តល់សេវាសុខាភិបាលសាធារណៈ។

ទន្ទឹមនឹងនេះ ឯកឧត្តមសាស្រ្តាចារ្យរដ្ឋមន្រ្តី ស្នើឱ្យដៃគូពាក់ព័ន្ធ បន្តជួយឧបត្ថម្ភគាំទ្រ ក្នុងប្រព័ន្ធនិយ័តកម្មឱសថ និងវ៉ាក់សាំងនេះ ដើម្បីឈានទៅសម្រេចបានគោលដៅ សម្រាប់ការវាយតម្លៃប្រព័ន្ធនេះ នៅឆ្នាំ២០២៧។

សូមជម្រាបជូនថា ពិធីបើកសិក្ខាសាលានេះ មានការចូលរួមពីថ្នាក់ដឹកនាំក្រសួងសុខាភិបាល នាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង មជ្ឈមណ្ឌលជាតិពិសោធន៍សុខាភិបាល វិទ្យាស្ថានជាតិ សុខភាពសាធារណៈ និងកម្មវិធីជាតិផ្តល់ថ្នាំបង្ការ ព្រមទាំងអ្នកសម្របសម្រួលពីអង្គការ WHO (ដែលមក ពីទីស្នាក់ការកណ្តាល HQ, WPRO, និងការិយាល័យប្រចាំប្រទេស) និង TGA ប្រធាននាយកដ្ឋាន និងអង្គភាពថ្នាក់កណ្តាលពាក់ព័ន្ធ មន្ទីរពេទ្យជាតិ មជ្ឈមណ្ឌលជាតិ សាកលវិទ្យាល័យវិទ្យាសាស្រ្ត សុខាភិបាល គណៈឱសថការីកម្ពុជា សមាគមអ្នកផលិតឱសថកម្ពុជា សមាគមអ្នកចែកចាយឱសថកម្ពុជា ព្រមទាំងតំណាងការិយាល័យអង្គការសហប្រជាជាតិសម្រាប់សេវាកម្មគម្រោង (UNOPS) ចំនួន ៨៤ រូប៕

ដោយ៖ ទេស ច័ន្ទសុធារី (ប្រភព៖ ក្រសួងសុខាភិបាល)